ZEFANYA 2
2
Kakui guna ngu panintang u dosa
1Ei bangsa ko wugha ngu mamea, pakatilangko 2suhoro u i kumu mahango dang mamara kere bungang!#2:2: Simbau salenang ko tuwei: su horo i kumu mahango dang mamara kere bungang. Katitongko suhoro u masongo l᷊ou wawal᷊uang u Mawu, dang i kumu ikahinong u wawal᷊uang ngu Mawu ko karilie e'e. 3Pusul᷊eko sarang koa u Mawu, ei kaul᷊i u taumata ko marinda naunge ko ene su wanua i'i, dang kaul᷊i u taumata ko matuhu su apang parenta-E. Pukakanoako sintuhu dingang u kao u Mawu, dang pakasanako watangengu su saruang-E. I sai matitong i kumu sarung mal᷊iwiri bou pul᷊ahukung su l᷊ou Mawu manode u wawal᷊uang-E.
Kakutoki su manga bangsa ko masandighi u Israel
4 #
Yes. 14:29-31; Yer. 47:1-7; Yeh. 25:15-17; Yl. 3:4-8; Am. 1:6-8; Za. 9:5-7 Su soa ngu Gaza takoae sarang singkatau ko sarung ipakasal᷊amati. Askelon sarung marumasi takoae taumatange. Taumata ngu Asdod sarung itokol᷊i su l᷊al᷊ung simbau pangangalo ko nupahuwi su l᷊ou tiwatu dang taumata ngu Ekron sarung ipatamai bou soa ngi sire. 5Kasasilaka si kumu, ei taumata ngu Filistin, bangsa ko natana su kanandu u apeng. Mawu seng nanantu hukumang si kumu. I Sie sarung mupakawinasa ngi kumu, takoae sarang singkatau bo i kumu ko sarung mal᷊iwiri. 6Tampa i kumu masandighi u l᷊auri makoa nguda u rindulu; manga raseng u mul᷊al᷊ukari l᷊au manga kuhung u domba sarung iwangung su se'e. 7Taumata ngu Yehuda ko nal᷊iwiri, sarung matana su tampa i kumu. I sire sarung mul᷊ukari binatang papal᷊iharang su tana e'e, dang su tempo ngu huwi i sire sarung matiki su manga wal᷊e ngu tau Askelon. Watu'u Mawu Ruata ngi sire sarung manirung si sire l᷊ai dang mukoa puwawiahi sire sau mapia.
8 #
Yes. 15:1–16:14, 25:10-12; Yer. 48:1–49:6; Yeh. 21:28-32, 25:1-11; Am. 1:13-15 Mawu Ko Makawasa nuhengetang, “Seng Daku nikaringihi manga bangsa Moab l᷊au Amon nuhinakang l᷊au nuheghesi umati-Ku. I sire nangoboti sarung mangaho tana ngu umati-Ku. 9#Kar. 19:24Ual᷊ingu Ia ko wiahi, Mawu Ruata ngu bangsa Israel, Ia sarung mupakawinasa Moab l᷊au Amon kere Sodom l᷊au Gomora. Manga wanua e'e sarung mapene dingang u manga pahighi ngu asing l᷊au manga l᷊inau kal᷊aopehi sarang mal᷊iwue ko nakoa ghal᷊umue. L᷊umbei ngu umati-Ku ko nal᷊iwiri sarung muhampasi taumatange, dang mangaho tana ngi sire.”
10Ko kere'e taumata ngu Moab l᷊au Amon sarung ihukung ual᷊ingu oboti l᷊au sege i sire, l᷊ai ual᷊ing i sire seng nuhinakang umati Mawu Ko Makawasa. 11Mawu sarung mukoa si sire su katatakutang. I Sie sarung mupakaghaghoro ngu manga dewa su dunia. Bou e'e apang bangsa sarung munggaweti su Mawu, simbau-simbau su wanua ngi sire sisane.
12 #
Yes. 18:1-7 L᷊ai taumata ngu Sudan sarung ihukung u Mawu dingang hukumang papate.
13 #
Yes. 10:5-34, 14:24-27; Nah. 1:1–3:19 Bou e'e Mawu sarung mupake u kawasang-E guna ngu mupakaghaghoro ngu Asyur. Soa ngu Niniwe sarung koateng pakarumasi l᷊au makoa tana l᷊inggi. 14Su se'e ghapang u apang haghi ngu binatang sarung mul᷊umal᷊oka dang mangindul᷊e. Manga manumeung sarung musal᷊ehi su manga l᷊inau kal᷊aopehi e'e dang mukumiha bou manga janela. Burung boka-boka sarung munggal᷊o su manga sal᷊awaku ngu tukari. Kau cemara su manga bangunang u soa e'e sarung masue iwuwul᷊i. 15E'e ko sarung mariadi su soa ko marame e'e dang ko mutuhung watangenge ko matatapi. Taumatange musipiri himoneu soa ngi sire e'e ko soa ko kal᷊abokange su dunia. Wal᷊inge gampang karumasie tampa e'e, takoae taumatange su l᷊ikuru manga binatang l᷊ul᷊u ko nusal᷊ehi su se'e! Apang taumata ko mul᷊umiu soa e'e sarung mahuwi dang makapundang mataku.
Currently Selected:
ZEFANYA 2: PLT
Highlight
Share
Compare
Copy
Want to have your highlights saved across all your devices? Sign up or sign in
