2 KORINTUS 6
6
Paulus yabu eka lagage wene
1Nir yabu Ar Allah ninom ekwi ma, Ar Allah iliti pano nen ekbinagi taga etoma elamarogo mbo bugup o. 2#Yes. 49:8Alkitab mbalek paga, Ar Allah nen yegerogo yirige:
“O telek pano werek ya paga, kar kane An naruk muk kulkigi o.
Nen o telek pano ndilkinaburak paga, An nen yamak kineyagin o,” yiluk yirige.
Kinilu togon dogoni o, kir kinao telek eti yogondak ya arar werek o. Nen kir ndilkinaburak telek eti yogondak ya arar werek o! 3Nir yabu ekoma ambik yiluk yumo, nir yabu ekoma ela matarurak ma, yi eko ndik eko yiluk yorau nina'ir o. 4Abenok nggwe, ye wene nde wene obogar, nir yi Ar Allah eyabu mende yorar tagwi o. Anggin panggin ambik ninoba wuka kigik ar, yanggo yiluk erir tagwi o. 5#Kis. 16:23Mep dagik dagok, kede warninakwi, onda mbalninakwi, naungge ake kwatar ambik ekwi, noge pano yigik dek, erom ninggik dek, erir tagwi o. 6Ir nen etegerogo erninakwi dagik, nir nen tagabal agwi, niniliti kumbu diluk, niniliti pano paga, niniliti Roh Ar Allah oba penggarek agorik o. 7Nir Ar Allah awene ebe wene inom, Ar Allah obarne werek mende inom, wene ebe mor-mor wene paga ninatuan mbalkunem ninalon togo erir lek tagwi o. 8Nir woguk binanunggwi ar o, ogwe tebek binanunggwi ar; pogor ninakwi ar ogwe nen ninalon dik dek erninakwi, nir wene ebebar yugwi ogwe nen inenggal nggirik yorneragwi ar o. 9Nir ir akuni obogar inunggukdek andugwi ogwe, akuni obogar nen ninendaga inilu aga. Arar kanggoma andagwi mende ninebe niniluk agorik o. Kambuwak nen yiluk erninaketek mende, kanggikdek niniluk agorik o. 10Niniliti aik erogo binanunggwi mende, ninadeknggen kertagwi o. Nir ninilimo dek ninagwi mende, nir nen akuni ininggi werek erogo bagwi, inamendek dek yoneragwi mende, ninamende werek nir arar werek o.
Maduk agade kunurak dek wene
11Ae, nogari kir o Korintus mende endoma, kir niliti kunik nen, wene ambi tebelogo biluk yokeragik dek o! Wene nir ninakla wene obogar tu kurogo, telekma arar yokeragagu o. 12Nir nen kir kinil kimakik dek mende, kir nen perak, nir kinilitimo nen tu larogo wulninabir tagwi o. 13Yogondak, an kinombae ma ninom pano doguwok nen yiluk wene telekma ar yokerak o, nir ninake kinilitimo tu lakop etoma, tu kurogo binanini o! 14Ar Yesus ane inonggok dek mende kinom agade kunugup o. Ir kinom kunik dogokbuk o. Pano inom, maduk inom, imbirak ambimo dambu kaurak pano a? Dindaga kukbaga imbirak ambimo dambulu ndak a? 15Ar Kristus Iblis imbirak inane dambulurak ndak dek o. Akuni ebebar andagwi mende inom, tekman mende inom, ambi dambulurak edo werek a? 16#Im. 26:12; Yeh. 37:27; 1Kor. 3:16, 6:19Ar Allah ambilai inom, Iblis ambilai inom, ambimo palek werek a? Nir ninebe yi, Ar Allah ambilai palek, Ar Allah iluk mende paga palek, Ar Allah ebe nen yegerogo yirige,
“An nebe ir inakla dogolir,
ninom dogogun o.
An nebe ir inombae arumo,
ir inebe An Nakburi atuk dogogun o.
17 #
Yes. 52:11
Etama,
ir akuni Ar Allah ane inonggok dek mende inane
yugwi mende dambek dalok
Kinom kunggikdek, maduk mende kalok agode yiluk dogogunem
an nen kir wokinabigin o.
18 #
2Sam. 7:14; 1Taw. 17:13; Yes. 43:6; Yer. 31:9 Ar Allah endaga mbogor obarne ambik
nen An kinombae arumo,
kir An Nakburi arugun o,” yiluk yirige.
Currently Selected:
2 KORINTUS 6: WLW
Highlight
Copy
Compare
Share
Want to have your highlights saved across all your devices? Sign up or sign in
