ZEFANYA 1
1
1 #
2Mar. 22:1–23:30; 2Taw. 34:1–35:27 I Zefanya ko ana i Kusyi. Putatuhu u salakbonge bou wawae sintarai e'e ko i Kusyi, i Gedalya, i Amazia l᷊au Ratu Hizkia. Ko i'i tatanata ngu Mawu si Zefanya su tempo ngi Ratu Yosia ana i Amon namarenta su Yehuda.
L᷊ou pamamonesi u Mawu
2 Mawu nuhengetang, “Ia sarung mupakahupusi apang patiku su dunia: 3kaul᷊i u taumata l᷊au binatang, nasu burung l᷊au kina. Taumata ko dal᷊ai sarung Daku ipakasue.#1:3: Botonge mariadi mangal᷊enge: sarung Daku ipakawinasa; Ibrani: makoa tatihokang. Kaul᷊i u taumata sarung Daku pakawinasa, takoae sarang singkatau ko Daku iwala wiahi. Ia, Mawu, seng nuhengetang.
4Ia sarung muhukung taumata ngu Yerusalem l᷊au kaul᷊i u Yehuda. Manga l᷊umbei ngu pananumbang Baal sarung Daku ipakailang bou manga tampa e'e. Manga imam ko nutangkiang Baal sarung il᷊iwuhi kahingang. 5Ia sarung mupangiro i sai-sai ko maawi sarang atu guna ngu manumba matangutiti, wul᷊ang l᷊au manga wituing. Sarung Daku ipakailang l᷊ai i sire ko manumba si Sia dang nutewa masatia si Sia, kateho l᷊ai nutewa su areng u Dewa Milkom. 6Ia sarung mupakawinasa ngi sire ko ta nusumongo sarang koa-Ku arako nundo l᷊aaha-Ku dang ko seng nanintang u Ia dang mandi l᷊ai mutumuhu si Sia.”
7L᷊ou ngu Mawu seng masandighi, su l᷊ou e'e Mawu Ruata sarung mukumanoa; watu'u e'e, putingkarumasite su saruang-E. Mawu kapusasadiange guna ngu mamoto umati-E kere korbang sasumba dang I Sie seng nunoti manga roka u Yehuda. 8“Su l᷊ou pamamoto e'e,” hengetang u Mawu, “Ia sarung muhukung manga tumbonange, manga ahusi u ratu, dang kaul᷊i u taumata ko nutumuhu narang u tau raghi. 9Ia sarung muhukung kaul᷊i u taumata ko munggaweti kere taumata ko wugha ngu Ia, dang ko nanako l᷊au namate guna ngu mamene wal᷊e ngu tuang i sire#1:9: wal᷊e ngu tuang i sire arako: kuil u dewa ngi sire. dingang u manga rarotong ko nihampasi.”
10“Su l᷊ou e'e,” kere'e hengetang u Mawu, “sarung ikaringihi sangi su Tukari Soa Kina. Tingihi u kahuang sarung ikaringihi bou kampong ko wuhu, dang tingihi ghal᷊udu u kal᷊aopehi ko mauha sarung ikaringihi bou manga bongkonge. 11Pukahuangko dang pumpal᷊eheko su tempo ngu i kumu nakaringihi e'e, ei taumata ngu soa su bahageang u wawae, watu'u kaul᷊i u mudadagang l᷊au manga taumata ko nupangirang u doi seng nipate!
12Su tempo e'e Ia sarung mangal᷊a obori, dang mamulengkari soa ngu Yerusalem. Sarung Daku ihukung taumatange ko ta mupandung e'e dang ko mumbatu kaoe sisane, dang ko musipiri himoneu Ia, Mawu ta sarang paghisa mukakanoa kiri'i arako kere'e. 13Rarotong i sire sarung ihampasi dang manga wal᷊e ngi sire ipakaghoghahi. I sire sarung mamangung wal᷊e, kateho ta matana su se'e. I sire sarung mamal᷊ihara awuhi anggori kateho ta manginung anggori.”
14L᷊ou pamamonesi u Mawu seng masandighi, ore, seng masandighi kahingang, katewe sarung maehong sumongo. L᷊ou e'e napene u kasasusa, hakiu parajuriti ko katoghasenge l᷊ai#1:14: L᷊ou … matoghasi l᷊ai arako: Raringihiko! L᷊ou ko makatataku e'e sarung sumongo, hakiu parajuriti ko katoghasenge sarung … sarung mukahuang ual᷊ingu nikasueng pul᷊aharapi! 15L᷊ou e'e ko l᷊ou ngu wawal᷊uang, kasasukari l᷊au kasasusa, l᷊ou ngu kal᷊aopehi l᷊au punggaghoghahi, l᷊ou ngu kararundung l᷊au kasasul᷊ako, l᷊ou ko mal᷊uwuhi l᷊au pia hiwunge. 16Su kanandu u l᷊ou e'e ikaringihi tingihi u tarompeti l᷊au kiha u parang bou manga tau ko wawahani ko nangalo manga soa ko pia tatindae l᷊au manga manara ko mararange.
17 Mawu nuhengetang, “Ia sarung mupasongo ngu silaka maul᷊i su taumata, hakiu I sire sarung musasaghipo kere taumata ko wuta. I sire seng nubardosa si Sia, dang orasi i'i daha ngi sire sarung masuwang kere ake, dang manga bangke ngi sire sarung mabuhu su wawo u tana.”
18Su l᷊ou ko makatataku e'e Mawu sarung manode u wawal᷊uang-E, kuteu apang wul᷊aeng l᷊au sal᷊aka ngi sire sarung ta makasal᷊amati si sire. Kaul᷊i u dunia sarung maghaghoro kahingang itutung dingang u wawal᷊uang-E. Dingang singkahuwi sarung isawu-E apang sinango su dunia i'i.
Currently Selected:
ZEFANYA 1: PLT
Highlight
Share
Compare
Copy
Want to have your highlights saved across all your devices? Sign up or sign in
