2 KORINTUS 7
7
1Nogari niliti kunik mende wa! Wene Ar Allah nen kir yegerogon ekinabigin yirige eti, nir ninake yirigemo o. Eti paga, nir ninebe maduk erninakanem agabak kigirtawok o. Nir nen Ar Allah ake denek dogowak nen yiluk, Ar Allah oba nggok togo um palogo dogowok o.
Ar Paulus adeknggen karige wene
2Nir kinilitimo wokninaburak o. Nir nen kir ambi maduk ekinakwi, kinamende waganggik, etuk dek ar o. Nir nininggimo werek aruwak nen yiluk, akuni inamendek kabedogo waganu dek o. 3An yorkeragi enda, hukuman kir kinoba wurabik nen yorkeragi dek o. An alebar yokeraga dogolir, kinebe niniliti kunikma, ninogari inom niniliti ambi mbalek, kamburak inom, niniluk dogorak inom ambi paga doguwok o. 4An kir ekwi kinalok, we yiluk telekma bi warkinabir taga mende o. Nir ninobabur dida erninakanem, kir nen niliti ago warnakwi, niniliti adeknggen nggok erninakwi, eritagwi o. 5#2Kor. 2:13Nir o Makedonia nggwe watuk, tar walu mondok dek. Pelak-pelak lau ninoba dida yega, ir akuni amberak nen aredo warninakwi, nir ninakla nen ninobade mondok tobok togo etagagemo welagagu o. 6Ar Allah nen akuni iniliti ndanggadi atukmo, inagur malitaga mende nen ninagur malaka, Titus ninoba waga, ekigemo niliti adeknggen nggok agage o. 7Ar Titus ninoba wagage paga mban ninadeknggen karugu dek o. Ar Titus kir pano yamak karugup mende yonega, kir nen Paulus ibar ninoba waruwak yogop paga, kir nen kinobabur alep welagop mende mbo biluk, yogondak an nerakde mbalkopma, eta yoneraga kolaldiluk, niliti adeknggen nggok aga o. 8An surat alep kinoba lakbi wagagimo kiniliti wakinakigi mende, an nen surat eta nenggerogo ekigi yiluk nakla andalok dek o. An nen surat yi ekimo iniliti waki o andarigi mende, eti we elalma eta arar o. 9Yogondak surat alep eki eti paga kiniliti watalok, kinobabur adik ngger agop eta paga, niliti adeknggen nggok ernabir taga o. Kiniliti aik aga etoma Ar Allah aruan eta agarikma, nir nen maduk ekinaki dek o. 10Iniliti eterogo wartagunem, akuni inagap endarir taga mende o. Eti paga an niliti wake yurak dek o. Akuni agar taga mende nen iniliti watalok, ugu paga eti kambir taga mende arar o. 11Yogo, kir Ar Allah wene yirige paga kiniliti watalok nen, kinebe kinobabur ertaga mende birkani o. Ebe kir nen kiniliti watalok maduk mende mbo biluk pano mende ekwi, kinadeknggen kugwi, akuni maduk ekwi mende inuwak deninakwi, maduk eru kinobade aga, maduk eru agode yugwi, maduk eru kina'ir dogorak o. Etama, kinobarne togon eku dogoni o. Eta ekopma, kir pano ekop o yiluk yorkeragi o. 12Nen an nen Surat eki eti, surat ekigi eti ap maduk ekugwa paga dek, ap maduk ekdiluk kener wakwi paga dek, an surat ekigi edo eti; kir nen Ar Allah uwagam Ar eyabu mende yoma nenaluk monogo bago o, yiluk andabagik nen yiluk ekigimo o. 13Eta paga niniliti pano aga o. Niniliti pano aga mban dek, ambi ar Titus pano ekdogop iliti adeknggen aga paga inom, Titus iliti adeknggen ekdogopma, ebe pano ninoba ya wagama, nir niniliti adeknggen ambik aga o. 14An nen kir kinanggengge biluk ar yorigi o. Etama, kir pano mondok ekugup eti, an wa yigi o. Ma wene nir nen kir yokeragagu mende obogar eti ebebar o. Etegerogon ar, nir nen kir kinanggengge biluk, ar Titus yorugu mende eti, ebebar o. 15Yogondak ar nen kir kinakba nggok negen kertaga o. Ar nen kir yi erurak o yiluk yokeraga mutok erir lagwi, ane kinaruk dirogon kolalkwi, yanggorogon ekwi ekugup paga, ar iliti kinoba mondok kunik agarik o. 16Kir kinadik nen eru ndak kinalok, niliti adeknggen nggok kinoba binagir taga o.
Currently Selected:
2 KORINTUS 7: WLW
Highlight
Copy
Compare
Share
Want to have your highlights saved across all your devices? Sign up or sign in
