1 KORINTUS 8
8
Amudi kunik ake begetek mende nunggwi wene
1Yogondak amudi kunik eti ake mbalek nonggwa amende, persembahan begetek mende nunggwi ake paga yegerogon, ir akuni nen wene yirugwa yi ebebar o, “Nir obogar ninilu agagemo o,” yiluk yugwi. Ogwe, ye wene nde wene inilu paga woguk datugwi o, nen akuni inakba ekwi kalok perak, akuni inebe inadik mor-mor erogo bartagwi o. 2Akuni nen nir arar ninilu aga yugwi mende, ir nen wene inilu aru ebe yegerogo yiluk, ir obogar dirogon inonggokdek dogolir yirtagwi o. 3Ir akuni nen Ar Allah iniliti kunik mondok mende etoma, Ar Allah nen il wogorek nega agarik o.
4Wene ye mende nde mende amudi kunik#8:4: Amudi kunik eti: Eti ye mende nde mende amudi kunik eti endaga arar o. Nen indonesia wene paga ilah/dewa. ake persembahan begetek mende nunggwi eti, amudi kunik ebe eti dek o. Nen wedek agur walkigik erogo begetek mende ninil ketagwi o. Nir ninilu eti, Ar Allah ebe eti ambi ar o; ir akuni nen yi allah o yiluk yugwi etoma dek mende yirtagwi o. 5Ir akuni nen nir mende tuhan#8:5: Tuhan: Tuhan yiluk huruf edo yi buruf bugudak paga diru mbalek kalok, eti Tuhan ar Abraham inom, Isak inom, nen Yakub inom endaga mbalku lagugwa nen yogondak ir Israel mende endaga mbalkwi eti yiluk dek o. Eti ir akuni nen yigom mende a, o mende a, nena-nena etoma mende obogar agubak kigirogo biluk nen, yi an mende tuhan o yiluk yugwi eti endaga o. eti, inebe mbogor paga nggwe, nen agar paga nggwe yoma ambigar werek yugwi o. 6Nen nir mende Ar Allah ebe eti ambiar o, Ninombae Ar Allah eti walkarige mende, Ar arar yiluk, yir tagwi o. Nir yoma ar adik ake agorik o. Tuhan eti ambiar, nen ebe eti Ar Yesus Kristus arar o. Ar paga nen, ye mende nde mende yoma kenam erogo birige, nen nir Ar paga niniluk werek o.
7Ebe eta etegerogo mende, ir akuni yoma wene yi mondok inonggokdek o. Kir yogondak ya werek yoma, amberak etegerogo kinonggokdek dogolir, amudi kunik apma welagagupmo o. Etoma dogolir, kir nen ar amudi kunik ake bugwi eku lagagupmo o. Yogondak ya ir akuni amberak nen amudi kunik ake begetek inil kalok, yogo yoma amudi kunik agarom o yiluk yitagwi o. Ir iniliti awan kode agaik dek mende nen, ake mbalek etoma nalok nen, eku, yogo an maduk eki o yiluk yitagwi o. 8Ebebar kwak eti, nonggwa mende etoma adigar nen nir Ar Allah ninom korok erogo binanigin dek. Nir nen andugungge bu mende etoma namo, ninamende ambik arigin mondok dek o. Nen andugungge etoma ninggidek dambe kamo, ninamende dek arigin mondok dek ar o.
9Ogwe kir nen pik pak dikburak o! Ir akuni amberak iniliti awan kode agik dek mende eti, nggar wukunem kinil mbenak-mbenak yiluk nen, erir nugu dogorak o. 10Wene eta an nakla andagi mende yegerogo: kar ambi kiliti kodema, maduk amudi kunik ai palekma ari unggiluk, erom maduk amudi kunik ake mbalek mende nengganem, kogarak iliti awan aknggurok mende nen, il keyalok, ar iliti anggin dek atuk, ar nen amudi kunik ake mbalek mende ugun ar ner nega dogogin o. 11Ar kogarak iliti awan mende eti ake paga, inom ar, Ar Yesus wartagagerek ogwe, kar erigin eti paga, kogarak iliti awan mende eti nggar wurabigin o. 12Kar niliti kodema paga ma yiluk, panggok diluk erir nega paga, kogari Kristen mende amberak inom nggar wurinabir laga kalok, kar Kristus oba maduk erogo birtagan o. 13Etegerogo ugun ner nega paga, ninogari ir nggar wurinaburak ma, an nen amudi kunik ake bu mende,naurak nengga dogogin mondok dek o.
Currently Selected:
1 KORINTUS 8: WLW
Highlight
Copy
Compare
Share
Want to have your highlights saved across all your devices? Sign up or sign in
