GALATIA 2
2
Ar Paulus nen ir rasul amberak inom ekugwa wene
1 #
Kis. 11:30, 15:2 Empat belas tahun ekdiluk, an o Yerusalem laga dogolir, ar Barnabas o, nen Titus o ninom lagagu. 2Ar Allah nen, an o Yerusalem etoma loak nen yiluk inugur neyarigemo, etoma arar lagagu o. Nir ir ap nggaindak Allah akburi onde mende inoba lagagurik, an wene Pano Wene akuni Yahudi dek mende yorar netaga mende, wene mbililogo yorarigi o. Nenaluk an alep nen, yogondak nen wene erir taga mende etoma, elamataru na'ir o. 3Titus nimbirak wolok netaga eti, ap Yunani mende, ogwe ir Yahudi mende sunat erir tagwi paga erurak o yiluk, 4ir akuni nen, tombogor kugwi ar ogwe, sunat eti ekikdek ar o. Ir inebe tekman mende nen, nir ninogari o yiluk lakbi lakbo ninakla unggwi watuk, nir Yesus Kristus ninom nenggerogon kunik werek yiluk ninauk mbaluok yiluk, ir nen nir waganogo woknerek alep welagagumo, yedoman erogo binanu yiluk eritagwi o. 5Nir nen ir inane yugwi mende wokbiluk inapma ari lugun dek o. Nir wene Pano Wene yokerarugumo, waganggugup eti amodok mbalek dogowak yiluk, kinaruam agorik o.
6 #
Ul. 10:17
Etama nen, ir ap inalon palek mende nen, wene ngger negen kenam aga mende mondok yoraurak o yiluk yonugwi dek ar o. An nakla paga nen, ir ap inalon palek a dek a, eti paga awene dek o, nenaluk Ar Allah nen akuni inelokte mbenarir tagodek o. 7Wene elokte medo kalok birkamo, ir ap inalon palek mende nen, Allah nen wene Pano Wene ir akuni Yahudi dek mende yorar nega dogowak yiluk baninggige ir inilu o. Eti ndak-ndak ar Petrus nen, ir akuni Yahudi mende inake paga, wene Pano Wene eti yorar nega dogowak nen yiluk denogo birigemo yugwi o. 8Nenaluk Ar Allah ebe ambi nen ar, ar Petrus ir akuni Yahudi mende inake rasul aruak nen yiluk obarne erogo bega, nen an ir akuni Yahudi dek mende inake rasul aruak nen yiluk nobarne erogo baninggige mo o. 9Nen ar Petrus o, Yohanes o, nen ar Yakobus o, ir eta jemaat dambulik inewai nggaindak mende lektogo barige mende nen, an eti Ar Allah nen yabu adik denek yi arar wogorigemo yiluk yorniri tagwi o. Eti paga nen, ir nen an o, ar Barnabas o, ninom niliti ambiar o yiluk, nir ninane pak-pak yirugumo o. Ir ninom ninane dambulogo, nir akuni Yahudi dek mende inuma wene Pano Wene yorar lagwi nen ir akuni Yahudi mende werekma yorar lagwi eruok o yiluk ninane dambulkugu o. 10Ir nen wene omanggi omangga ar nggino yugu dogolir, akuni ininggi dek mende etoma kinil woginatno yiluk yirugwa o. Nen an kwak wene eta eru kwak eti mondok wadik wadok arar kertaga o.
O Antiokhia dogolir Paulus nen Petrus uwak kali mbiyalkige wene
11Petrus o Antiokhia wagagerek paga, an nen wenemuk telekma ar yorigi o. Nenaluk ar nen wene eru dek mende eki nanggige o. 12Alep ar ir akuni Yahudi dek mende inom kortatuk erom nunggwi werekma, ogwe yabongga ar Yakobus nen akuni lakba wagage mende wagugwa il dalok, tuguluk ar ebe ir akuni Yahudi dek mende enogo erom inom nau dambe kalok, nen lambok-lambok ekige paga o. Nenaluk ir akuni eti nen akuni obogar sunat erinaburak yugwi eti paga ma, ar inoba obade nen ekige o. 13Ir ninogari Yahudi mende amberak ar Petrus ekige mutok ekugwa paga, ar Barnabas eterogon ar kimak-kimak ekige o. 14Ir inobabur wene Pano Wene yege ndak-ndak dek erugun nanggugwa; akuni obok inuwagwam Petrus yoga dogolir, “Wedak, kar ap Yahudi mende nen, kobabur akuni Yahudi mende dek talek eka lagandik nen, yogondak kar nen akuni wedek mende yoma Yahudi mende ndak-ndak dogorak yiluk yir nertagan eti nenaluk?” yiluk yorigi o.
Ir Yahudi mende inom, nen ir Yunani mende inom, Ar Yesus oba ebebar andagun paga ndilinabigin wene
15Nir akuni nen endago paga eti, ninebe akuni Yahudi mende arar. “Nir ap Yahudi dek mende maduk inoba nggirik mende dek o.” 16#Mzm. 143:2; Rm. 3:20,22Eta mende, ebebar ninilu eti, akuni nen maduk ekwi inambotna mbo dambe kalok, Yesus Kristus oba ebebar andagwi kalok, Ar Allah inom pano arugun o. Nen hukum agama ake kindirik ekwi paga dek o. Nir nen ogwe Ar Yesus Kristus oba ebabar o yiluk andarugu paga, Ar Allah ninom pano agagu o. Hukum agama wene kindirik ekugu paga dek o. Nenaluk eti, hukum agama awene kindirik erugun paga, ar akuni ambiar nen ogwe Ar Allah imbirak pano arugun mondok dek arar o. 17Nir Allah ninom pano dambuluok yiluk kalok, ninebe Kristus ninom ambiar arurak o. Ogwe eta etegerogo eru ar mende, “Nir akuni maduk ekwa akuni ar,” nen ir akuni Yahudi dek mende talegar arumo, eta kalok Ar Kristus obabur paga nir maduk eko a? Dek mondok arar o! 18An nen wene agama wene miyalogo dek erogo birigi mende, tuguluk yabongga menigin kalok, yogo an yi wene hukum kindirik mende tagale eti an arar o yiluk telekma bigin o. 19Ogwe an nen wene agama wene kindirik ake arar wartagagi o. Nen an Ar Allah ake niluk dogu paga, ar hukum agama eti nen ar nakige o. Eta paga ma, an nebe Ar Kristus nimbirak warogo, o paga binanunggugwa o. 20Yogondak an paga niluk agarik dek o, Ogwe Ar Kristus eti ar an nakla iluk agarik o. An yogondak ya niluk agarik eti, niliti Allah Akbur nakba karige inom, nen an nake paga Ar wakugwa eti inom, ebebar an nake paga Ar ekige o yiluk, andarigi eti paga an niluk agarik o. 21Ar Allah nen we wokneragage mende eti tebelogo bega dek o. Mende akuni agama wene kindirik ekwi paga Ar Allah inom pano arugun kalok, Ar Kristus ninake kanggige eti we elamarogo arar o!
Currently Selected:
GALATIA 2: WLW
Highlight
Copy
Compare
Share
Want to have your highlights saved across all your devices? Sign up or sign in
