2 KORINTUS 12
12
Ar Paulus akbi ngganggo karige mende mbililogo yoragage wene
1Wogok daktau kalok pano ar ogwe enggen kwak dek o. Ogwe an yogondak ya, Ar Allah nen nakbi ngganggo paga wogok durak negen yonege mende yokeragin o. 2Nakbi ambi kega dogolir, ap Kristen mende ambi empat kelas tahun alep etoma, ar ebe ogona surga etoma wolok dagarige werekma nil kigi o. Ar ebe ap ar ari lagarik kigi a, we nakbi kigi a, Ar Allah adigar ebebar dirogo ilu o. 3An wene yigi etnogo dagalogo yirtaga o. Ap eti Firdaus unggwi lagarik kigi. An nenggok dek, ap eti ar ebe ari lagama kigi a, we nakbi kigi a, ebebar dirogo eti Ar Allah arar ilu o. 4Etoma, ar ap eti nen wene amberak akuni inaruk kolurak dek mende, inane paga yurak dek mende aruk kulkigemo. 5Yogondak an dek, ap eti kwak woguk dirtaga, an nake nobabur nggakberek negen kalok, eti kwak an nen wogok dautarak o. 6An wogokdanurak kalok, an ebebar pano eka inil neyalok, wene ebe dirogo yoraga inaruk kuliluk, nebe wogokdanumo ndak arar o. An nenggal yurak na'irma, wene wogokdaurak negen mende tebelogo damber ketaga o.
7An inil ketagodek mende karigi etoma paga, wogor dateganem yiluk Ar Allah nen, u ambi noba birigemo, adok nggurik kwak noba penggek yega mban agarik o. U eti Iblis inggimo pagoma, wogok darteganem, u eti paga nenggadi wakdanggik mban erir taga o. Wogok dateganem u eti lak mbirok ndak-ndak dagurir narir taga o. 8Ninggi tiga paga, an nen tamban eka dogolir Ar Allah wa, u yi nggigilogo wul danin o, yiluk yorigi mende, 9Ar Allah nen wene nggok negen men yirige o, “An kar kebe niliti kunikma, u eti kar kake pano dogonek o, eta paga kar nen an nobatne kilu aga dogogin o,” yiluk yornirige o. Etama, an u noba aganem, nobarne dek aganem, wogokdatau nadeknggen o. An u noba atuk nobarne dek aganem, eta paga Kristus obarne ambik naruam agarik o yiluk nilu agarik o. 10An nobarne dek aganem, an niliti nadeknggen nggok kertaga o. An Kristus endaga paga, maduk erogo banunggwi, nggodo mbalnakwi, tiknarek muknarek nugwi, an eru dida yega, an eru ndakbukmo ertaga paga nadeknggen ketaga o.
Ir akuni Korintus mende inobabur paga, ar Paulus iliti pirik ekige wene
11An ebebar akuni iniliti dek mende ndak-ndak etagi o. Eta kir endi nen erogo banggop o. Ebe negen eti kir nen an wogokdanurak mende, an kinakla pagakbuk yi mende, kinombayelak “rasul-rasul” nggoknak etoma an ninom ndak ar mende, kir nen an lemerogo mbanggopma o. 12Erubuk mende erir wagagi paga, wene mondok nggok mende erir wagagi paga, yabu nggok ndak ambigar erir waga paga, an ap Rasul pano mende an arar o, yiluk yenggak neyagun o. 13Nena kwak paga an nen kir birkina wagik dek dambek binagarigimo yogop? Jemaat amberak kinom walkamo, kir dambek binagarigi eti yi o. An nen yabu ekimo onggo woknirurak o yiluk kir yokiralok dek o. Etipaga kina'ir kunabugup o!
14Yogondak yi, ninggi ketiga paga kinoba birkina warigin o. An watuk kinoba anggin erogo binagu na'ir o. An wadok mende eti kir kinebe, kinamende kwarir warigin dek. Elege nen inagwiya-inombae inake kwarir tagodek o. Inaguya inombae nen, elege inake kwarir taga mende o. 15Etama, an nen nebe inom, kir kinake erir wagi inom, we idi dek, onggo dek arar kinebe niliti kunik nen erir wagagimo o. An kir kinebe niliti kunik mende, kir nen an nebe kina'ir lak neyaurak pano a?
16Yogo, kir nen an kinoba anggin erogo binagagi dek o, eta ebebar mende, kir amberak nen an yi anemedok ambik o yiluk yonogopma, an nanemedok paga kinamende takborakimo yogopma a? 17Ebe ngga? Ap kinoba lakba wagi endoma, an nake kinamende waganir warirtagwi a? 18An nen, ar Titus yi kinoba bikinar waruwak nen lakbi wagi o. Nen ogariyak Kristen mende kinom lani o, yiluk lakba wagi o. Ar Titus nen kir kinoba lirogo amberak waganggemo a? Ogwe, nir nimbirak nineyabu ambi, niniliti ambi dambulik paga, erir lertagwi o.
19Ebe ya mende, kir kinakla nen nir ninerakde mbalar tagwi andalok yir tagwi a? Kir wene al tagalir tagwi o! Ar Allah ilu werek o, nir wene yokerar tagwi endoma, Ar Kristus akla andarige mende yokeratagwi o. Nir eritagwi yoma, kir kiniliti mbogor paga nen endago mende kode aruwak nen yiluk ekinabir tagwi o. 20An kinoba warigin mende, niliti pirik agarik o. An ninom abuk atuk inebe pano ya yegerogo werekma dagin andagi kwak, nil kinakbuk o. Kir nen an nobabur ya negen, ane ya negen yonerau andagop ndak-ndak erukbuk o. Eta paga, kir amberak wene aredo wakunem, kiniliti wartagunem, nanini-kanini yugunem, inadik inake etau mban etagunem, kar yegedek kar endegedek yiluk yugunem, wene maduk kinilimo mal-mal yugunem, wogor daktagunem, agorik agorek ekunem ligin a, yiluk andar taga o. 21Kir endoma akuni maduk eku lagugwa mende mbo bigikdek, mbainak inilmudu ekwi, maduk ekwi, eritagodek mende ekwi, ekunem warumo Ar Allah nen kinuwagam tebe danumo, an denggu maduk nggok mende likau nobade a, yiluk agarik o.
Currently Selected:
2 KORINTUS 12: WLW
Highlight
Copy
Compare
Share
Want to have your highlights saved across all your devices? Sign up or sign in
