1 KORINTUS 2
2
Ar Yesus o kari karo paga warogo birugwa wene
1Nogari o, wanelak! An Ar Allah nen erigin yirige mende, ir akuni agar taga yoma obogar inunggukdek mende wene eti, kir kinoba wagagirik yokeraga dogolir, niliti nggagalek paga inom, nane amburu ndik-ndik paga inom, yokeralok dek o. 2An auwan kinoba wagik dek dogolir, akuni o Korintus mende etoma wene nin mende yoragin mondok dek o. Ar Yesus Kristus o kari karo paga warogo birugwa wene eti adigar, yora ligin o yiluk, nakla andalok nen yokera wagagimo o. 3#Kis. 18:9An kir ninom enda dogolir, an yi ap nobarne dek mende arma yiluk, nobade nen naganak waka kigigar, wene yokeraga dogolir, ninom welagagu o. 4An nen wene yokeraga dogolir, kir kiniliti waganik nen yiluk, akuni inakla nggagalek paga yir tagwi mende paga yokeralok dek o. An nen wene eti yokeraga dogolir, Roh Ar Allah obarne werek mende nen eruwak nen yiluk yokeragagimo o. 5Eta ekigi eti, kir kiniliti nen, akuni iniliti nggagalek paga panggolkunem o, arte Ar Allah obarne ambik eti oba mban, panggoluwak nen yiluk, ekigimo o.
Ar Allah nen obogar ilu dogolir erir taga mende wene
6Eta mende, ir akuni iniliti rohani#2:6: Rohani: Eti ir akuni iniliti ebebar andalok inobabur Allah wene diru mbalek ndak-ndak welagwi mende yiluk, nen ambi ir akuni inobabur Roh Allah nen ngger endarinaka kalok welagwi mende inobabur endaga. arar kode agugama kalok, an nen wene inakla nggagalek dogorak mende yoragin o. Ogwe Inakla nggagalek dogorak wene yi agar taga mende dek o, nen ir ap inendaga mbogor o agar paga yoma pago mende inakla kode dek ar o, arte o yoma ebe dek arurak mende inakla kode paga degar o. 7Akla nggagalek dogorak wene an yirtaga yi, edo Ar Allah akla nggagalek mende wene an nen yirtaga o. Akla nggagalek wene yi, ir akuni agar taga yoma mende mondok dek o, wene yi nir mbogor agar kenamer digikdek kigik, ninake Ar Allah nen kologo birige mende arar o. 8Ir o yoma inendaga mbogor dogolir, obarne pago mende ambi nen mondok inonggok dek welagugwama o. Ir ambi nen wene eti inilu dogolepma, nir ninewe endaga mbogor wakugwa eti watep dek o. 9#Yes. 64:4Alkitab diru mbalek paga amberak yegerogo yirige,
“Ir akuni nen inil kigikdek mende inom, inaruk kulkikdek mende inom,
inakla nen yegerogo erigin andalok dek mende inom,
etoma Ar Allah nen ir akuni Ar iniliti kunik mende
inake pugurogo barigemo o.”
10Ar Roh Allah eti Ar Allah iliti andaga odo mende inom obogar iluma, Ar Allah nen pugurogo birige mende etoma, Ar Roh Allah nen ebe yi o yiluk, yonerar taga o. 11Nir akuni yoma ninakla wene ilu eti, nir niliti adigar ilu dogir taga kinonggor dek a? Eta ndak-ndak Ar Allah ilitimo mende Roh Allah adigar ilu o. 12Ar Allah amende onggo dek worneragage mende etoma obogar ninilu aruak nen yiluk, Ar Allah nen roh o dunia yoma mende worniralok dek o. Ogwe Roh Ar Allah amende eti arar worneragage o.
13Nir nen akuni Ar Allah akburi, Roh Ar Allah inom werek mende wene yorawok nen yiluk, akuni o yoma mende inakla nggagalek paga yoraurak dek o. Nir nen Roh Allah obarne paga yoragu dogorak o. 14Ir akuni Roh Allah inakla dek mende nen, Ar Roh Allah ane nena yigin mende eti waganugun mondok dek o. Nenaluk ir nen wene etegerogon mende eti, ir inakla paga nen we wene inenggok dek mende arar andugwi o. Nenaluk ir nen wene eti rohani paga mban dikburak ma, ir nen wedek ugunar dikburak ndak dek arar o. 15Ir akuni yoma mende nen, wene etoma dibi dugwi mende, ir akuni Ar Roh Allah inakla werek mende nen, ye wene nde wene etoma obogar dikburak ndak o. 16#Yes. 40:13Alkitab mbalek paga yegerogo yirige,
“Ar Tuhan iliti andaga ilu ta?
Akuni ta nen kwak Ar Tuhan kar yegerogo erin yiluk yorurak?”
Ogwe nir yi arar, Ar Kristus akla ebeka mende eti, onde agagu o!
Currently Selected:
1 KORINTUS 2: WLW
Highlight
Copy
Compare
Share
Want to have your highlights saved across all your devices? Sign up or sign in
