1 KORINTUS 7
7
Kwe yikwi wene
1Yogondak kir nen, an surat paga kinok woknagop mende ernaga onggo yokerak o. Ap ambi nen kwe waganu a'ir kalok, eti pano ar o. 2Ogwe, ir inoba aganggen nen, wene maduk eru dek mende ekunem yiluk, kwe nen agun adigar kodega, ap nen agwe adigar kodega, eku dogorak kwak eti pano ar o. 3Ma ar ap nen kalok, ar agwe ake paga, wene mbalek ndak-ndak mondok dirogon eka, nen ar kwe nen, ar agun ake paga kalok, wene mbalek ndak-ndak dirogon eka, nen ir inadiktak dombok nen, ir eku dogorak wene mbalek ndak-ndak arar eku dogorak o. 4Inagwe nen ar ebe eti ar adik amende dek o. Ar ebe eti ar agun amende o. Nen Ar agun ar ebe eti, ar adik amende dek o, ar ebe eti ar agwe amende o. 5Ir agun agwe imbirak nen, inadik pendorek dogorak mondok dek o. Ir imbirak iniliti inane ambi dambulogo nen, o ambi paga tamban inadik mumu eru ake nen kalok, inadik agwi, tuguluk wene yu ndak-ndak arar kalok, imbirak ibar dambul lagwi, eku dogorak o. Dek kalok, kir kinebe kinobarne dek ma, kinakla aganggen ekinaka paga, ar roh maduk mende eti akla wadok mutok erugun o.
6An wene yigi enda, kir eruwak nen yiluk, nane obarne paga yorkeragi dek ogwe, wene kinaruk waki o. 7An nakla nen, ir ap yoma an werek ndak-ndak dogole yiluk andar taga o. An ndak-ndak kwe waganggik dek dogorak eti, Ar Allah nen iniliti kwe waganu ina'ir erogo bamo perak ndak o. Ar ambi amende karunia #7:7: Karunia: Eti Indonesia wene paga ogwe, Walak wene paga yumo eti, Ar Allah nen akuni inobabur adik denek dombok eku dogu wogorage mende wene. yi, nen ar ambi amende karunia eti, adik ndak dombok wogoragage o.
8Kir ap doni inom, kumi toge inom, kir nen an agarik ndak-ndak dogobagik nen yiluk, kir yorkeragi o. 9Kir kinakla aganggen tebelurak ndakbuk kalok, kir ap nen kwe kodagwi, kar kwe nen ap kodega, eku dogogun kalok, kir kiniliti paga aganggen penggek yega dogogin dek o. 10#Mat. 5:32, 19:9; Mrk. 10:11-12; Luk. 16:18Ir akuni agun agwe waganek mende, kir eku dogorak mende, an nen wene yi kinoba bik o: (Wene yi An nen kinoba bigin dek o, ogwe Ar Tuhan nen o.) Kwe ambi ap waganek mende nen, ar agun dambe kalok wundurak mondok maga o. 11Ogwe, ar nen ap waganek mende na'ir yiluk wundiluk kalok, ap waganggidek wedek arar dogorak o. Wedek dogu ndakbuk kalok, agun edo eti oba iyok paga unggwi laurak o. Nen kir ap nen, kwe na'ir o yiluk, kagwe waganek mende enogo monogo dambe kaurak mondok maga o.
12Wene ambi yi Ar Tuhan nen dek o, ogwe an nen yokerar taga o. Ap ambi Kristen mende nen, kwe Ar Kristus oba ebebar yiluk andagik dek mende kodalokma, kwe eti nen an nimbirak mondok dogogun yega kalok, ap eti nen, kwe eti monogo mbo dambe kaurak dek o. 13Nen ambi, ar kwe Kristen mende nen, ap Ar Kristus ebebar o yiluk ane waganggidek mende kodalokma, ap Ar Kristus ane waganggidek mende eti nen, an nagwe Kristen mende yi nimbirak dogu kodagin yega kalok, kwe Kristen mende nen ap eti na'ir o yiluk monogo dambe kaurak maga o. 14Kwe Ar Allah wene ebebar o yiluk waganggige paga, agun Ar Allah wene onggokdek mende enogo, ebe wolok Ar Allah akbur erogo bigin o. 15Eta ndak-ndak ekikdek kalok, ir inakburi elege etoma, akuni Ar Allah wene inonggodek mende inagwi inakburi etarugun o. 16Kir kumi Kristen mende yi, kir kinaguni Ar Allah ane inonggodek mende waganek kinom dogolir, an ya nenggerogo eka nalok, an nagun agap endarigin a dek a, eti kinilu dogolir nen yitagwi a? Eta ndak-ndak kir ap Kristen mende, kir kinakburi kumi Kristus wene inonggok dek mende waganek kinom dogolir, an nenggerogo eka nalok nagwe agap endarigin dek yiluk kinilu dogolir nen yitagwi a?
