1 KORINTUS 11
11
1 #
1Kor. 4:16; Flp. 3:17 An Kristus erir laga nil kalok mutok erir lektaga kwak, kir nen an erir laga neyagop ndak-ndak erir lagu dogoni o.
Kumi tu inalep pada danggulik dogolir, tamban eku dogorak wene
2Kir nen an wene yokeragetek mende oba eberek mondok dogolir, dirogon arar erir lagwi paga, an nen woguk binagir taga o. 3Eta pano erir lagunem, wene ambi yi, kir kinilu aruwak nen yiluk yokerak o. Wene ebe, ir ap obogar inalubak eti Kristus arar agarik o, nen ir kumi obogar inalubak eti ir inaguni arar agarik o. Nen Kristus alubak eti Ar Allah arar agarik o. 4Nen ir ap nen tamban eku dogolir, Ar Allah wene telekma nggok paga yoragu dogolir, alep tagi yugu dogolir yega kalok, Kristus tebelogo birtaga o. 5Ir kumi nen tamban eku dogolir inom, wene telekma nggok paga yoragu dogolir inom, inalep tagi yugu dek dogolir ekwi kalok, inaguni inalon dek erogo bartagwi o. Etegerogo ekwi kalok, ir kumi nen iniri edo paga takbolek talek arar erir tagwi o. 6Ir kumi nen inalep paga tu danggulu ina'ir kalok, ar iri obogar mbalurak kwak eti pano o. Ogwe ar kwe nen iri obogar mbalogo, nen edo kudi takboligin kalok, ar eti nen an nebe maduk mende arar o yiluk ekodagin o. Eta eru angginma, ir kumi nen inalep tagi danggulogo nen erir lagu dogorak o. 7#Kej. 1:26-27Ir ap inalep tagi yirurak dambe o, nenaluk Ar Allah endaga mbogor eti, Ar ebe yio yiluk, kenam erogo bigin ma, ir nen inalep tagi yiku dogorak dek o. Ogwe ir kumi nen, ap inalon palek welagwi ma, inalep tagi danggulurak arar o. 8#Kej. 2:18-19Nenaluk eta edo, ir ap kumi paga nen kenam erogo balok dek o. Ogwe ir kumi perak, ap inebe paga nen kenam erogo barigemo o. 9Ir ap kumi inake kenam erogo balokdek o. Ir kumi perak, ap inake kenam erogo barigemo o. 10Eti paga nen, ir malaikat mende inadeknggen aruwak nen yiluk, ir kumi nen an ap ar apma agarik o yiluk iniyom inalep tagi danggulik dogolir eku dogorak o. 11Eta ma nir yogondak ya akuni Kristen mende nen kalok, ir kumi nen ap agun imbirak dek adik dogorak dek o. Tuguluk ar ap nen kwe agwe imbirak dek kigik, ap idik dogorak ndak dek ar o. 12Nenaluk kwe ibibir mende eti, ap paga nen kenam erek mende, ogwe yabongga ir kumi paga nen, ap endak tari tagwi o. Etoma obogar, Ar Allah paga nen woknerar taga o.
13Nawor nakbur o, wene yi kir nen kinakla walkani o. Kumi nen akuni nggok komago inuwagam tamban eruwok nen yiluk, iniyom inalep paga kodagidek dogolir erurak pano a? 14Kir o yoma dogolir eku lagugwa mende kir emerkeragu dogolir, ap iniri idundak dogorak dek o yiluk, emerkerarugwa o. 15Ogwe ir kumi iniri idundak etoma, ir inalubak kimago dogorak ake wogoragage, nen ir iniri idundak etoma paga an agarik ar o yiluk, dogorak ake wogoragagemo o. 16Yogo, kir amberak nen wene yigi yi paga, aredo waru werek arumo, an nakla nilu werek mende yegerogo, nir o Korintus mende inom, Ar Allah akburi o ya nda etoma erir taga mende wene ebe endi arar o. Nen endi ndak-ndak dek mende dek arar o.
