1 KORINTUS 3
3
Ar Allah eyabu mende nen eku dogorak wene
1Nogari o, an nen kir Ar Roh Allah kinom kunik werek mende yokerau andalok dek mende, an nen kir akuni agar paga mende wadok nen erir taga mende ndak-ndak negen yokerau nakla andagi o. Wene ya ebe eti, kir nen Ar Kristus ane waganggugup paga, kiniliti kode agikdek elege ngger endago kwak werek o. 2#Ibr. 5:12-13Alep eta paga, an nen kir erom akuni inanggok nertaga mende wokeralok dek o. Erom elegedak nertaga mende mban wokeragagi o. 3Nenaluk, o eta paga kir akuni agar taga mende inobabur ndak-ndak welagagup o. Eti paga nen kir wene aredo wakwi, inakla uwa yir nugwi, ndugi bugwi, ir etegerogon ekwi eti, ir akuni agar paga mende Ar Allah inunggukdek mende, ir inobabur ndak-ndak a dek a? 4#1Kor. 1:12Kir amberak nen yugu dogolir, “Nir Paulus ninom,” yugwi, nen kir amberak nen, “An Apolos nimbirak,” yugwi, etegeron welagwi eti, ir akuni agar taga mende inobababur ndak-ndak welagwi yiluk yokerau ndak dek a?
5Kir wene kinilu arurak ebe ya mende: ar Apolos yi ta? Nen ar Paulus yi ta? Nir yi Ar Allah eyabu mende arar, Ar nen kir yabu yi erni o yiluk, yoneragagemo o. Nen nir nen kir Ar Kristus oba eberogo waganubagik nen yiluk, wokerek ar oba lambologo binagi wagagumo o. 6#Kis. 18:4-11,24-28An nen ai yarir laga, nen ar Apolos nen i ndiyalir laga, ekwi ninagik, Ar Allah adigar nen, ai yago anggup tubulogo wulabir taga o. 7Ai yarir lagage mende inom, nen i ndiyalir lagage mende inom, ir eti unggune mende dek o, ogwe Ar Allah ai yago anggup tubulogo wulabir taga werek eti perak, unggune mende arar o. 8Ir imbirak eti ambi ndak-ndak arar o. Nen ir yabu eku lagugwa ndak-ndak onggo koda lugun o. 9Kir kinebe eti, Ar Allah eyabumo ai yagoma arar o, nen nir nimbirak yi, Ar Allah eyabu ekwa, kir ndegel kinakwa arar o.
Kir kinebe eti, Ar Allah ai palek ndak-ndak. 10An Ar Allah nen, nakla nggagalogo birigemo, ap o palkwi ilu mende ndak-ndak, Ar Allah ai palu, o kedaga pano mende bik kalok birigimo, nen ir ap amberak nen, o kedaga ebe eti paga arar, duk-duk palir dagir tagwi o. Ir nen an o kedaga yi paga, pano palir taga a, maduk palir taga a, ir nen dik biluk nen palir lagu dogorak o. 11O kedaga pano mende amberak yoma mondok dek arar o. Ar Allah nen ar Kristus eti ar, o kedaga palu ake birige mende were o. 12Ir akuni nen, o kedaga eti paga paluok nen yiluk, ir amberak nen emas paga palkwi, ir amberak nen perak paga palkwi, ir amberak nen permata paga palkwi, ir amberak o nggili paga palkwi, amberak nen arim engga paga palkwi, etegerogon erir lek tagwi o. 13Yabungga Ar Kristus waga dogolir, ir akuni yoma yabu eku lagugwa mende inilu aruwak nen yiluk, telekma erogo bega paga, ninil kugun o. Nenaluk o hari eti paga indu nen ir akuni ineyabu eku lagugwa mende obogar telekma erogo bigin o. Yabu pano eku lagugwa, maduk eku lagugwa eti, indu nen ar abuk mbalogo bigin o. 14Ir akuni nen, o palku dogolir kedaga buku dogogun enogo, indu nen kali ninggik dek kalok, ap eti perak onggo kodagin o. 15Ogwe ar ambi nen, o paligin mende kali nengga kalok, ar eti tugi arar arigin o; nen ar ebe engga werek kwak ndilkodagin o, ogwe ar ebe indumo nen kilik ndak-ndak unggi ligin o.
16 #
1Kor. 6:19; 2Kor. 6:16 Kir kinebe eti, Ar Allah ai palek yiluk kir kinonggokdek a? Nen kinilitimo Ar Roh Allah eti werek kir kinonggokdek a? 17Kir kinebe eti, Ar Allah adik ai palek arar ma, ap ambi nen Ar Allah ai palek eti maduk erogo bega kalok, onggo Ar Allah nen ap eti maduk erogo bagin o.
18Kir nen kinenggal yirkodagup o. Kir endomala ar ambi nen, akuni agar paga endago paga, an kwak nakla nggagalek o yiluk yega kalok, mbogor paga mende paga akla nggagalek etaruak nen yiluk, ebe tebe yuwak o. 19#Ayb. 5:13Nenaluk, o agar taga mende endago paga, inakla nggagalek andagwi mende, Ar Allah nen lakdaganem, ir eti inonggokdek mende arar lakdar taga o. Alkitab mbalek paga nen yega dogolir, “Ir akuni inakla nggagalek yiluk, yugwi mende, Ar Allah nen nugurogo bamo nuk arugun o.” 20#Mzm. 94:11Diru mbalek amberak akla yegerogon werek, “Ir akuni inakla nggagalek yiluk yugwi mende, Ar Tuhan nen il daga dogolir, ir andar tagwi mende eti enggen dek arar daktaga o,” yiluk yirige. 21Eti paga nen, kir nen an ar o yiluk, wogor daktagup o. Nenaluk ye mende nde mende obogar onderogo wokeragage eti: 22ar Paulus o, nen ar Apolos o, nen ar Petrus o, o yoma iniluk dogorak inom, kamburak inom, yogondak inom, o yabongga ari warigin inom, obogar kinamende kininggimo arigin o. 23Nen kir kinebe Ar Kristus amende agokip o, nen Ar Kristus eti Ar Allah amende arar agarik o.
Currently Selected:
1 KORINTUS 3: WLW
Highlight
Copy
Compare
Share
Want to have your highlights saved across all your devices? Sign up or sign in
