1 KORINTUS 12
12
Roh Allah nen karunia wogoragage wene
1Yogondak ya, wene Ar Roh Allah mende karunia wene yugun o. Nawor nakbur, an nen kir wene yi panorogo kinilu aru wadok andar taga o. 2Kinakla eberni o, kir o alep ar, Ar Tuhan ane kinonggokdek dogolir, amudi kunik ebe dek kigik, kir nen mutok nugu lagagup o. 3Ma kir kiniluk dogu ambi, ap ambi Ar Roh Allah nen wene yi yin yiluk yorigin mende nen yega dogolir, “Kar Yesus pudulogo bagagi o,” yiluk yorigin mondok dek o. Eti ndak-ndak ar, ir akuni ambi, Ar Roh Allah nen yogikdek kigik, “Ar Yesus eti Tuhan arar o,” yiluk ugunar yigin dek o.
4 #
Rm. 12:6-8
Ar Roh Allah mende karunia tumburik pakalok o, nen ebe Roh Allah ambi eti nen ar tumburir taga o. 5Ar Tuhan eyabu eru ake paga, ye yabu nde yabu agarik o. Ogwe, Ar Tuhan eyabu ekwi werek eti, Ar Tuhan ebe omanggi eti ar o! 6Ar Tuhan eyabu eru wene nggagalek adikindak dombok pakalok werek ma, wene etoma eruwak nen yiluk, ir akuni obarne wogora taga mende werek eti, Ar Allah ambi adik nen ar o. 7Nir yabu pano ndak-ndak erir lagu dogowak nen yiluk, Roh Allah nen ap inadikindak dombok inoba wuk togo wogorar lagage o. 8Ar Roh Allah nen ar ambi karunia wogoga dogolir, wene yega alon palek yega dogu mende wogoga, nen Ar Roh eti nen, ar ambi karunia wogoga dogolir, wene Ar Allah arenggak mende mbililogo yega dogowak nen yiluk wogoga erir taga o. 9Nen Ar Roh Allah ambi eti nen ar, akuni ambi karunia Kristus ibar ebebar andawak nen yiluk wogoga, nen Ar Roh ambi eti nen arkarunia u palinaka dogu wogoga, 10nen ar ambi karuniaerukbuk mende erir laga dogorak wogoga, nen ar ambi karunia Ar Allah wene wolok nega dogorak mende wogoga. Nen Ar Roh Allah ambi eti nen ar karunia ye wene nde wene inenggokdek mende etoma yega dogu wogoga, Nen ar akuni ambi karunia wene inane inunggukdek mende enggen kwaka dogu wogoga, Nen tuguluk ar ambi karunia Ar Allah nen erigin yirige mende wene yoraga dogu wogoga ekige o. 11Wene etoma obogar Ar Roh ambi eti nen ar akla andalok ap inadikindak dombok wogorar taga mende o.
Inggi iyok ambik ogwe ebe ambi paga ar kunik wene
12 #
Rm. 12:4-5
Ar Kristus ebe eti akuni inebe talek o. Nen Ar be ambi ar, ebe ambi paga nen inggi iyok, oba kunik mende dogalek ar werek o. 13Nir yoma eti ndak-ndak ar werek o. Ir Yahudi mende men, ir Yunani mende men, inanduan mende men, wender mende men, nir obogar Roh Allah ambi eti nen ar, nir obogar ninebe Kristus ninom kunogo binanengga, ninalubak tebelogo ima wurninakige o. Nir obogar Roh ambi agi todek narugu o.
