2 KORINTUS 11
11
Ar Paulus inom nen ir rasul agur agar mende inom wene
1An niliti mbalek negen yokerar nega nagik, kir nen kinaruk kolalkwi, waganggwi, eku dogorak ndak kogop a? 2Ar Allah nen kir kinoba iliti kunik eberek werek kwak, an nen niliti kinoba kunik mondok agarik o. Kir kinebe eti komadigi ap inom wene warek dek mende kwak werekma, an nen ap ambi kinom kunogo binagik nen yiluk, lambologo binagir taga o. Nen ap ebe eti Ar Kristus kinom oba kunogo binagir taga o. 3#Kej. 3:1-5, 13Alebar kwe Hawa wado nen akla nggagalkigemo, ane aruk kolaldiluk maduk ekige kwak, kir etegerogo kiniliti nggagalumo, Ar Kristus ane dambe kugun a, yiluk niliti pirik agarik o. 4Yogondak kir kinobabur ap amberak nen, Ar Yesus adik mende ambi nir nen Yesus ebe yi o yiluk, yokeragik dek mende, yokera unggwi wagiyama, kir nen ap eti ane waganir tagwi yega o. Kir nen Roh Allah inom, Wene pano wene inom, nir nen kir yokeragagumo waganggugup mende, adik inamonggar wene mende, inawene pano wene yugwi mende, ebe yi ar o yokeragwi dalok kinadeknggen paga waganir tagwi yega o.
5An nakla nen, ir ap rasul aguragar mende, wogokdatar nogwa, nen tebe danugun andagikdek o. 6An wene mor-mor mbalka nonggokdek mende, an nebe nggembu dek. Eta kir obok kinilu werekma yorkeragi o.
7An wene Pano Wene Ar Allah nen yirige mende yokera waga lagagirik, wadigi yi an yamak neyani o yiluk, yokeralok dek o. Kir kwak yadek dinagik yiluk, an tebe yirigimo o. Eta maduk ekigimo a? 8An kir kinake wene yokeraga nagik, ir jemaat wedekma mende nen yamak nagu lagugwa o. Kir kinake wene yokeraga nagik, ir jemaat an yamak nagwi mende inagarek obogar dek erogo birigimo o. 9#Flp. 4:15-18O eta paga, namende dek agagemo nen, kir ambi kinoba wak erogo binagarigi dek o. Ir ninogari o Makedonia mende nen wagu lagugwarik, an nake obogar ndugurogo birugwama o. An nen eru paga kir maduk ekinakanem yiluk, tuwam waka lagagimo. Nen, yogondak ya, eta ndak-ndak mondok agarik o. 10Kristus awene edo pano mende, an pago werekma, an wene menggi yi, ir akuni o Akhaya mende yoma nen dek erogo bugun mondok dek o. 11Nenaluk nen an eta yigi kogop? Kir niniliti kunik dekma yigi a? An nen kir kinebe niliti kunik agarik eti, Ar Allah adik ilu werek o!
12Ir ap inendaga “rasul-rasul” talogo wogokdatar nugwi, nir Paulus ndak-ndak ekwi o yiluk yugwi mende, dek aruwak nen yiluk, an yogondak erir taga yi, erir mban laga dogogin o. 13Ap eterogon mende eti inebe rasul aguragar arar o. Ir rasul ebebar mende, Ar Kristus nen pulinakige mende dek o. Inebe akuni nugurinakwa mende o. 14Etegerogon ekwi kalok, kir nen bi warukbuk o. Iblis nen, ir malaikat pano mende talek ertatuk, akuni nugurogo bartaga mende o. Ir ap endi inebe eti ndak-ndak nugurogo bar waritagwi o. 15Yogo eta werek ar, Iblis eyabu mende nen, Ar Allah iliti andalok ekwa malaikat mende inoba kimbi yiluk ekunem, ir bi warinaburak mondok dek o. Yabungga yabu onggo Ar Allah nen beganem, ir maduk eku lagugwa onggo wogoraga paga, bi warinabuwok nen o.
Ar Paulus ebe rasul agage paga, mep dagik dagok erogo bugu lagugwa wene
16An yigi mende ambi inom yokerar taga o, ir akuni nen an nggembu mende yornirurak dek mende yonirir tagwi o. Kir nen eterogo andagwi kalok, an nggembu mende yi nadeknggen aruwak nen yiluk, nebe odoma danini o. 17Ambi ya kir nen woguk danubagik nen yiluk yorkeragi o. Ar Tuhan nen yonegemo dek o. Ya paga an ap ebe nggembu nen yitagwi ndak-ndak yorkeragi o. 18Ap amberak ebebar agar paga mende paga woguk bartagwi o, eta ap iniliti dek mende nen yitagwi o. 19Kir kiniliti werekma, akuni iniliti dek, wene inunggukdek mende yirtar nugu dogonek yiluk, kinadeknggen paga agoktip o! 20Kir akuni nen inanduan erogo binagagwi, kinamende takborakwi, wogok daktagwi, kinaruk anggo dambul kinakwi, ekinaki dagigar, yanggo yiluk kinagi o. 21Nir nen eterogo ekinabu ninenggadi o.
Ogwe, ir eterogo mende kigik pogorinakwi kalok, an ogwe pogor dartagin ar o. (An wene akuni iniliti mbalek ndak-ndak yirtaga.) 22Ir ap eti inebe Ibrani mende a? An ap Ibrani mende ebe an arar o. Ir etoma inebe ap Israel mende a? An ap Israel mende nebe an arar o. Ir inebe Abraham umbui nen eritagwi a? An Abraham umbu an arar o. 23#Kis. 16:23Ir inebe Kristus eyabu mende? Ir inebe inobabur iniliti mbalek an ndak-ndak mende, an Kristus eyabu mende pano an arar o. An yabu nggok pano erir laga neyalok, kede warogo banunggwi, anggin mende noba bugwi, kamburak korokma nen niluk agik etarirtaga o. 24#Ul. 25:3Ninggi lima paga ir Yahudi mende nen mep dagik dagok ernakwi, ninggi tiga puluh sembilan paga ir Yahudi mende nen ndugi mburak kedak ernakwi, ekugwa o. 25#Kis. 14:19, 16:22Ninggi tiga paga ir akuni Roma mende nen ndugi nakwi, yugum paga mburalnakwi ekugwa o. Ninggi tiga paga to apma wandul nakige, i laut paga durek ilikdanggik wukdanggik eka kigik ninggi dua puluh empat jam arar welagagimo o. 26#Kis. 9:23, 14:5Dindaga kukbaga tuan taga yukmo nega lagagi, akuni Yahudi mende nen, ir akuni Yahudi dek mende nen, naruwok nen yiluk neloktema talek dagik, i ugumo laga nagik, wartarurakma mende niluk wulka, ap odi waganek yuk werekma nggwe laga, akuni kota mende nen naruwok nen yiluk narega talkwi, akuni tekman nggwe neganem naruwok nen yiluk ekwi, akuni nir Kristen o, yiluk ninom werek mende nen, dagak yuk werek ar mende erir nega lagagi mende, yogondak ya we pano negen agarik o. 27Eta ernakwi kigik nobarne mondok dek, noge panorogo yigik dek, nagarom abu, nagi abu, erom abu noge yega, togi paga noge yega, niyom dekma ambi yugu ar welaga. Na o kondorogo dek, ya agik mende welagagi o. 28Eta ernakwi kigik, niliti nen Ar Allah akburi o ya nda yomonogore, yiluk inake iniliti pirik mondok welagagi o. 29Kir amberak kinobarne dek ekinakanem, an eterogo ar nobarne dek ernabir taga o. Kir amberak maduk ekunem, an niliti wartaga agarik o.
30An pano ekigi mende mbililogo yokerau andagwi mende, an o madukmo erir nega lagagi mende mbililkeragi o. 31An nenggal mende lambologo yokeraga dek o. Ar Allah Yesus Ombae etnogo, il neyaga lagage mende ilu werek o. Ar endaga mbogor aitok mondok ar adigar dogowak o, yiluk pogor ketaga o. 32An o Damsyik etoma werekma, ap Gubernur raja Aretas apma mende nen, bakma wundi laganem pagago kede warogo wolok watno o yiluk yoragagemo, ap inarige werek nen kede warogo banirugwa o. 33Ogwe, ap inarige werek nen naruam agagemo, an nebe mburim kede yago akla, leger elola nggwe tugunogo wuldanggugwama, kode arar wulkigimo, ar Gubernur nen kede warnabudek o. Wene etegerogon ndak-ndak arar gubernur inggimo nen kode wulkigimo o.
Currently Selected:
2 KORINTUS 11: WLW
Highlight
Copy
Compare
Share
Want to have your highlights saved across all your devices? Sign up or sign in
