1 KORINTUS 14
14
Wene karunia Roh Allah paga ambi inom ar yirige wene
1Kir nen ir akuni kiniliti kunik erinaku dogorak paga eku dogoni o. Nen wene karunia Ar Roh Allah nen wogoragage mende eti kodaurak paga eku dogolir, nen unggune mondok kwak eti Ar Allah nen erigin yirige mende wene yoragu dogorak kwak eti, kodaurak paga eku dogoni o. 2Ap omanggi ane elalin wene yega kalok, ar eti akuni inom wene mbalir taga dek o; eti Ar Allah imbirak wene mbalir taga o. Nen ar eti ane elalin wene yirtaga etoma, Ar Roh Allah nen ekbega paga kalok yegama, Ar Allah adigar nen perak nena yirtaga eti ilu o. 3Etiar mende, ar akuni ambi nen, Ar Allah wene akuni yoraga kalok, akuni inaruk kuluwak nen yiluk yoraga dogorak o. Etegerogon yoramo, akuni iniliti aik warinaka, inadeknggen erinaka, iniliti yonggoninaka erigin o. 4Ir ap inane elalin yikbin wene yirtaga mende eti, ir inake adigar yitar tagwi o. Ogwe ir akuni Ar Allah wene eti ir akuni amberak yoragwi kalok, ar nen ir jemaat nen pano erir lagu dogowak nen yiluk, mor-mor erogo bartaga o.
5Kir obogar kinane elalin yikbin wene yugu dogorak pano mende, pano mondok unggune mende eti, Ar Allah nen yegerogo erigin yirige o yiluk, kinane ebe kinane paga, telekma bugak togo yoragun kalok perak, pano mondok o. Nen kir kinane elalin yikbin wene yiluk, ir akuni inilu arurak paga, an wene yi mende yigi o yiluk, wene enggen ebe ane paga yoragin kalok perak, mondok pano o. 6An kir kinoba watuk nen, wene inane elalin yikbin wene paga mban yokeramo, kir kinakla nen nena andauruk kogop? An etegerogo yumo enggen mondok dek o. An nen Ar Allah wene yokeragik, Ar Allah ebe obabur yegerogo yiluk inugur kinagik, Ar Allah wene mbililogo nane paga yokeragik, erumo perak, kir nen wene enggen waganugun o.
7Ye mende nde mende ndai warir taga mende, seruling kwak, kecapi kwak, ane yu mende pik pak mor ekikdek ugun ar ane dumbe dambe ekunem, ir akuni inakla paga nen, yi ndai nggi mende waru paga eritagwi yiluk, dibi erogo bagun o. 8Nen ambi yi negen: ir trompet ane wim eru ake paga ugunar erugun kalok, ap wim eru mende, ta nen kwak abugurogo batalok dogogin kogop. 9Eti ndak-ndak, akuni inane elalin wene paga yugunem, akuni nen wene yu mende eti akuni inilu arugun dek o. Kinane elalin wene yugwi etoma, akuni inakla unggigin dek arar ma, aburak ar ngga laga talek dek arigin o. 10O kuri akuni inuma inane dombok etoma, inane yegetek mende ambi dikburak ndak dek eti, mondok dek arar o. 11Ogwe, an ar ambi wene yega dikburak ndak dek kalok, an nen ap eti kuro mende arar andagin o. Nen ar nen an eti kuro mende ar andagin o. 12Kir kinakla karunia Ar Roh Allah eti kodau wadok werek nilu mende, kir nen karunia Roh Allah etoma kodawok nen yiluk kalok, ir jemaat iniliti aik warogo wogorek lagu dogorak mende paga mban, eku dogoni o.
13Etama, ir ap inane elalin yirtaga mende nen, Ar Allah wae an nane elalin wene yirtaga yi, akuni yoma inane paga yorak nen emer nirin o yiluk, Ar Allah nggino yogu dogorak o. 14Nenaluk an nen nane yikbin paga tamban eka kalok, nagorengge nen tamban erigin o, ogwe an niliti paga tamban erigin dek o. 15Yogo eta eke nen an nenggerogo erigin kogop? An erigin mende yegerogon: An tamban eka dogolir nagorengge inom, niliti paga inom tamban erigin o. An nagorengge paga endai warumo, niliti inom ar endai warigin o. 16Kar kagorengge paga nen Ar Allah wa yiluk yorumo, ir akuni amberak nen kar kane elalin wene paga yegen eti, wene ebe yi yege o yiluk, inonggodekma, ir nen, “Kar ebebar yegen o,” yiluk yokirugun mondok dek o. 17Kar nen tamban eka dogolir, Ar Tuhan wa yiluk yogen pano mende, akuni nen kar kane yegen waganggik, nen wa yigik erugun mondok dek o.
18Kir yoma kinebe ambindak nen kinane elalin wene yugwi mende, an kwak ye akuni nde akuni inane paga nane elalin wene paga yir nega paga, Ar Allah wa yoritaga o. 19Ar Tuhan wogok buok nen yiluk komaku dogolir, wene elalin yikbin ribuan paga yu ar ogwe, etoma enggen dek o, arte wene uwak ebe lima paga nggaruk togo, ir akuni iniliti kode erinaburak mende yoramo kwak pano o.
20Wadigi nawor nakbur wae! Kir kiniliti elegedak iniliti eberkwi ndak-ndak ebeku dogogup o. Wene maduk mende ake paga, kinebe elege ndak-ndak dogorak o. Nen kiniliti odoma etoma, ap inanggok iniliti werek negen dogorak o. 21#Yes. 28:11-12Alkitab mbalek paga yegerogo yirige, “Ar
Tuhan nen yega dogolir, ‘ir
akuni inane adik mende pagaru inom, ir akuni ninggalok mende inane pagaru inom,
An nen wene yoragin ogwe,
ir nen An nane yega inaruk kolugun mondok dek o,’ ” yiluk yirige o.
22Ma karunia wene yikbin ake tumburik yir nugwi eti, akuni iniliti ebebar andagikdek mende inake o, nen ir akuni iniliti ebebar andugwi mende inake dek o. Nen karunia wene Ar Allah nen erigin yirige mende akuni yoragwi eti, ir akuni ebebar andarugwa mende yoragwi o, nen ir akuni inakla ebebar andagikdek mende inake dek o. 23Eti paga nen, ir jemaat nen komaku dogolir, wene yuwok nen yiluk, kinane yikbin wene paga mban yugunem, akuni kuro ambi Kristen dek mende nen kinoba warumo, ir akuni etoma nen yegerogon yugwi kinalok, iai, akuni yoma iniliti mondok mbalkama o, yiluk yokeragun o. 24Kir nen, Ar Allah wene eti, kir kinane ebe kinane paga ar, ir akuni yoramo, ir akuni Yahudi dek mende a, ir akuni Kristen dek mende a, ir nen kir komakunem kinoba warumo, ir nen wene eta nir ninobabur maduk ekwi mende arar yega o yiluk yugun o. 25Nen ar inilitimo wene kimago tebelek werek mende telekma aga paga, ar nen ebe tebe yiluk, Ar Allah eti woguk bega, nen Ar Allah ebe ebebar werek kigi o yiluk, yugun o.
Jemaat komaku dogolir eku dogorak wene
26Yogo, yogondak nawor nakbur, kir nen nenggerogo erugun kogop? Kir Allah wene yuwok nen yiluk, kuwak ekbiluk eku dogolir; ar ambi nen endai yega, ar ambi nen akuni wene yangguliraga, ar ambi nen Ar Allah wene mbalek paga yoraga, ar ambi nen ane elalin wene paga yega, ar ambi nen, ar ane elalin paga yege mende enggen mbililogo yoraga, eku dogorak o. Etoma obogar akuni pano ekbagwi, nen akuni inake inilu aruwak nen yiluk yangguliragwi, eku dogoni o. 27Ir ap amberak nen inane yikbin wene yuwok nen yiluk kalok, inebe kenagan nen ar ambi yi lagik eku dogorak o. Ir ap amberak nen inane elalin wene yugwi eti akuni inilu aruwak nen yiluk tuguniragwi eku dogorak o. 28Ap Ar Allah wene yoragunem, ir ambi nen inane elalin paga yuwok nen yiluk yugwi dalok, ap inane elalin wene mbililogo yurak dek kalok, Ar Allah wene yugwi mende tagalurak ma, puk dogowak o. Ir nen Ar wene inakla paga arar yorurak o. 29Ar Allah wene yorawok nen yiluk kalok, ap inebe kenagan nen ar ambi ndak yigik ekwi dagik, ir amberak nen wene yi ebebar a, dek a, yiluk dikbagwi dogorak o. 30Ogwe, wene ambi, Ar Allah nen wene ar ambi komakunem korek mende yoga kalok, ar nen ir akuni amberak yorawak nen yiluk, alep wene yoraga laga mende eti, korektarurak o. 31Eta etegerogo erir lagu dogolir, ir akuni nen Allah wene yoragwi mende pano waganggwi, nen iniliti ebebar andagwi eruwak nen yiluk; kir nen ar ambi yi lagik, yugu dogono o. 32Karunia Ar Roh awene, Ar Allah nen yegerogo erigin o yiluk yoraga dogu mende eti yugu dogolir kalok, ir akuni yorar lektaga mende eti nen, elokte kwalogo yoragu dogorak o. 33Ar Allah eti, Ar Allah mor pano mban eru mende wadok, Ar adik arar o. Nen Ar Allah eti ugun-ugun ekwi mende a'ir ar o.
Ir jemaat Allah o ya nda etoma, erir lektagwi kwak, 34ir kumi nen inane mondok dek arar dogorak o. Ir kumi nen, wene jemaat komakwi paga kalok, inane mondok dek dogorak o. I kumi nen komakwi paga pemimpin bagu dogorak maga arar o. Nen wene eti hukum agama paga diru mbalek ndak-ndak arar mbalki o. 35Ir kumi nen wene jemaat paga komakunem wene yugwi kalok eti mondok ebe maduk arar o. Ma ir kumi nen wene kinok yurak kalok eti, ir inaguni inoba, uma lalok kinok yurak o. 36Ar Allah ane eti, kir paga nen warir taga a? Tuguluk wene eti kir kinadik kinake kinoba enda wura wagagemo yirtagwi a? 37Yogo kir endoma, ar ambi akla paga nen, an karunia Ar Allah wene yorar nega dogowak nen yiluk wogoge mende werek andega kalok inom, nen karunia amberak Ar Allah nen wogoge mende pago werek ar kalok inom, an wene diru paga mbalogo kinoba lakbi wagi endoma, Ar Allah nen yonegemo lakbi wagi endi, kir pik pak dikbini o. 38Ogwe ar akuni ambi nen, wene yi waganggikdek kalok, kir nen ar ambudik mutok lagup o. 39Etama, nawor nakbur wae, kir nen Ar Allah wene yi mban ar yorar lagu dogoni o. Kir endoma, ir amberak nen inane elalin wene yuwok yugwi dalok, kir nen kinane yiluk kudi bagup o. 40Kir wene endoma eku dogolir, dirogo pik pak kwalogo nen, erir lagu dogoni o.
Currently Selected:
1 KORINTUS 14: WLW
Highlight
Copy
Compare
Share
Want to have your highlights saved across all your devices? Sign up or sign in