14Nir ninebe werek yoma ambi ar paga agorik dek o. Nir ninebe oba kunik eti, nininggi niniyok nen oba kunik yoma dogalek ar werek o. 15Kalok ar iniyok nen yega dogolir, “An eti ininggi dek o, ma an nebe inoba kunik mende dek ar o,” eti paga ma iniyok eti inoba kunik mende dek o yiluk andau ndak dek ar o. 16Inaruk nen yega dogolir, “An inil dek o, an nebe ebe eti inoba kunik mende dek o,” etegerogon kalok, inaruk eti inoba kunik mende dek o yiluk andau ndak dek ar o. 17Yogo ambi yi, akuni eti ebe obogar, inil kwak dogumo, kalok nena paga inane yugwi, nen inaruk kolalkwi erurak kogop? Nen inebe obogar eti inaruk kwak dogumo, nena paga nen obari mbalku dogorak kogop? 18Ar Allah nen, ininggi iniyok, oba kunik werek mende etoma, Ar Allah akla andarige ndak-ndak, obalikmo dombok nggidik nggedok mendagago birigemo o. 19Inebe obogar eti ar ambi kwak ar dogumo, inebe kwak eti nggi kwak yurak kogop? 20Wene eta ebebar, inebe ambi ar mende, ininggi iniyok inoba kunik mendago pakalok werek o.
21Eta etegerogo werekma, inil nen, “Ininggi wae, kar an na'ir o,” yiluk yoga. “Nen ar inalubak nen, Iniyok wae, kar an na'ir o!” yiluk yoga, 22Elokte medak togo birkamo, nir ninoba kunik ogwe, ebe obarne dek mende eti, nir ninoba unggune dogorak mende kwak ebe eti arar o. 23Nir ninoba kunik werek mende yoma, nir nen we limirek talek mende, ir eta kwak inebe unggune bagoma. Nen ir inebe wadok daurak dek mende, nir nen pano erinakwi o. 24Nir ninoba kunik mende ambi pano mondok kalok, eti kwak nir nen pano togo erinaku dogorak dek o. Ar Allah nen nir ninebe paga pik pak etegeron ar agabak kigirogo birigemo ma, nir nen ar ambi kwak we limirek mende talek andagwi eti, ar ebe pik pak odo-odo erinaku dogorak o. 25Eti ar ma, nir ninebe eti adiktik adiktak dek o; eta paga ma ir inadik ndak dombok nen ir amberak inil wogonaku dogorak o. 26Nir ninoba kunik mende, ar ambi oba aik kalok, ninoba kunik mende amberak inom ar aik arir taga o. Ninoba kunik ambi wogor dugwi kalok, ir amberak obogar inadeknggen arugun o.
27Kir kinebe obogar eti, Ar Kristus ebe arar o, nen kir kinebe kinadik ndak obogar etoma, ebe ambi eti arar o. 28#Ef. 4:11Jemaat paga yoma etegerogon ar o, Ar Allah nen ap inadikindak dombok inakdipmo dombok erogo barigemo werek o: ma pertama mondok eti, ir rasul-rasul arar o, nen kedua eti ir nabi-nabi arar o, nen ketiga eti ir guru-guru arar o, nen keempat ambi eti ir erukbuk mende ekwa barige o, nen kelima eti ir amberak u palinaku dogu baga, nen keenam eti ir amberak yamak dagwa baga, nen ketujuh eti ir amberak inewai dogu baga, nen kedelapan eti ir amberak wene tugune ye ap nde ap inane yugu dogorak baga ekige o. 29Ir obogar eti rasul dek o, ir obok nabi mende dek ar o, nen ir obogar guru mende dek o. Nen ir obogar inobarne erukbuk mende, 30ir akuni u palinaku dogu dek o, nen ir obogar inane elalin ye ap nde ap inane yugu dogu paga dek ar o, nen ambi ir obogar inane elalin yugwi mende etoma tenggelogo inane paga yoragik eku dogu mende dek ar o. 31Etegerogoma, kir nen karunia Roh awene tumbuke mende eti, ebe unggune mondok kwak nggi, yiluk kodau paga eku dogoni o.
Nen ugumo nggwe ya, an nen tuan pano ya nggwe yiluk yokeragin o.
Currently Selected:
1 KORINTUS 12: WLW
Highlight
Copy
Compare
Share
Want to have your highlights saved across all your devices? Sign up or sign in
