1 KORINTUS 15
15
Kristus kambiluk lektagama nen iluk menagage wene
1Yogo nogari o, yogondak an nen, Ar Allah wene Pano Wene kir yokeragagimo waganggugup mende, kinakla eberubagik nen yiluk yokeragin o. Wene Pano Wene eti yokeragagimo waganggugup eti paga, kir kiniliti Kristus oba pano panggolek werek o. 2Kir nen wene yokeragagi mende etiar kininggi nggerok togo pago dogogun kalok, kinebe ndilkinabigin o. Nen kir nen dikbigik dek ugun ar pago dogumo, kinebe ndilkinabigin mondok dek o. 3Nawor nakbura wae, wene an waganggigi mende Pano Wene eti, kir yokeragagi eti arar o. Wene ebe Pano Wene Alkitab paga mbalek werek mende yokeragagi eti, Ar Kristus nir ninomaduk onggo kanggige eti arar o. 4Ar ebe arar kanggigemo, kubur ekugwa o. Inggi o kenagan paga warek kubur akla welagagerek nen, iluk agage wene eti inom, Alkitab akla paga mbalek werek o. 5An nen wene yi yokerak o, Ar Kristus iluk aga lagagerek nen, an arar niluk agi o yiluk Petrus inugur kega, yabongga ir inebe dua belas rasul mende enogo inugur daga ekige o. 6Eta arar inugur dalok, yabongga inebe dogalek ar inuwagam, An arar niluk agi yoma neyagop a yiluk, inugur darige o. Ir akuni o etinem inil karugwa mende, ir inebe amberak, arar kanggugwa mende, inebe amberak iniluk ninom werek o. 7Eta eka lagagerek, yabongga Ar Kristus nen Yakobus inugur kega, nen ir rasul obogar inom inugur daga, ekige o. 8Elege endak laru auwan kigik endak tari taga kwak, ugu paga mondok eti, Ar nen an arar inugur neyarige o. 9An yi ir akuni jemaat Ar Allah mende etoma, ir inebe anggon panggon erinaka lagagirikma, an rasul yorniru ndak dek o. An eti Ar Tuhan mende rasul we inapma mende o. 10Nebe etegerogo mende, Ar Allah an nakba karigemo, yogondak ya agarik o. Tuguluk Ar Allah nen, an maduk ekigi mende oba mi erogo mbo lagakige etoma, alem warogo dek o. Eti paga, an yogondak ya, yabu odo nggok mende an nen erir lektaga o. Eta an nobarne paga dek, Ar Allah obarne woknirige paga erir lektaga o. 11Yogo, kir ap endoma wene Pano Wene ta nen yokeragage, an nen yokeragagi a, ar Yesus aworomi ambi nen yokeragugwa a, eti wene ebe mende mondok dek o. Ebe mende eti, nir nen wene Pano Wene yokeragagumo, kir wokbiluk kiniliti oba panggolek werek eti ar, wene nggok ebegirak arar o.
Akuni warek mende iniluk erinaburak wene
12Nir nen yokeragu dogolir, Ar Kristus watatuk lektagama nen, Ar ebe iluk erogo birige o yiluk, yokeragagu mende, kir akuni endoma, akuni wartatukmo nen iniluk erinabigin dek o yiluk, nenaluk yirtagwi o? 13Ir akuni kambiluk lektagama nen iniluk erinabigin dek o, yiluk yugwi eti ebebar dogolepma, Ar Kristus kambiluk lektagama nen iluk erogo bilep dek o. 14Ar Kristus iluk erogo bilep dek dogolep ma, nir ye wene nde wene yokera tagwi yoma enggen dek mende arar o. Nen kir nen kinakla ebebar andalok panggolek werek eti, wene edo dek arar o. 15Nggok negen eti, nir nen Ar Allah ekige wene ninenggal yirugumo o. Nenaluk Nir yokeragu dogolir, Ar Allah nen Ar Kristus kambiluk lektagama nen arar iluk ekdirigemo yirugu mende eti, Ar Allah nen Kristus ebebar iluk erogo bigikdek kigik yirugu eta ebe wene kalok, ir akuni wartagugwa mende etoma iniluk erogo bagin dek o! 16Nenaluk ar Kristus kambiluk nen iluk erogo bigikdek dogolepma, ir akuni warek mende iniluk erinabigin dek ar o. 17Ar Kristus iluk erogo bigikdek dogolepma, kir kiniliti ar oba ebebar andarugup eti elamatak o; eti paga nen, kir kinomaduk kinoba dulik werek nen kir kinakla oba dutek mondok dek arar o. 18Eta paga, ir Ar Allah akburi kanggugwa