1 KORINTUS 4
4
Ar Kristus mende rasul-rasul menagugwa wene
1Nir yi Ar Kristus eyabu mende, Ar Allah agimago wene akuni o yoma, yorar nugu dogowak nen yiluk, inayonggo birigemo o yiluk, kinakla andagu dogoni o. 2Ibibir mondok eti, yabu eru yoragi mende ndak-ndak tebe yiluk erugun a dek a yiluk, il woknerek lektaga o. 3An nakla nen, kir nen inom nen akuni tani kwak nen inom, an noba iniliti pirik erurak dek o, nen an nen an nake paga niliti ebertaurak mende eti, wene eti paga etaru ambi mondok dek arar o. 4An nakla nen, an maduk ekigi ambi yi o yiluk andaga dek o. Ogwe wene eta paga, an ugu maduk eritagodek yiluk dek o. Ebebar mende eti, Ar Tuhan nen kwak an maduk pano yorniru kwak eti amor o. 5Eti paga nen, nir ninuwak deninaburak, o auwan ari wagik dek kigik, kir nen ibar-ibar akuni maduk pano yurak dek o. Kir nen Ar Tuhan waganem aruwam torek dogoni o. Ar nen wene kimago mende obogar telekma erogo bigin o. Nen Ar nen ir akuni wene inakla wadok abura kimago mende telekma erogo begin ar o. O eta paga, Ar Allah nen ir akuni wogokdau mende wogokdawak nen yiluk wogoragin o.
6Yogo nawor nakbur wae! Kir kinake kinebe pano dogu paga wene yi, an Apolos nimbirak ninoba lirogo il walkigi o. Wene walkigik endi paga, kir nen wene yurak yi o, “Wene mbalek eti ar pago dogoni o,” yiluk yirugwa yi waganini o. Kir nen wene eti kinilu arumo, kir ar ambi tebe digik, nen ar ambi yade digik erugun dek o. 7Kar ta nen kendaga mbogor erogo bagagemo erir lek tagan o? Ye mende nde mende ambigar, Ar Allah nen wokigik dekma yirtagan a? Kir kininggimo onde agagup pago werek etoma, kir kininggi paga taburogo kodagotip nen, an kar yiluk woguk datugwi agokip a? 8Yogo ebe mende ya, kir nen ye wadok nde wado kwak obok dek arar o! Kir ap kininggi werek arar agopma o! Nen kir obok raja agopma o! Nen nir kwak dek o. Ebebar pano mondok eti, kir obogar raja etarurak o. Nen etegerogo etarumo, nir kir ninom dambulik dogolir, pago dogorak ma o. 9An nen lak kigi mende, yegerogo, nir akburi rasul-rasul yi, Ar Allah nen akuni monek mende talek, anggin durik mago ninoba biluk, ninebe ninakwi dagik, akuni yoma inom, nen malaikat mende inom, nen wur ninalok ndi yugwi, ninendai waganggwi, erir tagwi o. 10Nir Ar Kristus ake paga, nir ap niniliti dek mende o, nen kir kwak akuni kinakla nggagalek Kristen mende o. Nir ninobarne dek mende o, kir kwak kinobarne werek mende o! Nir yi monek ninagik, kir kwak unggune wogokdinagagwi mende o! 11Nir yogondak ya agorik mende yegerogo, ninagarom abu, ninagi abu, niniyom ambiar yugu, akuni nen mep dagik dagok erogo binanunggwi, ninai domborogo dek, ya agik erir nugwi, 12#Kis. 18:3nen nir nena nugun erek d kwatar nugwi, nir alem binanggwi kalok, nir nen onggo ninadenggen wogoragi, ndugi ninakwi dagik ninonggo kodagidek tebe yiluk welagwi o; 13ir akuni nen nir maduk erogo binanunggwi dalok, nir nen onggo pano ekdagwi. Nir o dunia yoma omaduk mende talek erogo binanunggwi, nen o yogondak kudi ya, nir o agar paga yoma al ugu ndak-ndak erogo binanunggwi o.
14An surat kinoba lakbi wagi endi, kir kinenggadi warik nen yiluk dek o, arte kir an nakburi ararma, yegerogo inaruk warik o yiluk, erogo lakbi wagi endi o. 15Kir kinebe Kristen paga, ap kir kinangguru mende inebe sepuluh ribu ndak-ndak werek o. Nen Ar Kristus kinom ambiar agagup eti, an nen wene Pano Wene yokeragagi pagama, kir kinombae eti an arar o. 16#1Kor. 11:1; Flp. 3:17Eta ebebarma, kir an erir taga kwak eku dogobagik nen yiluk, nggino yorkeragi o. 17Yogondak kir kinebe mor ekinabuwak nen yiluk, elege Timotius endi kinoba lakbi wagi o. Ar ebe an nakbur niliti kunik mende o, Nen Ar Kristus ane pano waganggige mendema, ar yabu erurak ndak arar o. Nen ar nen an kristus ane wokbiluk, eka lagagi mende yokeraga, an nen akuni jemaat dombok yorar nega lagagi mende yokeraga, eka dogogin o.
18Eta yega nalok kir amberak nen, yogo ar ebe warigin dek yiluk, wogor daktagup o. 19Ogwe, Ar Tuhan nen kar inoba lan yonega kalok, an muk kinoba warigin arar o. An watuk nen kalok, ir ap inane, an kar yugwi mende eti, ir inane naruk kolalka, iniliti paga woguk datugwi mende nil daga, erik nen yiluk warigin o. 20Ar Allah uwagam ari unggurak eti, akuni inane obarne paga dek o, arte ir akuni nen wene yirige mende ebebar diktogon ekwi paga, Ar uwagam ari unggugun o. 21Yogondak kir wadok mende mirtani o! An watuk nen nane kode paga emekerau wadok a, kinakba paga erok yanggoro emekerau wadok a?
Currently Selected:
1 KORINTUS 4: WLW
Highlight
Copy
Compare
Share
Want to have your highlights saved across all your devices? Sign up or sign in
