2 KORINTUS 4
4
Inamende mbogor paga mende eti, inamende agar paga mende akla yagadek Wene
1Ar Allah iliti pano nen, yabu yi wokneragagemo, nir nen erir tagwi o. Etama nir niniliti anggin dek dogolir, erir lek tagwi o. 2Nir nen tuan kimak-kimak enggadi werek mende inom, ninane amburu ndik-ndik paga inom, Ar Allah wene mbalek paga kalok, yokeragagu dek o. Nir ninakla pano paga, Ar Allah iliti mirik paga arar yokeragagu mo o. Etama, kir akuni obok nen, kiniliti kinane pano paga, nir erir lagwi lakninaurak o yiluk yorkeragi o. 3Wene Pano Wene nir yorar ner tagwi yi, dikbigik dek kalok, ir akuni maduk ekwa kamburak ake pulik arar ma, ir inilitimo unggigin mondok dek o. 4Ar tide, o yoma an onde yiluk yir taga mende nen, ir akuni wene Pano Wene waganggwi, oba panggolkwi, ekunem yiluk iniliti tu larir taga o. Ir akuni wene Pano Wene, Ar Yesus endaga mbogor Ar Allah ebe kwak eti, ir inil kugunem yiluk, inaru mbalir taga o. 5Wene nir nen yokera tagwi endi, nir ninawene edo, nir paga ninakla nen wundudek o. Nir yi Ar anduan nengge, wene endi edo Ar Tuhan Yesus Kristus endaga mbogor awene mende, nir nen kir yokera tagwi o. 6#Kej. 1:3Ar Allah nen yirige yi, “O amum mo nen akbinak wundigin o,” yiluk yirige. Ar ebe yi nen akbinak ninilitimo begemo, akbinak yibadi taga o. Nir nen, Ar Allah akbinak Kristus kilkawak paga, yibadogo birige ninilu aruwak nen yiluk, yibar nina taga o. 7Ogwe nir ninamende yi, agar mende agabak kigirik akla werekma, obarne werek mende kida-kida wundi taga eti edo, Ar Allah paga nen o yiluk, ir inilu aruwak nen yiluk wokneragage mo, Ar Allah obarne eti paga, nir ninebe ninobarne dek mende yi nen, wolok lertagwi o. Nir ninawene mende nir nen wolok nugwi dek o. 8Akuni obok nen ninaruwok nen yiluk, ir ekwi mende, nggedal ninakikdek o. Nir nomala komala yugwi mende, niniliti kuni agwi dek o. 9Ninaru mende yagaragi kunik dagik mende, ninadik togok binaninggik dek. Ndugwi paga ninaketek mende, nggakbuk kanggikdek. 10Kup keyam Ar Yesus kanggige mende, nir ninoba aga kugwi mende, Ar Yesus iluk agage paga, nir ninoba iluk mende kenam arir lek taga o. 11Nir ninebe niniluk yogondak ya werek yi, Ar Yesus paga wokninarek kambuwak nen yiluk erninakwi eti, ninagakdo dek arurak mende yi paga, Ar Yesus ebe yenggak kowak nen yiluk erninabir lek tagwi o. 12Nir ninebe ninarumo, kambugun mende, kir nen wene yokerawgi yi waganumo, iluk mende nen kinilitimo erir laga paga, niniliti adeknggen arigin o. 13#Mzm. 116:10Alkitab mbalek paga nen yi yege, “An yir taga yi, an panggok diluk ar,” yogo, ebe eterogo panggok diluk nen, yugwi ma, nir yokera tagwi yi ebebar oba panggok diluk nen, kir yokera tagwi o. 14Nir oba panggolek mende Ar Allah eti nen, ninewe Yesus arar iluk ekdirige kwak, nir kambumo, Ar Yesus paga niniluk ekdinanigin o. Kir inom nir inom waganogo, Ar werekma uwagam binani ligin o. 15Etoma obogar kir kinake etarigin o. O nanonggal wokneragage ya paga, akuni yoma nen obogar Ar oba um palogo waganumo, yabunggane akuni o ya nda mende nen, inane paga dombok Ar Allah wa, yiluk endaga mbalkwi kigik, Ar Allah endaga mondok pogoraku dogogun o.
Ar Allah oba panggol biluk dogorak wene
16Etegeron kalok, nir niniliti pirik dek. Ninebe agar paga ya, akuni nen endago paga, muk elokte maduk aga mende, ninebe mbogor paga nen endago mende paga, ngger mende mondok erogo binaninggik dek taga o. 17Anggon panggon bugudak ninoba wurar taga ya, idu paga dek o. Anggon panggon eti ninadeknggen kugu dogowak nen yiluk, erir taga o. Anggon panggon eti nggok dek, adeknggen kwak eti nggok mondok kugu dogorak mende o. 18Nir ebe telekma ninil kalok ogwe, ebe nir kugwi dek, nir nen ebe ninil kigikdek mende mutok kwarir tagwi o. Nir ninakla nen kugwi mende, yoma elalma dogoluk nen dek arigin o. Nen ninil kigikdek mende eti, mondok-mondok dogogin andalok mutok lertagwi o.
Currently Selected:
2 KORINTUS 4: WLW
Highlight
Copy
Compare
Share
Want to have your highlights saved across all your devices? Sign up or sign in
