1 KORINTUS 10
10
Amudi kunu maga yoragage wene
1 #
Kel. 13:21-22, 14:22-29 Nawor nakbur wa! Kir nen nir ninombayelak o pagane etoma, ar Musa nen i Laut Merah odo beralogo wogorek wundi wagage, nen agagona apma tebelogo balok wogorek wundi wagage mende wene etoma kinakla eberek o. 2Ir nen ar Musa mutok nugu doguwak nen yiluk, i laut paga inom, agagona paga inom, ima wurinakige o. 3#Kel. 16:35Ir obogar erom manna mbogor paga nen wurera wagagemo narugwa ar o. 4#Kel. 17:6; Bil. 20:11Ir nen i rohani paga i kenago mende narugwa ar. Ir nen i nggir ado paga nen wundi waga kigik narugwa ar. Nen ar anggir ado rohani mende eti nen wogorek nega lagage o. Nggir ado obarne werek mende eti Ar Kristus arar o. 5#Bil. 14:29-30Eta etegerogo inom wogorek nega lagage mende, ir inobabur paga, Ar Allah nen akuni inebe nggok dogalek eti inadeknggen dalok dek. Ir inebe, o ye dekma nde dek lumo etoma inuwak nggililkugwa o.
6 #
Bil. 11:4
Etoma obogar eti, Nir nen ir maduk mende wadok yiluk ekunem warinakige etoma talek, nir ninilu atuk maduk mende agode yugu dogowak nen yiluk ekigemo o. 7#Kel. 32:6Ir amberak amudi kunggugwa kwak, amudi kunggunem yiluk, kurumbi ambi Alkitab mbalek paga yegerogo yirige, “Ir akuni yomanogo nen amudi kunik agarom dago ninggik, agi todek ninggik, endai wakik, endaga mbalkik, ekugwa o,” yiluk yirige. 8#Bil. 25:1-18Ir nen maduk ugunar erir nugwi agagemo, o ambi paga akuni inebe dua puluh tiga ribu paga warinakige kwak, nir nen maduk ugunar erir lagunem etegerogo ninarigin ma, maduk erir lagu dogorak dek o. 9#Bil. 21:5-6Ir akuni amberak pagane etoma Tuhan ane yega inaruk kulkikdek, ir maduk erir lugu nanggugwa, maga wado nen warinakige o. Ma nir nen Ar Tuhan ane yega uwak dagalurak dek o. 10#Bil. 16:41-49Ir amberak nen inane enok mbenok yogwi agagemo, ir malaikat ap inakwa nen warinakugwa o. Eti ndak-ndak, nir nen enok mbenok yugu dogorak maga o.
11Ir inoba wukige etoma akuni amberak etegerogo ekunem yiluk inake walkarigemo o. Ekugwa mende etoma, nir o ugu paga yoma dogolir ekunem yiluk, ninake diru warogo birugwama o.
12Ap ambi nen an niliti kode amburu mbalek, an arar agarik yega kalok, ar ebe nggar wukanem, ar ebe nen aruwam pik pak dirogo wartaga dogowak o! 13Nir ninauk mbalitaga eti, ir akuni amberak inauk mbalir taga ndak-ndak arar o. Nen Ar Allah eti Ar ane yirige kigik, adik pabuk togo eritagodek mende arar o. Ar Allah nen kir kinobarne dek kigik, nggok togo kinauk mbaluwak nen yiluk, dambe dinagagin dek o. Kir kinauk mbalkanem, Ar Allah nen kinobarne erogo nen tuan lamo nggwe inugur kinaga erigin o.
14Eti paga nen, nawor nakbur kinebe niliti kunikma, amudi kunggwi eti agode yugu dogoni o. 15An wene yorkeragi endi, kir ap kiniliti werek arma, kir nen wene endoma kinakla eberku dogoni o! 16#Mat. 26:26-28; Mrk. 14:22-24; Luk. 22:19-20Nir ninakla nen, an Yesus nimbirak wartagagumo yiluk, ninakla ebeku dogolir, i anggur amburu todek nuwok nen yiluk; Ae, Allah Nombae wa, yiluk yotuk nen nertagwi o. Nir nen Ar Kristus ninom kunik o yiluk, ninakla ebeku dogolir kalok, roti mbalogo nunggwi eritagwi o. 17Roti ebe eti ambi arar. Nir obok nen roti ambi eti mbalogo netagwi o. Nir ninebe dogalek ar mende, ebe ambi paga kunik o yiluk, ebeku dogolir nertagwi o.