Ar Tuhan nen nir nenggerogo werekma ninayonggo birige eta ndak-ndak dogorak wene
17Kir kinadik ndak dombok nen, Ar Tuhan nen an nenggerogo werekma nayonggo birigemo, Ar Allah ane eti waganggigi yiluk kinilu atuk, kinebe eta welagagup ndak-ndak dogorak mende eku dogoni o. An nen ir jemaat o ya nda etoma, kinebe eti ndak-ndak dogorak yorar taga mendema, kir yorkeragi o. 18Wene ebe ya ndak-ndak, ap ambi sunat erek kigik, Ar Allah nen ayonggo birigemo kalok, ar nen an sunat erek yurak dek o. Nen ar ap ambi sunat ekikdek kigik ayonggo birigemo kalok, ar nen an sunat ernaburak o yiluk yurak dek o. 19Ir akuni sunat erek inom, sunat erekdek inom, eti paga wene mondok dek o. Wene etoma, we eragalu mende o. Wene unggune mende kwak eti, Ar Allah ane yirige mende erir lagu dogorak mende eti arar o. 20Kir kinadik ndak dombok nen an ya yegerogo werekma, Ar Allah nen nayonggo birigemo, an ya yegerogo ar dogik yiluk dogu eta ar o. 21Kar ambi inanduan werekma kayonggo birigemo kalok, an wender dogik yiluk tuan kwarir erugup o. Kombae nen yogo kar we wender erogo bagagi yega kalok, wa yiluk kodano o. 22Ap ambi inanduan dogolir Tuhan ane waganggigemo kalok, ar ebe Tuhan amende wender werek o. Ap ambi we wender dogolir Kristus oba eberogo waganggigemo kalok, ar ebe Kristus anduan agarik o. 23Ar Allah nen kir kinebe kinonggo obok mbalkigerekma, kir nen akuni inanduan etarik yiluk lagup o. 24Kir kinebe nenggerogo dogolir nen, Ar Tuhan ane waganggugup, kir kinebe eta welagagup ndak-ndak ar, Ar Tuhan kinom kunik dogoni o.
Ap kwe waganggikdek mende inom, kumi toge inom, eku dogorak yirige wene
25Yogondak ap kwe kodagikdek mende inake ambi yokerak o. Ir dogorak inake Ar Tuhan nen yegerogo dogowak o yiluk, yonigik dek mende, Ar Tuhan nen an eka dogowak nen yiluk menogo banggige paga, ir dogorak mende ambi yokerak o.
26O yogondak obabur adik-adik erir waga dogolir, akuni ninoba anggin panggin ambigar etarir waganem, ninebe ya agorik ndak-ndak ar dogorak o. 27Yogondak ya, ar kagwe waganek kimbirak werek kalok, an kwe yi dambe kak yiluk weralugup o. Yogondak ya, kar ambi kwe waganggikdek doni werekma kalok, an kwe ambi waganik o yiluk kwarugup o. 28Nen kar kwe waganek werekma kalok, eti maduk dek o. Eti ndak-ndak, ar kodak ambi nen ap kodega kalok, ar nen maduk ekidek o. Ir inebe pano mende inoba anggin durik mago arir taga o. Kir nen anggin kinoba ambik etaganem wokkugu dogoni o.
29Nawor nakbur wae: Yogondak nir ninake paga, o telek idu paga dogorak dek ar agama, kir dogorak mende yegerogo dogorak o: kir kwe waganek mende nen, kwe waganek dek talek dogoni o. 30Ir akuni de yugwi mende, ir nen iniliti wartagikdek talek dogorak o, nen ir enda kanggwi mende eti, iniliti adeknggen dek talek dogorak o, nen onggo kuniluk mende kalok, onggo kunggik dek talek dogoni o. 31Agar inom, ye mende nde mende yoma inom, dek arigin ararma, akuni ye mende nde mende agar paga mende ambik kuwak ekwi, onggo waganggwi ekwi mende, etoma erir tagodek talek dogoni o.
32An nen kir kinoba anggin aganem yiluk, wene yokerak o. Ap doni nen, Ar Tuhan iliti adeknggen aruwak nen yiluk, Ar Tuhan wene yirige mende kwak, oba eberek dogorak o. 33Ap kwe waganek mende nen, an nagwe yi nena paga iliti adeknggen erik yiluk; 34erir laga dogolir, yi kwa erik a, yi kwak erik a, yiluk iliti alokbak mbere dogir taga mende o. Kwe toge mende nen, komadigi nen, ir inebe obogar Ar Tuhan ake biluk, iniliti Ar Tuhan nen nena erigin yirige mende mban eberek dogir tagwi o. Nenaluk, ar nen wadok eti, inggi iyok ebe etoma obogar, Ar Allah amende arar o. Kwe agun waganek mende nen, an nenggerogo erumo nagun iliti adeknggen noba kunik dogogin yiluk, ye wene agar paga mende mban eberir lektaga mende o.
35Wene an diru mbalki yoma obogar, kir kinadik pano erkinabu ake paga mban eki o, nen kir yi ekwi eli ekwi etoma non mbalogo yiluk dek o. Nen ar wadok kwak eti kir nen wene ebebar mende, nen pano mende eti mban eku dogolir, kiniliti akpir ar waganogo, Ar Tuhan oba bugu dogobagik nen yiluk o.
36Wedak ambi nen kodak yi an nimbirak wene warek ninagik, ebe arar kedau aru aga yi, an arar kodak o yega kalok, eti pano eru il lak kalok nen pano yege o, ma ar maduk erigin dek o. 37Ar wedak ambi nen, an kodak yi nimbirak wene warek welago mende, yogondak an waganu na'ir o yiluk, dambe kega kalok, eti pano ar o. 38Wene ebe pano mende yegerogo, kwe kodamo pano erigin o, nen ap ambi nen kwe kodagidek kalok, ar nen ebiluk pano mondok arar erigin o.
39Ir kumi inaguni waganek mende etoma, inaguni iniluk dagik, inaguni inom kede werek arar o. Ir kumi eti inaguni arar kambumo kalok, ir nen ap Kristen mende kalok, ir iniliti wadok ndak-ndak kodaurak o. 40Kwe enogo agun kambumo, an ap waganu na'ir o, an wedek puk dogogin yega kalok, ar nen pano mondok arar erigin o. An wene yigi enda, Ar Roh Allah nen tugunogo yonegemo yorkeragi o.
Currently Selected:
1 KORINTUS 7: WLW
Highlight
Copy
Compare
Share
Want to have your highlights saved across all your devices? Sign up or sign in
