ZEFANYA 3
3
Yerusalem nihukung dang nipakasal᷊amati
1Kasasilaka su Yerusalem, soa ko mal᷊amuhu ko makihaghi mundongka su Mawu dang ko manira taumatange sisane! 2Kasasilaka su soa ko mandi manarima l᷊aingati u Mawu, dang l᷊ai ta mangindakang manga tatughu-E, ko ta manarakang sisipi su Mawu, dang ta mundo tul᷊ung si Sie!
3Manga tumbonang u soa e'e kere singa ko kapunggahari. Manga mamamonesi kere manga sarigala ko nal᷊unusi; i sire maanggang kahingang hakiu sarang duhi simpoto takoae ko ireso guna ngu ndai mal᷊ou. 4Manga nabie takoae pandung su hal᷊ie dang ta ikapangimangeng; manga imam nupakal᷊amuhu apang ko seng nitani guna ngu Mawu dang nangal᷊iu manga tita ngu Mawu Ruata guna ngu kal᷊auntung su watangeng i sire sisane. 5Kateho Mawu mborong ene su soa e'e; I Sie sintinia mukoa ko muhino dang mborong ta sarang paghisa ko nunsal᷊a. Sintinia mal᷊ukari nal᷊ahe I Sie mangonggo u kal᷊aadili su umati-E. Kateho, taumata ko wugha ngu kal᷊aadili su soa e'e tatapi mukoa ko dal᷊ai takoae meange.
6 Mawu nuhengetang, “Ia seng nupakailang bangsa maul᷊i; manga soa ngi sire seng Daku nighaghoro, dang manga meseli l᷊au manga manara ngi sire Daku nikoa l᷊inau kal᷊aopehi. Manga soa ngi sire ko mal᷊umpi takoae taumatange dang manga l᷊al᷊enge marumasi. 7Su sipirang-Ku, ‘Orasi i'i nal᷊ahe umati-Ku mangadati si Sia dang mundaringihi apang tatughu-Ku. Tantu i sire makatinaung#3:7: Pira mbau salenang ko tuwei: i sire makatinaung; Ibrani: i sire sarung ta ipakaghaghoro. tatintiro ko seng Daku nionggo si sire.’ Kateho nal᷊ahe, i sire lebe marading l᷊ai mukoa ko dal᷊ai bou ko horo.
8Kateho pakaingati! Pangampal᷊ite l᷊ounge Ia muwangung kere mangangalaki. Watu'u seng Daku niputusi guna ngu mangomol᷊i manga bangsa l᷊au manga kararatuang guna ngu mupasuwang u wawal᷊uang-Ku si sire. Kaul᷊i u dunia sarung masue matutung u wawal᷊uang-Ku.
9Kateho bou e'e Ia sarung mamal᷊u naung u manga bangsa e'e, hakiu i sire kitang mukal᷊iomaneng si Sia, dang wal᷊inge su manga ilah. Manga bangsa e'e kaul᷊ie sarung mundaringihi si Sia. 10Katewe bou Sudan ko marau, umati-Ku ko nukaesi e'e sarung musumongo dang manumba ngu korbang si Sia. 11Su l᷊ou e'e, ei umati-Ku, i kumu ta wahal᷊uasu mupundang mamea l᷊ai, ual᷊ingu seng nundongka si Sia. Ia sarung manokol᷊i apang taumata ko maoboti l᷊au masege, dang i kumu sarung ta mundongka l᷊ai si Sia su bongkong-Ku ko susi.#3:11: bongkong-Ku ko susi: Wul᷊uri u Sion. 12Pai se'e sarung Daku iwala patana bangsa simbau ko marinda naunge, ko mangasahi tul᷊umang-Ku. I sire botonge matana pai se'e. 13#Kl᷊h. 14:5 Tau Israel ko mborong nal᷊umbei, sarung ta mukoa ko dal᷊ai l᷊ai si sai-sai; i sire sarung ta mul᷊eo l᷊ai dang l᷊ai ta mangakal᷊i. I sire sarung mapia wiahi dang matatapi, dang ta mataku si sai-sai l᷊ai.”
Samperi kal᷊al᷊uasi
14Ei Israel, pahul᷊uasi dang pusamperi!
Ei Yerusalem, pahul᷊iaghi dingang kal᷊abo u naung!
15Watu'u Mawu nangiro muhukung si kumu;
I Sie seng nanguseri apang roka i kumu.
I kumu isirungang u ratu ngu Israel, Mawu ngi kumu sisane.
Orasi i'i i kumu ta wahal᷊uasu mataku l᷊ai.
16Sarung murating temponge manga taumata ntihang sarung mangul᷊i,
“Ei Yerusalem, kumbahang mataku dang madio naung.
17I kumu isirungang u Mawu Ruata ngi kumu ko matoghasi.
I kumu nakauntung ual᷊ingu kawasang-E.
Mawu mal᷊uasi dang kal᷊iaghi ual᷊ing i kumu,
su l᷊al᷊ung u kakindaghi-E nionggo-E si kumu wiahi ko wuhu.
18Ual᷊ing i kumu, I Sie kasamperi mal᷊uasi
kere taumata ko kapusal᷊iwange.”
Hengetang u Mawu,
“Kasasilaka ko mangantighi si kumu seng Daku nipakailang.
Kal᷊ahina ngi kumu seng Daku nimu.#3:18: Ayeti kapul᷊owal᷊unge su l᷊al᷊ung u naska Ibrani ta mal᷊ahe.
19Temponge sarung sumongo mananira si kumu Daku ipakaghaghoro,
dang taumata ko kento Daku ipakasal᷊amati;
kaul᷊ie ko nirume Daku iaha pakapul᷊e.
Kal᷊ahina ngi sire Daku iwal᷊u pakakoa l᷊aadati;
su manga apang tampa, dang l᷊ai su kal᷊abo u dunia,
i sire sarung ipakawantughi dang idalo.
20Temponge sarung ruminta,
taumata ngu ko nukaesi Daku iaha pakapul᷊e.
I kumu Daku ikoa pakateleng su kal᷊abo u dunia,
dang kapapia ngu wiahi kumu sarung sau Daku ipakaul᷊e.”
Mawu seng nuhengetang.
Currently Selected:
ZEFANYA 3: PLT
Highlight
Share
Compare
Copy
Want to have your highlights saved across all your devices? Sign up or sign in
