2 KORINTUS 1
1
Keyagi warinakige wene
1 #
Kis. 18:1
Nogari o, kir Ar Allah akburi o Korintus werek mende inom, Ar Allah akburi denek mende o kuri Akhaya werek mende obogar inom, an Paulus, Ar Allah akla andalok Rasul Kristus Yesus ake dogowak nen yiluk, menogo baninggigemo erir laganem ma, elege ninawor Timotius yi nimbirak nen keyagi warkinako o. 2Nir ninakla duktek mondok eti, Ar Allah nir Ninombae inom, Tuhan Yesus Kristus inom nen inamende kado milogo wokeragwi, kinoba pani pano ekinakwi eku dogowak o.
Ar Paulus nen Ar Allah keyagi wakige wene
3Ar Allah Tuhan Yesus Kristus Ombae endaga wogok buok o. Ar eti Ninombae iliti pano mondok arar o, nen Ar Allah eti, nir niniliti kode erogo binani taga werek arar o. 4Nir nen akuni amberak yoma anggon panggon inoba aganem, iniliti aik wakdagu dogowak nen yiluk, Ar nen nir anggin panggin ninoba wukanem, niniliti aik warninabir taga o. 5Ar Kristus oba anggin panggin pakalok wukige kwak, nir ninoba anggin panggin ambik durik mago wuka ar mende, Ar Kristus paga nen, nir niniliti aik nggok togo warninabi taga o. 6Nir ninoba waltobok togo etaga kalok, eti kiniliti amburu mbalik nen yiluk, pano ndilik mende dogo bagik nen yiluk ekinabir taga o. Aik wartaga kalok eti kir kinake ma, anggin panggin nir ninoba aganem piyalkwi ndak-ndak, kir anggin panggin kinoba aganem, kinobarne togo piyalku dogobagik nen yiluk erir taga o. 7Nir kir paga niniliti pirik dek o. Ir ndak ar eku dogogun o yiluk kinoba panggolek agorik o. Kir ninom anggin panggin ninoba wukanem, kir ninom ndak-ndak ninoba wuka ninil kalok, kir inom ndak ar kiniliti amburu mbalogo kode arigin o, yiluk ninilu arir taga o. 8#1Kor. 15:32Nogari wae! Nir o kuri Asia yoma, anggin panggin ninoba wuka dogolir, etago mende kinil lak ninabagik nen yiluk yorkeragi. Anggin ninoba wukige eti, anggin mondok lerkaurak mondok ndak dek mende arar ninoba wukigemo, niniluk dogogun dek arar aga o yiluk andarugu o. 9Ninakla nen yogo arar ninakama ya, kambugun arar o, yiluk andarugu o. Eta nir nen, nir ninobarne paga panggolkunem, Ar Allah akuni warek mende iniluk erinabi taga mende oba panggoluwak nen yiluk ekigemo. 10Nir eta mondok nggakbuk warek mende, Ar Allah obarne ambik akuni warek mende iniluk erinakwa nen, nir ndil ninakigemo o. Ninakla nen nir yabongga etegerogon ndak ar ndilninabigin andalok, oba panggolek agorik o. 11Kir nen nir ninake, Ar Allah ayonggo bugwi paga, yabongga Ar Allah nen ndilninaka dogogin o, yiluk oba panggolek agarik o. Kir nen ninake tamban ekwi paga, Ar Allah nen nir onggo pano yamak ninar taga o. Eta paga, akuni obok nen Ar Allah wa yiluk, keyagwi warir tagwi o.
Ar Paulus mikige mende dambe karige wene
12Nir agar paga ya yabu erir wagu dogolir, nir niniliti paga nen kir pano mor-mor erir wagopma yonega paga, nir niniliti woguk daktago o. Nir agar paga ya dogolir, ebe kir ninom dogolir ebe mende yanggorogo, Ar Allah obarne paga erir lagu lagagu o. Nen, nir erir wago etoma akuni nen etegerogo eruwak nen yiluk kwalogo bega paga dek o. Ogwe Ar Allah iliti mirik paga kwalogo biluk, erni o yiluk yokneragage mo, erir wagagu o. 13Nir yogondak surat mbalogo kinoba lakbi wago endi, wene ebe telekma kir nen endaga talogo dikburak ndak mende lakbi wago o. Yogondak ya, nir ninakla nen andagu dogolir, kir wene amberak nir nen yokerago mende dikbigikdek ekotip ogwe, an nakla mbektek eti, kir nen yabungga ndak dikbinanugun o yiluk, nakla andagi o. 14Yabunggane ninewe Yesus waganem, nir nen kir paga woguk datugwi, kir nen nir paga woguk datugwi eruwok nen o. 15Eta panggok diluk, kir kinadeknggen ambi inom lambo rogo koda bagik nen yiluk, kinoba waru nakla muk andarigi ogwe, ya agarik o. 16#Kis. 19:21An o Makedonia lektaga o, lalok nen waga dogolir kalok, an o Yudea lak nen yiluk warigin ma, kir nen an waganogo lakbanubagik nen yiluk, kinoba bikinar warigin o. 17Ogwe, an erik nen yiluk andarigi mende eti erigin dek yiluk muk yirigimo o? Wene yirigi mende eta an wene yiluk mo yu ndak-ndak ar erir tagodek yurak ndak a? Wene eru mende kolka dogolir, an nadik wadok andau mende paga mban kolka dogolir, “Eo” yega nen muk ar nen medak dogon, “Dek o yega”? muk ar. 18Ar Allah oba panggolek paga uwak mbalogo, an nane amburu kinoba warigin yirigi eti, kinoba waru na'ir yiluk dek o. “Yi ebebar lak nen” yiluk yirigimo o. 19#Kis. 18:5Nir Silas inom, Timotius inom, an ninom Ar Allah akbut Yesus Kristus eka lagage wene, yokeragagu eti ar erik yega dogolir, “Erik o” yiluk erir taga mendema, nir Ar Allah il paga bikinar warurak “Ebebar” yirugu o. 20Ar Yesus eti “Ebebar” Ar Allah nen wokeragin yirige ebebar yiluk, yirtaga mendema, nir nen ebebar eruwok yiluk yokerar tagwi o. 21Ar Allah adik nen nir inom, kir inom, Kristus ambi oba kunogo binaninggigemo o. Ar paga nir kwagago ar akburi denogo binaninggigemo o. 22Eta yiluk, Ar Allah nen akuni yoma, An namende iniyok paga erek o, yiluk Roh Ar Allah ninilitimo ninom kunik dogowak nen yiluk wokneragagemo o. Yabungga Ar nen wokeragin o yirige mende ebebar wokneragin o. 23Ar Allah il ninar taga, an niliti Ar ilu agarik, an o Korintus wagik dek puk agi eti, kir kinakba nen puk agimo o. An kir kinoba ibar warumo, an nen kir kiniliti wakinabu na'ir o. 24An nen kir yi ar oba panggolini o yiluk yokeragik dek, kir kiniliti nen Yesus oba arar mondok panggolkugupmo o. Kir kinadeknggen nggok togo dogobagik nen yiluk, an we ninom yabu eritagwi o.
Currently Selected:
2 KORINTUS 1: WLW
Highlight
Copy
Compare
Share
Want to have your highlights saved across all your devices? Sign up or sign in
