2 KORINTUS 2
2
1Eti paga nen, an kir bikina warigin yirigi ernogo, we kir kiniliti aik mban erogo bi warurak paga, an warurak dek o yiluk, yigi o. 2Nenaluk, kir nen an niliti wateganem yonggo naburak mende kiniliti wakinabumo, eti paga nen, ir akuni tani kwak nen an yonggonaburak o? 3An bikina warigin dek o yiluk surat endi mbalogo kinoba lakbi wagi o. An niliti wartega neyalok, kir nen yonggo naburak ma yiluk niliti watagi o. An niliti adeknggen kalok, kir inom kiniliti adeknggen ar dogorak o. 4An nen surat yi kinake mbalka dogolir, wene ebe eta eru nakla ebeka dogolir, niliti buru yega, de nilimo kuragi kidu yega, eka dogolir eki o. Eta etegerogo yumo, kir kiniliti buru yubagik nen yiluk dek o. Ar te kir nen an akuni obogar inakba werekma, nir inom ninakba nggok dogolir ekemo o yiluk, kinilu aruwak nen yiluk yorkeragi o.
Maduk ekwi kalok, inomaduk mi erogo maga bagu dogorak wene
5Ap ambi obabur maduk eka kalok, an mban niliti wataurak dek o. Kir inom obogar maduk erogo binagumo, kiniliti watagun o. Kir amberak nen, nir inom ar niniliti wakemo yurak pano ar paga nen yorkeragi o. 6Ir ap akuni iniliti aik erinakwa, inobabur maduk mende eti mbo buwak nen yiluk, kir obogar nen, ir inake wene inaruk waku dogorak eti pano o. 7Kir nen ap maduk eke mende etnogo, aruk waku dogolir, yogondak koba dek o yiluk, maduk eke enogo oba mi erogo maga bugu dogoni o. Nen, kar kiliti ambi inom nggok togo wartega, kiliti pirik eka erugup o yiluk, yogu dogoni o. 8Kir nen aruk waku dogolir, kar kebe nir niniliti mondok kunik o yiluk, yogu dogobagik nen yiluk, nggino yorkeragi o. 9An surat yi erogo kinoba lakbi wagi endoma, kinauk mbalik nen yiluk ekimo o, kir an nen yi erni yorkeragi mende etoma, ebebar dirogon erugun a, dek a yiluk ekimo o. 10Kir nen ap ambi maduk erogo binagage mende, ar maduk eke enogo, ar omaduk oba mi erogo bogop kalok, an ninom nen, ar omaduk eke mende oba mi erogo bogo o. An nen maduk erek ambi mi erogo barak mende werek kalok, kir Kristus apma pano dogobagik nen yiluk mi erogo bagin o. 11Iblis nen nir tebelninaburak paga o telek kwaka kau, an nen etegerogo eka agarik o. Nenaluk, ar nen erurak mende awene kolek nir ninilu ar.
Paulus o Troas dogolir iliti pirik ekige wene
12 #
Kis. 20:1
An o Troas waga lagagirik nil kigi mende, Ar Tuhan nen an yabu etoma eruwak nen yiluk tu kurogo birigemo, an nen wene Pano Wene Kristus ekige wene yorawak nen yiluk wagagi o. 13Wagagi mende, ar wedak ninawor Titus enogo, o Troas etoma dek arigi nanggige, an niliti pirik ekigi o. Eta etegerogo agagemo, an ir ap o Troas mende etoma, an o Makedonia lagi o yiluk, yoralok arar lagagi o.
Ar Kristus ekige paga, ware mende agagu wene
14Ogwe Ar Allah wi wa o! Ar nen nir woknerek, Ar Kristus ap ware mende ninom kunik dogolir, Ar ekige wene wolok nugu dogowak nen yiluk, Ar Allah nen Kristus pano ekige wene eti ninoba yibi obari kwak, o ya nda wigalir nugu dogowak nen yiluk, binaninggigemo wene eti wigalir lek tagwi o. 15Nenaluk nir eti, Ar Yesus nen Ar Allah ake obari pano mende kemenyan obari talek kali kunggige mende arar o. 16#Kis. 19:21Ir akuni maduk akla nuk agwi mende inake, nir yi Yesus obari kanggwa mende wolok yorar nugwi o. Nen ir Yesus Ane waganggwi mende inake paga, nir yi Ar Yesus obari pano iniluk erinaburak mende wolok yorar nugwi agorik o. Yogo etama, yabu pano yi tani nen erurak kogop? 17Nir yi, akuni ambigar nen Ar Allah wene yi oba taburogo nonggwa talek, oba taburogo ner netagwi kwak dek o. Nir niniliti yangguk paga, Ar Allah nen yabu yi erni o yiluk, yoneragagemo erir tagwi o. Ar Allah nen, nir Ar Kristus anduan atuk awene eti yorar lagunem, Ar il woknirek lek taga o.
Currently Selected:
2 KORINTUS 2: WLW
Highlight
Copy
Compare
Share
Want to have your highlights saved across all your devices? Sign up or sign in
