ZAKHARIA 8
8
Mawu nudiandi sau mamangung Yerusalem
1 Mawu Ko Makawasa nangonggo u tatanata i'i si sia, 2“Ia mo kahingang mutul᷊ung u Yerusalem ual᷊ingu Ia mukumindaghi kahingang su taumatange, dang ual᷊ingu kakindaghi-Ku e'e naung-Ku matiti su manga roka u soa e'e. 3Ia sau musul᷊e sarang Yerusalem, soa-Ku ko susi e'e, dang matana su se'e. Yerusalem sarung ikakil᷊al᷊a kere soa ko masatia, dang bongkong u Mawu Ko Makawasa#8:3: bongkong u Mawu Ko Makawasa. Bongkong Sion. sarung isigho Bongkonge ko Susi. 4Su peleng u soa ngu Yerusalem, sarung sau kumangiang manga i tete l᷊au i nene ko seng maghurang kahingang hakiu l᷊umal᷊eng dingang u tiking. 5Manga l᷊al᷊eng su soa sarung sau mapene u manga rario ko kaputaghunange.
6Hal᷊i e'e pari tuhungang ta mariadi su manga taumata bou bangsa i'i ko mborong wiahi, kateho si Sia takoae ko ta mariadi. 7Ia sarung mupakasal᷊amati umati-Ku bou manga wanua tampa i sire seng nihengke, 8dang mumbawa si sire pusul᷊e bou raki dang bou wahe, hakiu i sire sau matana su Yerusalem. I sire sarung makoa umati-Ku dang Ia Mawu Ruata ngi sire. Ia sarung mamarenta si sire dingang masatia dang maadili.”
9 Mawu nuhengetang su umati-E, “Pakatoghasiko naung i kumu! Orasi i'i i kumu mundaringihi manga didato ko seng mbuae niul᷊i u manga nabi su tempo ngu meseli Wal᷊e-Ku nipilo, guna ngu sau iwangung. 10Su horo u e'e takoae ko botonge makaupili mamaehi sagheri u taumata arako binatang, dang takoae ko makapundang matatapi bou sasal᷊uka u roka. Ia seng namul᷊a si sire tadeau puraroka simbau dingang ko wal᷊inge. 11Arawe orasi i'i manga taumata bou bangsa i'i ko mborong wiahi Daku ikoa mutatintang dingang ko horo. 12I sire sarung manawuhi bibiti dingang purarame. Manga kau anggori sire sarung muwua, tana sarung mangonggo u sukenge, dang tahiti sarung murumasehi maul᷊i-ul᷊i. Kaul᷊i u al᷊amati e'e Daku ionggo su manga taumata bou bangsa i'i ko mborong wiahi. 13Ei taumata ngu Yehuda l᷊au Israel! Su tempo ko nal᷊iu, boko manga tau raghi mukakutoki, i sire mangul᷊i, ‘Mal᷊umbako silaka ko mahino su Yehuda l᷊au Israel mahino si kau l᷊ai!’ Kateho Ia sarung manal᷊amati si kumu, hakiu manga tau raghi e'e sarung mangul᷊i i sire, l᷊au i sire ‘Mal᷊umbako al᷊amati ko mahino su Yehuda l᷊au Israel mal᷊intu l᷊ai su watangengu!’ Watu'u e'e pakatoghasiko naung i kumu dang kumbahang mataku!”
14 Mawu Ko Makawasa nuhengetang, “Su tempo ngu manga i upung i kumu nakakoa si Sia nuwawal᷊uang, Ia namutusi sarung muhukung si sire pakaturu. Ia ta namal᷊u putusang-Ku e'e, kateho Daku nipal᷊al᷊eng. 15Arawe orasi i'i Ia sarung mangal᷊amati taumata ngu Yerusalem l᷊au taumata ngu Yehuda. Inau, kumbahang mataku. 16#Ef. 4:25 Ko i'i manga parenta ko mambeng koateng u. Boko mudidato, pangul᷊i ko nuhino su sinsul᷊ungu. Pangonggoko putusang u pangadilang ko maadili dang ko mumbawa purarame. 17Kumbahang mukirou ko dal᷊ai su sinsul᷊ungu. Kumbahang mutewa l᷊eo. Ia mubinsi u l᷊eo l᷊au ko ta maadili dingang u kal᷊ahasa.”
18 Mawu Ko Makawasa nangonggo u tatanata i'i si sia guna ngu umati-E. 19“Puasa ko ikoa su wul᷊ang kapae, kal᷊imange, kapitunge, l᷊au kapul᷊onge sarung mariadi sal᷊iwang ko napene u kal᷊al᷊iaghi l᷊au kal᷊al᷊uasi su taumata ngu Yehuda. Koako kabanarang l᷊au purarame!”
20 Mawu Ko Makawasa nuhengetang, “Temponge sarung murating taumata ngu maul᷊i soa#8:20: maul᷊i soa arako: manga soa ko l᷊abo. sarung musumongo sarang Yerusalem. 21Taumata ngu soa simbau sarung mangul᷊i su taumata ngu soa ko wal᷊inge, ‘Maite i kite matamai manumba Mawu Ko Makawasa dang mukahioro al᷊amati-E. Maiko dingang i kami!’ 22Bou e'e maul᷊i taumata dang maul᷊i bangsa ko matoghasi sarung musumongo sarang Yerusalem tadeau manumba si Sia, Mawu Ko Makawasa dang mukahioro u al᷊amati-Ku. 23Su l᷊ou-l᷊ou e'e mapul᷊o tau raghi sarung musumongo sarang singkatau taumata ngu Yahudi dang mangul᷊i, ‘I kami mo l᷊ai ial᷊amateng kere i kumu; watu'u i kami nakaringihi himoneu Mawu Ruata nangal᷊amati si kumu.’ ” Mawu Ko Makawasa seng nuhengetang.
Currently Selected:
ZAKHARIA 8: PLT
Highlight
Share
Compare
Copy
Want to have your highlights saved across all your devices? Sign up or sign in
