1 KORINTUS 9
9
Ir rasul eku dogorak inom nen ir inake ekbagu dogorak inom wene
1An nebe akuni wender kede pigalek mende dek a? Nen an nebe rasul dek a? Nen Ar Yesus nir mende Tuhan eti, an nil karigi dek a? Kir kinebe ar Tuhan ake an nen ndilogo binagu dek a? 2Ir akuni amberak nen an rasul yoniru ina'ir ar mende, kir kwak kinilu o. Nen kir kinebe Kristen werek yoma, an nen endak kinakigi paga, kir kinadigar nen an rasul o yiluk kinilu werek o!
3Ir akuni amberak nen, an neyabu erumo, an nen wene onggo yegerogo yoraurak O: 4An yabu erir nega neyalok, kir kinagi todek inom, kinagarom werago inom, an maknirubuk a? 5Ar Yesus aworomi ir rasul mende inom, nen ar Petrus inomar eku lagugwa kwak, an erir nega dogolir, naworomi inom nen kumi ap inakburi Kristen mende inom, ninom nugu dogorak ndak dekma a? 6Nir Barnabas nimbirak yi ar, nir niniluk dogu ake kwaktar lagik eku dogowak nen yiluk yoneragop a? 7Ir ap tentara etoma inadik nen inarom inagi onggo mbalogo ninggik, wim eri lagik eritagodek o! Ap yabu ekwa mende nen anggur ai yakbiluk, enggen yugu mbalogo ninggikdek dogir tagodek o! Ap domba bagarek dogir taga mende nen, domba idak amburu todogo ninggikdek dogir tagodek o!
8An wene yigi endi, nir yoma erir taga mende enda mban dek o. Alkitab mbalek paga inom, wene yi ake yirige werek o. 9#Ul. 25:4; 1Tim. 5:18Ap Musa ambuku mbalek paga nen yega dogolir, “Sapi nengandum enggen loruak nen yiluk, o abugur paga nen yidilogo lakbiluk ande kede warugup o,” yiluk yirige o. Yogo, endi Ar Allah nen sapi ake yirige a? 10Wene endi nir ninake yirige a? Ebebar o, wene endi nir ninake diru mbalogo birigemo o. Akuni nen Yabu eku dogolir,gandum enggen mbalku dogolir, yabu dado eti enggen mbalek mende, ugu ninggik-ninggik ar erir taga mende o. 11#Rm. 15:27Nir nen yabu eku dogolir, Ar Allah wene pano mende kir kinilitimo yakugumo o. Nir nen nir nau ake, ye mende nde mende agar paga mende kir nggino yokeramo, kir kinamende obogar dek arigin kogop a? 12Ir ap amberak, kir nen woknerawak o yiluk inakla mbektek kinoba welagwi kalok, Nir nen kwak ebiluk nggok togo nggino yokerakbuk a?
Ebe eta yurak mende, an nen nggino yokeragikdek agarik o. Ogwe wene Pano Wene Ar Kristus abok eti yorar laurak naru mbalaganem yiluk, ye mende nde mende etoma an ninggi paga nen ar kwatar taga o. 13#Ul. 18:1Ir yabu Ar Allah ai palekma etoma ekwi mende, inarom Ar Allah ai palekma etoma nen dago mende magiragu lagugwama o. Ir ap Ar Allah ai palekma tilimo etoma, nonggwa mende kurban ake warogo kali kunggu dogolir, ugu ir ninggik-ninggik ar eku lagugwama o. 14#Mat. 10:10; Luk. 10:7Eti ndak-ndak, Ar Tuhan nen ir akuni wene Pano Wene yorar nugwi mende eti, wene ir yir nugwi eti paga arar, ir iniluk dogu mende inake eku dogorak o.
