2 KORINTUS 5
5
1Nir ninilu o. O nir ninuma, nir ninebe werek yi miyalaru mo, Ar Allah nen nir ninai ambi mbogor taga etoma pugurogo bege mende werek o. Ar Allah adik nen palogo pugurogo birigemo, mondok aitok dogorak mende werek o. O eti ebe, akuni ininggi paga nen erogo, palogo pugurkugwa mende dek o. 2O yogondak agorikmo yila dogolir, ninane ambik yugu dogolir, nir ninuma ogona paga mbogor taga etoma ari lalok, o ngger mende paga yitalok dogorak mende, yiluk yirtagwi o. 3Nir niniliti etegerogo oba eberek dogolir, nir niniyom ngger mende yikbinanu mo, nir ninagur mbalek dogogun dek o. 4Nir uma o yi akla dogolir, nir dogu didarek kalok, nena paga nakbuk kalok, eku yiluk um nggok yugwi werek o. Eti nir ninagakdo agar taga mende mbo dambe kigikdek kigik, ninagakdo ngger mende eti yirtamo, nir ninagakdo agar taga kambir taga mende yi, ninagakdo iluk mende nen aru mbalka dogowak nen yiluk, yir tagwi o. 5O nir dogowam etoma, Ar Allah adik nen ndugurogo birigemo o. Ndugurogo birigemo etoma, ebebar wokneragin andalok, dogowak nen yiluk yogondak ya Ar nen Roh Ar Allah kinom dogoni o, yiluk kunogo binaninggigemo werek o. 6Nir ninakla nen ninebe ninagakdo yi paga, yiduktek dogolir, ninuma Ar Allah ninom dogowam, walek negen ar aganem torek niniliti kumbuk diluk agorik o. 7Nir ebe ninil kalok erir tagwi dek o, ar te, nir niniliti paga nen ebebar wokneragin o yiluk, oba mbektek dogolir nen eritagwi o. 8Nir nen ninewe ninom dogu wadok nen, o wum mende yi dambe kamore yiluk, niniliti oba duktek eti paga, niniliti kondorek werek o. 9Nir nen o agorik yi, akla dogogun a, yabongga o ngger akdip mo nen, Ar iliti adeknggen eku dogogun a, yiluk kwakwi agorik o. 10#Rm. 14:10Eta ebebar mende, nir akuni yoma obok Ar Kristus uwagam menari lugun o. Ar nen nir agar paga yoma dogolir, maduk pano eku lagagu mende ninuwak dologo, onggo eku lagagu ndak-ndak wokneragin o. Ninuwak dologo nir eku dogu ndak-ndak, maduk eku lagugwa mende maduk mende wogoraga, pano eku lagugwa mende, pano wogoraga erigin o.
Dambul ninaburak wene
11Ar Allah oba um palurak eti nir ninilu o. Eti paga akuni obogar nen nir wene yoragwi, waganuwak nen yiluk erir tagwi o. Nir ninebe erir nugwi, Ar Allah obok telekma ilu agagerek ma, kir nen nir ninebe erir lagwi kiniliti paga telekma ar wokninarno o yiluk, yorkeragi o. 12Yala kir nen nir mban woguk dinanubagik nen yiluk, ambi inom nggino yokerar taga dek o. Nir nen kir wogok binagurak mende eti, edo kinilu ekinaka kalok, kir nen ir akuni amberak agar paga mende paga, wogok daktagwi mende inawene ndak ar mbalku dogobagik nen yiluk, yokiragi o. 13Nir nen ugun kendan-kendan erumo, eti Ar Allah ake o. Nir nen erok kindik kondok erumo, eti kir kinake o. 14Kristus iliti kunik nen erir taga mende, nir ninilitimo dik yirigemo, nen nir erir lek tagwi o. Nir arar kogo o, ap ambi akuni obok inake kanggige, eta yumo akuni obogar arar kanggugwa ma o. 15Kristus akuni obok inake kanggige, ir akuni iniluk dogolir ir inake etagu dogowak nen yiluk dek mende, Ar Kristus ir akuni inake kanggigemo, Ar iluk erogo birige eti ake eku dogorak o. 16Etama nir nen akuni paga nggwe nen dik bagwi dek o. Ebebar alep eta paga, Ar Kristus akuni paga nggwe tu lak karugu ar mende, yogondak eta ndak-ndak lak keragwi dek o. 17Ir akuni Ar Kristus inom kunik mende, akuni inebe ngger mende arugun o. Alep mende dek arar arigin o. Obok ar ngger mende mban etarigin o. 18Etoma obok Ar Allah nen erik taga o. Kristus paga Ar Allah nen nineyabu yi wokneragage o. Akuni amberak Ar Allah inom mbogor yalogo dambuluwak nen wolok lani o yiluk, wokneragage o. 19Nir nen yokeragu dogolir, Ar Allah nen Ar Kristus paga akuni obogar, Ar inom dambul inakige o. Dambulogo balok Ar Allah nen akuni Ar oba maduk ekdiluk wulkugwa mende, onggo bini yoralok dek o. Akuni Ar Allah inom mbogor yalurak wene eti, nir ninoba birigemo yorar letagwi o. 20Nir yi Kristus awene wolok mende o. Nir paga Ar Allah nen Ar ane akuni yoma yorar taga o. Ar Allah nen akuni yoma obok Ar inom dambuluwok nen yiluk, inggi nde agan waganem, kodabagik nen yiluk, Ar Kristus endaga paga nggino nggano yokerago o. 21Ar maduk mondok erir tagodek mende, Ar Allah nen nir ninomaduk waganogo Ar oba birigemo o. Nir Ar Kristus ninom kunumo, nir Ar Allah ninom pano dambulik dogogun o.
Currently Selected:
2 KORINTUS 5: WLW
Highlight
Copy
Compare
Share
Want to have your highlights saved across all your devices? Sign up or sign in