Perjamuan eku dogorak wene
17Kir wene eku dogorak mende yigin yi ake paga, kir pano erir tagama yiluk pogor kinaki dek o. Nenaluk kir komaku dogolir ekwi mende pano ekwi dek o, ogwe maduk mondok ar ekwi agoktip o. 18O alebar naruk kolalkigi eti, kir komaku dogolir, an kar yiluk agorik agorek erir tagwi o yiluk yonirugwama, wene ya ebebar yega a, yiluk nakla andagi o. 19Eta etegerogo kalok pano ar o. Eti paga nen, yogo ap Kristen ebebar mende yi o, nen we oba lambolek mende yi o yiluk, ninilu arigin o. 20Ogwe, kir komakwi etoma, Perjamuan Tuhan mende agarom dago nuwok nen yiluk kuwak ekwi dek o. 21Nenaluk kir dago nunggu dogolir, kir kinelabur togo nuok nen, yiluk pedal-pedal eku dogolir, akuni amberak kinil lak dagidek erirtagwi o. Etegerogon ekwi paga, ir amberak inake dek aga, nen ir amberak inelabur nen mabuk ekwi, erir tagwi o. 22Kir eta etegerogo eruwok nen yiluk, kuwak eritagwi a? Etegerogon eritagwi eti nenaluk? Kir kinuma dek a? Kir kinuma nen kinagarom inom kinagi inom kinuma nen nunggu dogorak o! Nen Allah akburi amberak inom, nen ir akuni ininggi dek mende inom, ir inenggadi aruak nen yiluk erirtagan a? Yogondak kir nena yokerau wadok? Kir yi pano ekopma yokeraurak a? Mondok dek o! An nen kir pano ekopma o yiluk yokeragin mondok dek o.
23Ar Tuhan nen, an yornirige mende emerkiragagi eti arar o. Ar Tuhan Yesus waruwok nen yiluk ekwi dagik, o kukbaga etinem, Ar roti inggimo waganggige, 24wagangga lagagerek roti enogo inggimo pago dogolir, Ar Allah wa yiluk keyagi waka, tuguluk roti enogo inggi paga ugur-ugur erogo biluk, “Roti yi An nebe arar o, ma kir kinake bigi o. Ma kir nen An noba ebernaku dogolir eku dogono o.” 25#Kel. 24:6-8; Yer. 31:31-34Etegerogon arar eka lagagerek, nen igirak anggur amburu todek inggimo wokbiluk, yoraga dogolir, “Anggur yi eti, Ar Allah Ane amburu yabungga erigin yirige mende, An Namep paga telekma bege mende ma, kir nen noba ebernaku dogolir kalok eku dogono o,” yiluk yirige. 26Ebe eta etegerogo, o kup keyam kir roti inom, anggur agi todek inom, nunggu dogolir, Tuhan wartagage wene eti yorar lagwi kinagik, Ar warigin kudi paga aruwak o.
27Etegerogo erir lagunem, ir akuni amberak nen, Ar Tuhan agarom roti inom, agi anggur todek inom, nakbuk mende kigik nunggwi paga, Ar Tuhan ebe inom, amep inom, wurakige oba maduk erogo birtagwi o. 28Ebe eta paga, ir akuni inadik ndak nen inoba mbenagago nen, erom inom, i todek inom, nunggu dogorak o. 29Nenaluk, ir akuni nen roti inom, anggur inom yi, Ar Tuhan oba um palekdek dogolir nengga kalok, Ar Allah nen hukuman oba bigin o. 30Ebe eta ekwi paga nen, kir akuni endoma u kinaka, nen kinobarne dek aga, eku dogolir kambir lektagwi o. 31Ogwe nir ninebe ninobabur alebagik ndak pik pak agubak kigirtamo, Ar Allah nen hukuman ninoba bigin dek o. 32Ogwe nir yogondak ya, Ar Allah nen hukuman ambi kinoba wuraka kalok, yi naruk warik nen yiluk lakmbirok nake o yiluk, andagu dogoni o. Eta ekwi paga, nir yabongga o yoma werek mende ninom, hukuman ninoba bigin dek o.
33Eti paga nen, nawor nakbur, kir Tuhan mende perjamuan nuwok nen yiluk, kuwak ekdiluk, kinil kinapma lak wak yiluk, nen perjamuan dago nunggu dogono o. 34Kir amberak kinagarom abu kalok, kinuma nen mondok nalok wagu dogorak eti pano o. Kir wene yorkeragi ya ndak-ndak eku dogolir kalok, kir tamban eruwok nen yiluk kuwak ekunem, Ar Allah mende hukuman kinoba wurabi warigin mondok dek o. Nen Wene amberak eti, an nebe kinoba watuk kalok mbililogo yokeragin o.
Currently Selected:
1 KORINTUS 11: WLW
Highlight
Copy
Compare
Share
Want to have your highlights saved across all your devices? Sign up or sign in
