HAGAI 1

Parenta ngu Mawu tadeau sau pamangung Wal᷊e ngu Mawu

1 # Ezr. 4:24–5:2, 6:14 Su taung karuange pamarentahang i Ratu Darius su Persia, su tanggali kahimotongange wul᷊ang kanunge, Mawu nuhengetang bou mohong I Nabi Hagai. Tatanata ngu Mawu e'e pakihabari si Zerubabel ana i Sealtiel, gubernur u Yehuda, dang si Imam ko L᷊abo Yosua ana i Yozadak.

2 Mawu Ko Makawasa nuhengetang si Nabi Hagai, “Bangsa i'i nangul᷊i himoneu tangkeng temponge sau mamangung Wal᷊e-Ku.” 3Bou e'e bou mohong i Nabi Hagai, Mawu nuhengetang su umati-E, 4“Ei umati-Ku, apa seng temponge si kumu matana su wal᷊e ko matoghasi l᷊au ko masikari, arawe Wal᷊e-Ku mborong naghaghoro. 5Kenang, putuhung pakapia-pia kakakoa i kumu! 6I kumu seng nanawuhi sasuang maul᷊i, kateho ko nitipo ngi kumu kitang singkodo. I kumu pia kang, kateho ta makal᷊aeri tiang i kumu. I kumu pia anggori, kateho ta nakawansuhi si kumu. I kumu pia l᷊aku, kateho ta makasal᷊ighang badang i kumu. Dang wawaehi ko itarima u mul᷊ahal᷊i ta makasumpu puwawiahi sire. 7Apa i kumu ko wugha, nakurawe hal᷊i e'e nariadi? 8Orasi i'i, sakako sarang manga bongkonge pangal᷊a kau, bou e'e wangungko Wal᷊e-Ku; kuteu Ia sarung makapundang mal᷊uasi dang Ia sarung isumba l᷊ai kere ko su hinonge. Kenang, putuhungko pakapia kakakoa i kumu! 9I kumu mangiral᷊ing suke ngu panipong ko maul᷊i, wugha ngu ko nikarea i kumu kitang singkodo kahingang; i kumu numbawa e'e napul᷊e, kateho suke ngu panipong e'e Daku nitiu, hakiu nasue niwawa u anging.#1:9: Daku nitiu … anging arako: Daku nipakabuhu. Nakura Ia nukoa kere'e? I'i sasimbahie: Ual᷊ingu Wal᷊e-Ku mborong naghaghoro, arawe i kumu kaul᷊ie maghising kapamangunge wal᷊e ngi kumu simbau-simbau. 10E'e sabapie takoae tahiti hakiu sasuang takoae ko nutumuwo. 11Ia seng nupasongo ngu kal᷊ahango su tana l᷊au su manga bongkonge, su manga anseri u gandung l᷊au su manga awuhi anggori dang su manga awuhi zaitung, dang su apang sasuang su wawo u tana i'i, sarang l᷊ai su taumata l᷊au su binatang dang l᷊ai su apang hal᷊i i kumu.”

Umati Israel matuhu su parenta ngu Mawu

12Bou e'e i Zerubabel l᷊au i Yosua dingang u kaul᷊i u umati Israel ko seng nusul᷊e bou pundandumekang#1:12: ko seng nusul᷊e bou pundadumekang arako: ko ta nitaweng sarang pundadumekang. su Babel, nutumuhu manga didato ngi Hagai, raroi u Mawu e'e. I sire nukoa apang ko niparenta ngu Mawu si sire, ual᷊ingu mataku u Mawu.

13Bou e'e i Hagai nangul᷊i su ana u kawanua tatanata ngu Mawu himoneu Mawu seng nudiandi sarung manirung si sire.

14Ko kere'e Mawu nanganoa naung u Gubernur Zerubabel, Imam ko L᷊abo Yosua l᷊au kaul᷊i u taumata ko seng nusul᷊e bou pundandumekang, tadeau i sire kaul᷊ie muhal᷊i mamangung Wal᷊e ngu Mawu Ko Makawasa, Mawu Ruata ngi sire. 15I sire nanita nuhal᷊i su tanggali kaduampul᷊opae, wul᷊ang kanunge su taung karuange tempo ngu pamarentahang i Ratu Darius.

Currently Selected:

HAGAI 1: PLT

Highlight

Compare

Copy