mende, iniluk erogo bagin yiluk, iniliti dulik dogorak dek arar o. 19Nir Ar Kristus oba ninakla duktek mondok agorik eti, we agar taga ya dogolir ake mban yugwi kalok, ir akuni agar taga yoma dagik ar, nir kwak yi ebe elamarek mende arar! 20Nen wene ebe mende yi o, Ar Kristus kambiluk lektagama nen iluk erogo birige yi paga nen, ir akuni warek mende iniluk erinabigin o. 21Nenaluk ar ambi omaduk ekige paga nen, akuni kanggu dogorak mende agar paga yoma wigak yirige o. Nen eti ndak-ndak, ar akuni ambi pano ekige paga, akuni obogar kanggu lagagu mende niniluk agu dogorak mende worneragage o. 22Akuni obogar ar Adam inom kunik dogolir, kambir lagu lagugwa mende, yogondak Ar Kristus inom kunggwi dalok, ir obogar iniluk erinabigin o. 23Ogwe, iniluk erinaka dogolir, nggigi yabo iniluk erinabigin o. Nen o alep ar, Ar Kristus ndak iluk ekige o. Nen ambudik Ar waga dogolir, ir akuni Ar Kristus agarek agugwa mende etoma iniluk erinabigin o. 24Eta eterogon ekbiluk, o irep paga arar nggobok yigin o. O eta paga, Ar Kristus nen ir pemerintah inobarne lektek welagwi mende eti, obogar apma tebelinabin o. Tuguluk Ar obarne mende eti, nir Ninombae Ar Allah, Raja endaga mbogor eti arar wogorigin o. 25Ar Kristus wene inggim wagangga kigik, Ar Allah nen Ar Kristus awim mende obogar, Ar Kristus apma tebe damo, obogar tebe yi warugun o. 26Ar awim imbirak agorek mende, o irep paga mondok warogo bigin eti, kanggwi edo eti arar o. 27Alkitab mbalek akla nen yegerogo mbalek werek o, “Ar Allah nen ye mende nde mende, o yoma werek mende obogar, Ar Kristus iyok apma teber digin o,” yiluk yirige. Etegerogo yirige eti, “Ye mende nde mende,” waganogo Ar Kristus iyok apma tebe digin o yiluk yirige eti, ye mende nde mende kenam ekige mende etoma arar o, nen Ar Allah ye mende nde mende kenam ekige werek mende dek o. 28Nen, obogar waganogo Ar Kristus apma dombok tebekda warumo, Ar Kristus inawene inggim pago dogolir, Ar Kristus Ar Allah Akbur ebe Ar Allah nen ye mende nde mende apma birige werek uwagam tebe yumo, Ar Allah nen wene edo pago mondok dogogin o. 29Akuni kambu mende iniluk arukbuk kalok, nenaluk akuni kanggetek mende inake, ir akuni iniluk werek mende ima wurinabir tagwi o? Ir akuni warek mende ebebar iniluk arugun dek kalok, ir nen nena ake eterogo erir lektagwi o? 30Nen nir nena etaruwak nen yiluk, o kup keyam, nir akuni nen ninaruwok nen yiluk ekwi dagik, inandema nininggi lagabir lektagwi o? 31Nawor nakbur wae! Kir nen Tuhan Kristus Yesus oba eberogo, waganggugup paga, an noba anggin panggin wuka kigik, niliti adeknggen agarik o. 32Akuni kambilukmo, iniluk erinaburak dekma dogumo, an o Efesus yoma nena wokniruwak nen yiluk, binatang#15:32: Binatang eti: Ye wado nde wado agurenggewerek mende, ogwe akla nggagalekdek iliti apir ogwe oba karo werek. Walkigik inendaga yi: wam, sapi, kuda, kambing, singa, harimau, lembu, domba, wado, tewe, ikan, kuna, kelinci, nen amberak inom ar. kelo mende ninom wugabir unggirigi o? Akuni paga kwak erir nega dogolir dogomo, nir nen wene inane bayok yirugwa yi ar erurak o. “Wadigi nir ya kubenen kambugun ararma, amede ninakla adeknggen paga dago ner nugu dogowok o,” yugu dogorak pano o. 33Maduk ekwa inom, agade kunggunem etoma inobabur maduk mondok ar etarir taga mendema, kir nen tuwam panorogo wartagu dogoni o! 34Yogondak kiniliti kwaktani o. Maduk erurak mondok maga o. Kir endoma amberak Ar Allah ebe dirogo kinonggokdek dogolir yir lektagwi o. Kir etegerogo werekma, kir nen nir ninenggadia yiluk puk dogorak mende yir lertagwi o.