18 #
Im. 7:6
Ir akuni Yahudi mende nen, eku lagugwa mende enda lakani nda. Ir akuni nen ake mbalek warogo kali kunir tagama etoma, ake mbalek mende nalok kalok, inakla nen an kali kunir tagama yoma nimbirak kunik mende arar o yiluk, andagu lagugwa o. 19An wene yigi eta edo ya nena paga? Amudi kunik inom, amudi kunik ake mbalek inom, etoma ebe enggen mende mondok dek arar o. 20#Ul. 32:17Ye mende nde mende bugwi etoma, yoma Ar Allah ake o yiluk bugwi dek ogwe, etoma monggar tekmana mende inake bugwi o. Nen an kir monggar maduk mende eti kinom kunu na'ir nen yorkeragi o. 21Kir nen Ar Tuhan agirakla agi todek ninggik, amudi kunik agirakla agi todek ninggik, erurak mondok maga o. Kir nen Ar Tuhan ao ndalek paga, agarom dago ninggik, amudi kunik awo ndalek paga agarom dago ninggik, etegerogo erurak maga o. 22#Ul. 32:21Nen nir nen, Ar Tuhan anini elagaburak wadok a? Nen nir kwak ninobarne ambik, nen Ar Tuhan kwak obarne dek, yiluk kinakla andar tagwi a?
23 #
1Kor. 6:12
Akuni nen yugu dogolir: “Nir ninakla wadok mutok erir lagu dogorak eti pano o,” yiluk yirugwa. Wene eti ebebar o! Ogwe, nir ninakla wadok andagwi mende obogar etoma pano dek o. “Nir nen eru andago mende obogar erir lagu dogorak pano ar o.” Ogwe nir nen ninakla wadok andagwi mende etoma nen, pano erogo binanurak mondok ndak dek arar o. 24Kir kinadik kinake mban erir lagu dogogup o. Kir nen ir akuni nin mende inake inom ar erir lagu dogoni o.
25Kir kinakla paga kiniliti anggin eti kigik ar, nena uno bega yiluk ibibir mondok mbenaru eti damber kano o. Kir nen nena-nena uno pasar onggo kunggwi mende eti ugun ar naurak o. 26#Mzm. 24:1Wene eta Alkitab mbalek paga yirige paga nen, “Agar yoma inom, ye mende nde mende agar paga werek mende yoma inom, obogar Ar Allah amende o,” yiluk yirige o.
27Ap ambi Kristen dek mende, ar nen an numa erom nuwok nen yiluk kinayonggo bumo, dago yoma nenggerogo mende yiluk elokte mbenarkikdek, kiniliti anggin dek, dogolir ugun ar naurak o. 28Kir dago nuwok nen yiluk ekunem, ar ap ambi nen, “Wadigi yi, dago yoma amudi kunik ake mbalek mende o,” yiluk yega kalok, ar ebe ake paga inom, iliti anggin kege paga inom, kir nen dago naurak mondok dek o. 29Wene yigi enda, kar kiliti anggin paga dek mende, ar kogarak iliti anggin nen yege eti paga, kar dago nagup yigi o.
Ir amberak nen kinok yugun a, “We, nenaluk an erir laurak mende, ir akuni adik inakla andau paga kudi warogo banurak ndak a? 30An nagarom nak nen yiluk, Ar Allah wornegen wa yiluk yotuk namo, nenaluk ir akuni amberak nen kar maduk eken yiluk yokirurak o?”
31Kar nen ye eru nde eru eka dogolir inom, kagi kagarom nagaluk inom, Ar Allah endaga wogokdik nen yiluk mban erir laga dogono o. 32Kar kebe erir laga paga, akuni maduk ekwi, Ar Allah akburi mende amberak Yahudi mende inom, nen amberak Yahudi dek mende inom, ir obogar nggar wukunem, kar nen dirogon mbenak biluk nen erir laga dogorak o. 33An erir lektaga ndak-ndak erir lagu dogoni o. An nen akuni obogar iniliti adeknggen aruwak nen yiluk erir laga, ir akuni obogar Ar Allah nen ndilinabuwak nen yiluk andalok erir lektaga o. An niliti wene amberak oba lambologo ake paga nen erir laga dek o.
Currently Selected:
1 KORINTUS 10: WLW
Highlight
Copy
Compare
Share
Want to have your highlights saved across all your devices? Sign up or sign in
