1 KORINTUS 6
6
Inogariyak wogorek pengadilan lagwi wene
1Kir endoma kinogari kinom wene agarak kundiluk, nenaluk ir hakim Ar Allah awene inunggukdek mende nen, mor ekinabuwak nen yiluk, ir inoba lektagwi? Nenaluk kir kinawene eti, ir ap Ar Allah akburi mende nen mor ekinabuwak nen yiluk yoragik dek erir tagwi? 2Ir akuni Ar Allah akburi nen, ir akuni o yoma werek mende uwak deninaburak kinonggokdekma eritagwi a? Kir nen akuni o yoma werek mende inuwak denurak, kir kininggimo werek kalok, wene we aredo warek mende etoma, kir moreru ndak dek kalok eritagwi a? 3Kir nen yabunggane etoma, ir malaikat mende inawene, kir nen mbalugun kinonggokdekma eritagwi a? Wene nir ya dogolir ekwi mende, morerurak eti nggok anggin werek dek o! 4Ebe eta ma, wene etegerogo mende kinoba aga kalok, kir wene eti wolok, ir akuni jemaat dek mende inoba wolok lagu dogogun a dek a? 5Wene inenggadi wuwarek arar o! Ma kir werekma endoma, kinogari ir iniliti kode mende nen, kinogariyak ir Kristen mende inawene agortatuk kalok, ir inawene mbalurak ndagar o. 6Ogwe etarir taga kwak abel dagalek arar o, ar akuni ambi Kristen mende nen, akuni Kristen mende inom inawene mbalu paga, ir inogari akuni Kristen mende wogorek, ir akuni Kristen dek mende inoba lektagwi o!
7Kir akuni Kristen mende kinawene wolok, ir akuni Kristen dek mende inoba wene mbali lektagwi eti mondok maga o; Wene kir-kir ar aredo warir tagwi eti, wene maduk ebe eti arar o. Ma tugi erogo binagu kalok inom, nen wene nggodo mbalkerau kalok inom, eti kinobabur paga arar o. 8Ogwe kir nen ir akuni amberak inawene momor dik togon morerkikdek, maduk mbalir bartagwi o. Kir kinengga werek nenar ir akuni amberak tugi erogo bartagwi o. Nen kir kinogari ir kinom ebebar andarugup mende mondok kigik ar erogo bartagwi o! 9Ir akuni Ar Allah iliti mirik erir tagodek mende eti, Ar Allah akburi uma mende etarugun dek eti, kir kinilu a dek a? Wene yi panorogo kinilu dogoni o! Ir akuni lungga wadi ekwa mende inom, kumi ap inimodo kagar-kagar ekwa mende inom, kuguwak amudi kunggwa mende inom, ap-ap kumi-kumi kagar-kagar yogwa mende inom, 10inil mudunggar mende inom, an-an wadok nggirik mende inom, pemabuk nonggwa mende inom, akuni inabok mbale mende inom, akuni inadigak nonggwa mende#6:10: Akuni inadigak nonggwa mende eti: Wene oba lirogo negen ogwe indonesia wene paga itu peras, memeras etegerogon. inom, ir akuni etegerogo mende, Ar Allah akburi uma mende etarugun mondok dek o. 11Kir amberak alebar, kinoba eta ndak-ndak welagagup mende, yogondak maduk kinoba mbiyalogo birigemo, kinoba pano werek o. Kir nir Ar Tuhan Yesus Kristus oba ebebar eberogo waganggugup paga, Ar Roh Allah obarne paga, Ar Allah kinom pano dambul kinakigemo, Ar Allah akburi uma mende, adigar pulogo binagarige o.
Kinebe paga Ar Allah wogok dugi dogoni yoragage wene
12 #
1Kor. 10:23
Ir akuni amberak nen, nir inakla wadok mutok erir lagu dogorak pano andagwi o. Ogwe an nen, ye ekik nde ekik ugun ar erir laurak pano mende, an ye mende nde mende nakla wadok mende nen apma tebelogo banu mondok na'ir o! 13Ir akuni amberak nen yugu dogolir, naungge etoma ninelabur ake o. Ninelabur eti naungge akdikmo o, yiluk yugwi mende, Ar Allah nen naungge inom, ninelabur inom, imbirak dek erogo bigin o. Akuni ninebe eti maduk ugun-ugun ar eku dogu ake dek o, ogwe nir ninebe ninagakdo paga nen eti, Ar Tuhan eyabu eku dogorak ake o. Nen Tuhan nen ninebe ninagakdo eti pano dogowak nen yiluk aruwam dogogin o. 14Ar Allah nen, Ar Tuhan Yesus wartagagemo, Ar ebe obogar iluk erogo birige o. Nir kambumo etegerogon ar, Ar Allah nen nir ninebe obogar niniluk erdinanigin o.
15Yogo nogari o, kir kinadik kinebe obogar eti, Ar Kristus mende inggi iyok arar agarik o. An Ar Kristus ebe inggi iyok ambi waganogo, kwe ndononggwa mende imbirak dambulurak kalok pano a? Eta mondok ndak dek arar o! 16#Kej. 2:24Nen wene yi ebe dirogon kinilu arni o. Ap ambi kwe ndononggwa mende imbirak dambulkwi kalok, ir imbirak inebe ambi ar arugun o! Nenaluk Alkitab mbalek paga nen yega dogolir, “Ir imbirak inebe ambi ar arugun o,” yiluk yirige o. 17Nen ir akuni nen Ar Tuhan inom ambi ar kunggwi kalok, Tuhan iliti inom, akuni eti iliti inom, ambiar kunarugun o.
18Wadi ugunar erurak mende eti agode yugu dogoni o. Maduk amberak erir lertagwi etoma, abel tekman paga nen erirtagwi mende, wadi ugunar ekwi eti ninebe paga nen erir taga mende o. 19#1Kor. 3:16; 2Kor. 6:16Kir kinebe endoma, kir mende dek o. Kir kinebe endoma, Ar Allah amende o. Nen Ar Roh Allah eti kir kinilitimo dogirtaga o. Etiar ma, kir nen nir ninebe yi, Ar Allah ai palek o yiluk kinilu dogoni o. 20Ar Allah nen, kir kinebe obogar, An namende o yiluk, kinonggo mondok nggaruk togo arar mbalkigemo o. Etama, Kir kinebe paga nen, Ar Allah endaga woguk dugwi dogoni o.
Currently Selected:
1 KORINTUS 6: WLW
Highlight
Copy
Compare
Share
Want to have your highlights saved across all your devices? Sign up or sign in