15Wene etoma, nir ninake pano mende wundi waga mende, an nen kir nggino yokeragik dek o. Kir nen yogondak an wene mbalek etoma ndak-ndak ekdanubagik nen yiluk, surat endi ekimo dek o. An erom abu nen kamburak kwak eti pano ar o, an nen etegerogo nggino tombo pade yega nalok, wene Pano Wene nggenggen aru an na'ir o! 16Ar Allah wene yorar laurak paga, an nen wogor daktagin dek o. Ar Allah wene Pano Wene eti, kar nen yorar nega dogon o yiluk, noba birigemo ma, an nen wene pano wene eti yorar lagik dek kalok, an Ar Allah nen naru nobade o! 17Wene yorar lektaga yi, an nakla nen onggo wokniruwak nen yiluk, yi erir laga dogomo, an nen onggo kodaurak ndak mende, Ar Allah nen yabu yi erin o yiluk, noba birigemo erir laga agarik o. 18Eta kwak yumo, an yabu eki onggore? An yabu eki etoma onggo ebe yi o: An nen akuni yabu eki onggo woknirurak o yiluk, inoba anggin burak na'ir o. Wene Pano Wene yorar laurak eti, an noba birigemo ma, an neyabu o. An nen yabu onggo wokniru na'ir ar o.
19Yogondak ya an nebe akuni inanduan dek, nebe ap wender agarik o. Eta mende, akuni obogar Kristus akburi erogo bak nen yiluk, akuni obogar inanduan agagimo o. 20Ir Yahudi mende, Ar Kristus ake woginabik nen yiluk, nobabur ir Yahudi mende ndak-ndak eka agarik o. Nen ir akuni wene Musa awene kindirik paga yiduktek welagwi mende inake paga, an eka dogolir, wene Musa wene mende eti, nggidik nggedok eka agarik o. An nen etegerogo erumo, ir akuni obogar Ar Kristus ake woginabik nen yiluk erir taga o. 21Tuguluk ir akuni wene Musa diru mbalkige mende apma dogi tagodek mende, ir inebe Yahudi dek mende inake paga, an nobabur ir akuni Yahudi dek mende ndak-ndak ertari taga o. Etegerogo erumo, ir akuni etoma Ar Kristus mutok lagwi mende erogo baurak ma o. Nen eta an nen Ar Allah wene yirige mende tagalir taga dek ar o. An Kristus obarne paga erir nega lagagimo o. 22Ir akuni iniliti mbogor paga mende paga endago awan mende, ir iniliti kode erik nen yiluk ninom dogolir, an ir inobabur ndak-ndak aga lagagimo o.
23Etoma obogar wene Pano Wene Ar Allah nen yirige mende erir laganem, an inom ar nggok togo wokniruwak o, yiluk erir lek taga o. 24Nogari kir obogar kinilu, akuni nen onggo kodau paga inae mbal-mbal ambigar mbu lagatek mende, ar ambi ar onggo koda taga mende o. Eta ndak-ndak nogari kir, Ar Allah nen onggo bege mende eti koda lau paga, mondok mbu agan arar lagu dogoni o. 25Ir akuni nen onggo koda lau paga, yi inal kede warogo dogolir latihan ekwi o. Eta ekwi eti, ongga erogi ibar pidi aru mende mendago ake juara waganu paga ekwi o. Ogwe nir yi yogondak ya, mahkota iluk aitok mende mendago eti koda luwok yiluk, ye mende nde mende kwan biluk mbu agan lagu doguwok o. 26Etoma koda lau paga, an nen ugun ar mbu agan laga dek o. Ap inggi kepu tinju inari taga mende ndak-ndak, ar nen inarumo pik pak bikdalok nen inarir taga kwak, an nen ugunar inarir taga dek o. 27An nen akuni onggo koda luwok nen watni o, yiluk yorar taga mende, tuguluk kar kebe tekman yorniru nobade nen, an nen latihan mondok nggwirir nggwarir eritaga o.
Currently Selected:
1 KORINTUS 9: WLW
Highlight
Copy
Compare
Share
Want to have your highlights saved across all your devices? Sign up or sign in