Akuni inagakdo pidi mende ngger iluk mende kodagun wene
35Kir amberak nen kinok woknaku dogolir, “Akuni warek mende nenggerogon iniluk ekdagin o? Ir iniluk ekdalok inagakdo nenggerogon mende wogoragin o?” yiluk yugwi o. 36Kir nen onggen agarma yakbegetek mende, ebe pidi agakdek kigik, anggup wundir tagodek kinonggokdekma yitagwi a? 37Nogari kir nen onggen ai yarugun eti, gandum enggen a enggen ai amberak wedek mende a - eti enggen ebe eti arar o. Aingge yago mende amberak etoma obogar dek o. 38Ar Allah adigar nen, o enggen ai yago eti ake pano kwak ake nen, ebe yi ar anggup yegerogo wunduwak nen yiluk eti Ar Allah adigar andegetek paga etarir taga o. Nen o onggen dombok etoma ake paga, adik ndak eterogo ar erogo birtaga o. 39Tewe, bagi yoma agakdo elokte ambi ar talek, akuni inagakdo adik kunik ar werek, tewe bagi inagakdo inadiktak mban dogir taga mende. Tewe ambi agado eti adik, nen ir ikan inagakdo adik mban ar o. 40Eta ndak-ndak, ye mende nde mende mbogor taga werek mende inom, ye mende nde mende agar taga werek mende inom, mbogor taga mende obabur akbinak pano adik werek. Nen agartaga werek mende obabur akbinak adik kunik ndak mban werek. 41Mo akbinak adik kunik ar, tur akbinak adik kunik ar agarik. Nen, dadi etoma inakbinak adik ndak mban agarik. Dadi etoma ebe ambi akbinak adigar nen ambi eterogon mban welagwi o. 42Akuni warek mende inilugur dalok, inagakdo eta ndak-ndak erinabigin, inagakdo kubur bartagwi eti pidi eru mende, nen inagakdo iluk erogo bigin eti pidi arukbuk mende o. 43Inagakdo kali nengga kalok, kali nalok dek aga, nen inagakdo iniluk ekdumo pano iluk mende obarne ambik arar erigin o. 44Agakdo agartaga mende kubur bugwi, nen agado iluk ekdigin mende eti, agado eti Roh Ar Allah nen agakdo ngger mende erogo bigin o. Inagakdo eta agar taga dek etarurak mende werek ar, nen inagakdo mbogor taga mende, Ar Allah nen wokneragin mende werek ar. 45Alkitab mbalek paga nen, “Ap alep mende eti Adam, nen ar wagagerek iluk welagage,” nen Adam ambudik wagage mende eti nen inilugur erinabigin. 46Alep wagage eti jasmani mende o, rohani mende dek. Nen, mbogor taga mende ambudik wagagemo o. 47Ar Adam alep mende eti agar mende arar kenam erakige. Nen ar Adam ambudik wagage eti mbogor taga mende wagagemo o. 48Ir akuni agar taga werek yoma, ar Adam agartaga mende ndak-ndak, agar mende agabak kigirik. Nen ir akuni mbogor taga mende etoma, ar mbogor taga nen wagage eti ndak-ndak. 49Nir yogondak ya, ar Adam agar mende kenam erek mende werek, nen yabongga nir ar mbogor taga nen wagage kwak erogo binanigin o. 50Yogo, an nakla andagi mende yegerogo, nawor nakbur, ninagakdo, ninuno paga, ninamep paga dogalek mende yi, Ar Allah ao ngger palekma unggwi laurak ndak dek o; inagakdo pidi arir taga mende yi aitok dogogin dek o. 51Wene kimago mende yi birkani o. Nir yoma obogar kambugup dek mende, nir ninebe obogar adik abel dagarogo erninabigin o. 52O ugu yobok yega kigik, Ar Allah apiknggon ane eka kalok, nir yoma andalok dekma, akuni kanggugwa mende inagakdo iniluk inaitok mende kodawok nen yiluk menagwi, nir niniluk werek mende obogar adik ngger erogo binangga erigin o. 53Nir ninagakdo kambir taga mende yi, dambe kalok, ninagakdo kambukbuk mende kunogo binanigin o. Ninagakdo agar taga mende dambe kalok, mbogor taga mende wokneragin o. 54Ninagakdo wartari taga mende eti dambek kalok, ninagakdo kambir tagodek mende wokneraga, ninagakdo agar taga mende dambe kalok, ninagakdo mbogor taga mende wokneraga, erin o. Alkitab akla diru mbalek yi o, “Nir kanggwi mende arar dek erogo bege o. Nen obogar ar ndegelko o!” yiluk yirige.
55 #
Hos. 13:14
Kanggwi mende wae, kaik akdip ngga nggwe o?
Kanggwi mende wae, karega elo nenggedekma.
56Kanggwi edo eti maduk ekwi arar o, nen hukum agama paga nen maduk edo bugu lagugwa o. 57Nir Ar Tuhan Yesus Kristus paga, wene ninoba nggorogo binanggigemo, Ar Allah wa, yiluk yoritagwi o. 58Eta paga nawor nakbur niliti kunikma, kir nen kiniliti kode togo dogoni o. Ar Allah eyabu nggok togo eku dogoni o. Kir nen Ar Allah eyabu ekwi etoma, elamarogo ekwi dek ma, kinilu arigin o.
Currently Selected:
1 KORINTUS 15: WLW
Highlight
Copy
Compare
Share
Want to have your highlights saved across all your devices? Sign up or sign in
