1 KORINTUS 13
13
Akuni inakba ekwi wene
1An ir akuni niliti kunik erinakik dek dogolir, akuni inane obok nilu atuk yega, malaikat mende inane nilu atuk yega, erigin mende, ir akuni amberak niliti kunik erinabigin dek kalok, etoma obogar enggen mondok dek o. 2#Mat. 17:20, 21:21; Mrk. 11:23Eta paga ma, an nen Ar Allah awene mor tenggek togo yoraga, ye wene nde wene kirago akman nggwe mende obogar nilu aga, Ar Allah oba ebebar andalok ado yi kebe eloma lan yiluk yorumo, ar ebe etoma ligin ar o, etoma erigin ar mende, akuni niliti kunik erinabigin dek kalok, an yi nebe enggen dek mende arar o! 3An nen nagarek ninggimo werek mende obogar, ir akuni ininggi dek mende kodani o, yiluk tumburogo wogoraga, nebe warogo kali kunabuwak nen yiluk wogoraga erigin ar ogwe, an nen ir akuni amberak niliti kunik erinabu na'ir kalok, etoma obogar enggen dek mondok arar o.
4Ir akuni iliti kunik erinabir taga mende kalok, inobabur mende yi o: Wene aik waritagodek, obabur pano, oba karo dek, anini dek, wogor daktakbuk, 5nen oba tagin, ar nen an niliti andagi mende mban erni yitagodek, uwa mbalir tagodek, nonggo kodale yiluk eberir tagodek. 6Ap akuni iliti kunik erinabir taga mende nen kalok, ar nen maduk mende agode yogwa, pano erurak mende mban wadok. 7Ir akuni nen ar maduk erogo bugwi dagik, ar nen yanggo yiluk welaga, anggin panggin oba bugunem, ar nen onggo kodagikdek noba bini o yiluk enak bega, etegeron erir taga mende o.
8Niliti kiliti kunik eku dogorak, ao kudi warek yi paga yiluk mondok dek arar o. Yogondak ya Ar Allah wene Pano Wene yoragwi mende, yabunggane yoragun mondok dek o. Yogondak akuni inane dombok elalin etoma yugwi ar mende, yabongga inane dombok elalin wene etoma yugun dek o. Yogondak ir akuni nen nir ye edo nde edo obogar ninilu o yiluk yugwi mende, yabongga ir inonggodek arugun o. 9Ogwe, nir yogondak ya, Ar Allah wene yorau ninakla nggagalekdek, ninobabur ndakbuk kigik yoragwi mende, 10Yabungga Ar Allah nen, o elokte pano erogo bega paga, obogar pano mban aga, ndakbuk mende ndak aga erigin o.
11An nebe elege awan bugudak paga, nane elege inane yirtagwi ndak-ndak yega lagagi o. Noba ernaka paga, elege inakla andagwi ndak-ndak andaga lagagi o. Nakla ebeka dogolir, elege iniliti eberkwi ndak-ndak ebeka lagagi o. Yogondak an arar nanggok atuk nen, elege inobabur mende arar mbo ndambe karigi o. 12Nir yogondak ketagwi yoma, akumakla lak ketagwi ndak-ndak laker tagwi o, ogwe yabunggane eti, tenggek togo arar ninil kugun o. Yogondak ya an obogar nonggokdek werek mende, yabunggane Ar Allah nen an nebe ar ilu agarik ndak-ndak tenggek togo nilu arigin o.
13Etiar ma, kir nen wene edo pik pak eku dogorak mende eti inebe kenagan yi o: ninakla bebar andagwi, nen ninakla oba dutek mondok welagwi, nen ninakla nakba kakba paga welagwi, eta paga ar dogogin o. Nen wene edo kenagan ya, mondok unggune kwak nenggen eti, ninakla nakba kakba paga welagwi kwak eti arar o.
Currently Selected:
1 KORINTUS 13: WLW
Highlight
Copy
Compare
Share
Want to have your highlights saved across all your devices? Sign up or sign in
