2 KORINTUS 3
3
Ap Ar Allah eyabu wene ngger warekma ekwi wene
1Nir wene yokeragagu etoma, nir wogor daktawok nen yiluk ekugumo a? Ap amberak nen, ir woginabuwak nen yiluk surat mbalek wolok nugwi paga wogok daktagwi kwak, nir nen kir kinake surat mbalek wolok, wokera waruwak nen yiluk yogop? 2Kir kinebe agokip endoma eti, nir mende woguk bartaurak mende surat eti kir kinebe arar o. O wogok burak mende surat eti, ninilimo mbalekma, akuni obok nen inil kugwi, endaga talkwi agarik o. 3#Kel. 24:12; Yer. 31:33; Yeh. 11:19, 36:26 Kir kinebe paga, nir nen wene yokeragwi ninagik, surat Ar Kristus abok mende kinilitimo mbalekma, ir akuni nen inil kinar tagwi o. Surat kinilitimo mbalek eti diru amburu paga dek o, Ar Roh Ar Allah iluk mende adiru paga mbalek o. Yugum paga dek, ap kilitimo Kristus adiru paga nen mbalkige mo o. 4#1Kor. 1:12Nir wene yogo enda, nir ninakla nen Ar Kristus paga, Ar Allah oba nggok togo panggolek dogolir yogo o.
5Nir yabu yi ndak erugun yurak edo mondok dek arar mende, Ar Allah nen kir yabu yi erni o yiluk yirigemo, nir nen yabu yi erirtagwi o. 6#Yer. 31:31Ar nen, nir yabu wene yabungga erigin yirige wene paga eku dogowak nen yiluk binanggigemo o. Roh Ar Allah awene warek wokneragage eti paga, penggarek agorik o. Akuni inawene paga, inakbuku paga mbalkugwa paga dek o. Akuni nen mbalkugwa paga, wogorek kambiluk lektagama lagagemo o. Wene yabungga erigin yirige mende eti paga, Roh Ar Allah nen iluk mende woknerar taga o.
7 #
Kel. 34:29
Wene kanggwi edo mende alep erigin yirige mende, nggir paga diru mbalkanem, Ar Allah akbinak, Musa ilkawak paga kwi ndede ekige o. Akbinak kwi ndede erigi nanggige, ir Israel mende Musa ilkawak paga inil lak kau inobade ambik agage mende, Musa ilkawak akbinak eka lagage enogo didu karige o. Yogo, wene alep erigin yirige mende, kanggwi edo mende akbinak nggok paga walkarige kalok, 8wene yabungga erigin yirige mende, Ar Roh Ar Allah nen wokneragage mende eti, akbinak ebiluk nggok kwak adik negen dagir taga o. 9Wene alep erigin yirige paga, akuni inaru mende akbinak ambik ekigemo kalok, wene yabungga erigin yirige paga eti, ir akuni Ar Allah ninom pano dambulu paga, akbinak nggok mondok adik mende arar dagir taga o. 10Akbinak ngger mende, nggok mondok mende arar wagarikmo, akbinak alep nggok kugu lagugwa mende, yogondak kugun dek o. 11Akbinak alep eta, we elalma denggerek mende welagage, akbinak yogondak werek mende, nggok aitok mondok dogogin o. 12Nir niniliti eta paga duktek werekma, ninakla dakor dogolir, erir ler tagwi o. 13#Kel. 34:33Nir Musa ilkawak paga, Ar Allah akbinak, ir Yahudi mende nen akbinak dek ari taga mende inil kugunem yiluk, tu elok tenggen talkige ndak-ndak ekwi dek o. 14Iniliti apir agagemo, yogondak ya inom iniliti apir ar werekma, wene alep erigin yirige mende endaga taluwok nen yiluk, tu danggulik dogolir nen endaga tali tagwi o. Ir akuni Kristus inom kunggwi kigik, tu dangguk danggulik eti mbonggal inabigin o. 15Yogondak ya inom, ir Musa awene mbalek endaga taluwok nen yiluk, tu dangguk eti danggulik dogolir endaga talkunem, iniliti paga amum erogo birtagwi o.
16Ap ambi nen ninewe oba warumo, tu dangguk elokte kimago eti, ar ap eti alubak paga nen bongga logo bigin o.
17Yogo, ninewe yigi endi, Roh Kudus yiluk yigi, Roh Tuhan werekma etoma, akuni wender nggiluk dogitagama o. 18Nir yogondak yoma, nir ninoba ninebe paga nen, Tuhan akbinak telekma yibakwi ma, nir tu dangguk danggulkwi dek o. Akbinak nggok mende eti edo Ar Tuhan, Roh paga nen wundi waga dogolir, nir ninebe ninobabur ngger adik mende Ar, elokte obabur akbinak nggok eti kwak, erninabir taga o.
Currently Selected:
2 KORINTUS 3: WLW
Highlight
Copy
Compare
Share
Want to have your highlights saved across all your devices? Sign up or sign in
