1 KORINTUS 16
16
Inogariyak Kristen mende yamak darugwa wene
1 #
Rm. 15:25-26
Yogondak kir nen, kinogari ir Kristen mende yamak dau yogop eti paga, alep ar an nen ir jemaat o Galatia mende inake erurak paga, eru nenggerogo erurak yiluk yorkeragi enogo ndak-ndak ar eku dogono o. 2An auwan kinoba waga dek neyagik, kir nen tamban arar ekdiluk, kir kininggim werek ndak-ndak, ambi lambok bugu dogomo, an kinoba watuk nagik akbi ar wonggalku dogorak o. 3An kinoba watuk kalok, ir ap uang pulik wolok lau denogo bagun mende eti, an watuk nen surat pengantar wogoramo, ir uang etoma o Yerusalem wolok wogora lowak nen o. 4Nen, an ninom lau pano arumo, an ninom ar ligin o.
Ar Paulus erigin yirige mende wene
5 #
Kis. 19:21
An nakla nen o Makedonia nggwe lak nen yiluk andarigimo etoma, lalok nen kir bikinar warigin o. 6An kinoba watuk ninom idu paga dogogun dek, we o togi ande kurik eta eka paga ar, nen an wornarek o ambimo lamo nggwe etoma lakbanubagik nen o. 7Ar Tuhan nen, kir kinom ambi inom dogon yonega kalok perak, ninom enda ambi inom dogogun o. An we nil mban bikinalok lau na'ir o.
8 #
Im. 23:15-21; Ul. 16:9-11 #Kis. 19:8-10An o kota yoma, o Efesus neyagik, hari Pentakosta#16:8: Pentakosta eti: Hari Ar Roh Kudus wura wagage paga oba ebeku dogolir komaku lagugwa. arar ari warigin o. 9Ir akuni Wene pano arurak mende ekwi niyau nonmbale mende ambigar ogwe, yabu erumo o telek yoma pakalok agarik o.
10 #
1Kor. 4:17
Nen ar Timotius eti, yabu an erir taga ndak-ndak ar Tuhan eyabu erir taga mende ma, kir kinoba waga kalok, ar obade ekanem, kinane pik pak yotuk, ebe waganino o. 11Kir amberak nen, ar ndak dek erdugup o. Ar an noba pano waruwak yiluk yamak kalok, wadigi amberak inom noba waruwak nen lakba warno o.
12Ar ap ninawor Apolos ernogo, kinoba lan o yiluk, lakbi warik yiluk eketek mende, ar nen puk agik mban eka mende, o telek werek aganem kinoba lakbi warigin o.
Wene kudi warek wene
13Kir ebebar eberogo waganggugup mende, kinobade dek, kiniliti kumbulik dogolir, tuwam pik pak dogono o. Kir kinobade dek paga, kinobarne paga ar eku dogoni o. 14Kir nen ye ekik nde ekik eku dogolir, nakba kakba paga erir lagu dogoni o.
15 #
1Kor. 1:16
Kir ap Stefanas akburi inom, eti kinilu arar o. Ir eti o Akhaya etoma, ir ndak ibibir Kristen mende etagugwarik ma, Ar Allah akburi inake mban ekwi agiyarik o. 16An nen kir eti ndak-ndak, ap amberak ir yabu inom erir taga mende inom, inane yokeragwi dalok waganggu dogobagik nen yiluk yorkeragi o.
17Ap Stefanas o, nen Fortunatus o, nen Akhaikus, ir kinakdikmo noba wagiyama, an niliti adeknggen aga o. 18Kir kiniliti adeknggen erogo binagir tagwi kwak, ir wagarik, an niliti mondok adeknggen erogo bani wagiya o. Nen ap etegerogon ekwi mende etoma, odo-odo erinakwi, keyagi warinakwi, eku dogorak o.
19 #
Kis. 18:2
Ar Akwila o, nen ar Priskila o, nen ir jemaat ir inuma komakwi mende nen, keyagi Kristen mende ake paga warkinaka o. Nen ir jemaat Asia paga mende nen, keyagi warkinaka ar o. 20Nir ninogari yoma ninom werek mende nen, etegerogon ar keyagwi warkinaka o.
Kinakla adeknggen mondok-mondok kunik dogolir, keyagi war-war eku dogoni o.
21An nen keyagi warkinaki mende ambi inom, diru paga mbalki yi o, An Paulus nen keyagwi warkinaki o.
22Ir akuni nen, Ar Tuhan akba kugwi dek kalok, madi ertanek o!
Maranatha, nir mende Tuhan wae, ibar eme o.
23Yogo, Ar Tuhan Yesus nen adeknggen mende kinoba buak o.
24Ar Kristus Yesus paga, niniliti kunik ambiar welagwi eti paga, keyagi warkinaki o.
An Paulus nen, Keyagi wakinaki o, waanelak.
Currently Selected:
1 KORINTUS 16: WLW
Highlight
Copy
Compare
Share
Want to have your highlights saved across all your devices? Sign up or sign in
