1 KORINTUS 5
5
Ir jemaat maduk ekunem mor erogo barige wene
1 #
Ul. 22:30
Kir endoma kwe kodak maduk ugun-ugun ar erir lagwi mende kinabok, ir akuni nen an paganear yorniri wagu dogolir: ar ambi nen ombae agwe yabongga mende kagaka, etegerogon erirtagwi yonega o. Ma kir ir akuni tekman mende, Ar Tuhan ane inonggok dek mende nen eru talek, kir nen ar erir tagwi o! 2Etegeron ar ogwe, kir nen wogokbatar mende agopma o. Ebebar mende kwak eti, kir kinakla maduk atuk dogolir, kinogarak maduk eke mende eti, kinakla nen wuldurak mende o. 3An nebe nagakdo paga, kir ninom endoma dek mende, nebe rohani paga eti nebe kinom endoma dogolir, akuni maduk ugun-ugun ar etegerogo ekwi dalok, ir eti hukuman inoba wuraku dogoni o. 4Nen kir komakwi dogolir kalok, Ar Tuhan Yesus obarne paga, an nebe kinom werek arar yiluk kinakla andagu dogoni o. 5Akuni etegerogo erir taga mende etoma, Ar Tuhan Yesus endaga paga ar Iblis inggimo arar bawok o. Etegerogon erumo, inebe inagakdo dek arugun ogwe nen ir iniliti Ar Tuhan yabongga waga dogolir ndilinabigin o.
6 #
Gal. 5:9
Kir nen wogor dartau eti ndak dek kigik andar tagwi o. Wene oba lirogo yirige yi kir obok kinilu o, “ragi bugudak mende ar ogwe, roti adonan erek eti pirir taga mende o.” 7#Kel. 12:5 Ragi maduk mende eti, maduk ekinaburak mende kinakla werek ma, kenogo mbo wulinaku dogoni o. Kir kinebe roti ngger mende ragi maduk mende oba bigikdek mende dogobagik nen yiluk, eku dogoni o. Nir maduk ekwi dek pano dogowak nen yiluk, Ar Kristus nir ninake nduma arar wartagage o. 8#Kel. 13:7; Ul. 16:3Eti paga, yogondak nir roti ragi bigikdek mende dago nuwok nen yiluk, kinayonggo bigi o. Dago roti ragi bigikdek dago yi, roti wene oba dek pano mende dago inom, nen Ar Allah iliti adeknggen mende dago o. Nir pesta paskah eti dago nuwok nen yiluk kalok, roti ragi maduk o pagane mende, yiduk maduk oba durik mende nunggu dogorak mondok dek o.
9Kir nen ir akuni wadi ugun ar erir taga mende, ir kinom lambolek ambimo dogogup o yiluk, surat alep ar erogo kinoba lakbi wagagi mende eti kir kinilu werek o. 10Wene an nakla andalok yigi eti, ir akuni kwe kodak ugun-ugun ekwa mende inom, wadok-wadok nggirik mende inom, inenggal nggirik mende inom, amudi kunik amudi kunggwa mende inom, nen ir akuni Ar Allah mondok inunggukdek mende eti inom, ir inake yiluk nakla andalok yigi, dek o. Nenaluk kir akuni yoma nen, ir inagode yumo kalok, kir o agar paga yoma dogorak dek, damber kalok wundurak arar o. 11An wene yigi enda ebe yegerogo, ir akuni nen nir ninebe Kristen mende o, yiluk yugwi mende, ir nen kwe kodak ugun-ugun inom maduk ekwi, nen ir wadok nggirik welagwi, nen amudi kunik amudi kunggwi, i mabuk nonggwa mende inom, Ilimodo nggirik mende inom, doma mende, amudi kunggwa mende, inabok mbale mende, inilti mbale mende, inilmudu nggar mende, kinom ambimo welagwi, kinom ambimo kortatuk erom nunggwi, eku dogogup o! yiluk yigi o.
12Ir akuni Kristen dek mende etoma, ir inuwak dolinaburak eti an naredongge negen dek o? Ar Allah adigar nen, ir inuwak doligin o? 13#Ul. 13:5, 17:7Nen ir jemaat kir mende inake paga, ir maduk ekwi kalok, kir nen arar inuwak deninaburak yirige werek a dek a. Alkitab mbalek paga wene yi o, “Akuni maduk ekwi dalok, mugogo wulinaku dogono o!” yiluk yirige o.
Currently Selected:
1 KORINTUS 5: WLW
Highlight
Copy
Compare
Share
Want to have your highlights saved across all your devices? Sign up or sign in
