ZAKHARIA 7
7
Mawu nanughu puasa ko ta matulasi
1Su tanggali kapae su wul᷊ang Kislew, e'e ko wul᷊ang kasionge, su taung kapae pamarentahang i Ratu Darius, Mawu nangonggo u l᷊aingati sau si sia.
2I sire ko natana su Betel seng nundoi si Sarezer l᷊au si Regem-Melekh dingang u manga taumatange pakoa sarang Wal᷊e ngu Mawu Ko Makawasa guna ngu pukahioro al᷊amati-E. 3I sire l᷊ai niroi pakina sarang koa u manga imam l᷊au manga nabi, kiri'i, “Ko Mborong hinonge i kami mukahuang u kaghaghoghahi u Wal᷊e ngu Mawu dingang mupuasa sintinia wul᷊ang kal᷊imange kere ko nikoa i kami dingang u taunge l᷊iwuenge?”
4Ko i'i l᷊aingati u Mawu ko nusumongo sarang koaku. 5Hengetang-E, “Habariko su kaul᷊i u taumata ngu wanua i'i dang su manga imam, himoneu manga puasa l᷊au kahuang ko nikoa i sire su wul᷊ang kal᷊imange l᷊au kapitunge su kanandu u pitumpul᷊o su taunge i'i wal᷊ingewe l᷊aadati si Sia. 6L᷊ai su tempo ngu i sire nukumang l᷊au nanginung, i sire nundea kawawansuhi watangeng i sire sisane.”
7Ko e'e nipuhengetang u Mawu bou manga nabi su tempo nal᷊iu su tempo ngu Yerusalem mborong nikatanakeng dang taumatange kapuwiahi su l᷊al᷊ung u kapapia. Su tempo e'e taumata wal᷊inge kitang natana su manga kampong su sindihang u soa kateho katewe su bahageang u timuhi dang su manga l᷊aeri u bongkonge su simbuka ngu wahe.
Sasukung nakakoa pundandume
8 Mawu Ko Makawasa nangonggo u l᷊aingati i'i si sia, 9“Su manga taung tamai nal᷊iu Daku nionggo manga parenta i'i su umati-Ku, ‘I kumu mambeng putingkaadili, pukakindaghi l᷊au pakapia naung su tingo ngu sinsul᷊ungu. 10Kumbahang manira manga ko wawal᷊u, manga ana ko kasisi, manga tau raghi ko natana su tal᷊oara i kumu, arako si sai-sai ko su l᷊al᷊ung u kasasusa. Dang kumbahang l᷊ai mukirou ngu ko dal᷊ai su tingo ngu sinsul᷊ungu.’
11Kateho umati-Ku ko makul᷊i kahingang dang tinga-tingari mandi mundaringihi; i sire naninsing tul᷊i ngi sire tadeau ta makaringihi. 12I sire nupakakitihi naung i sire hakiu nakoa kere watu. Ia nuwawal᷊uang kahingang ual᷊ing i sire ta mutumuhu manga tatintiro ko seng Daku nionggo si sire bou manga nabi ndahuwite. 13Ia ta nusumimbahi kakal᷊iomaneng i sire, ual᷊ing i sire l᷊ai ta nundaringihi su tempo ngu Ia nuhengetang. 14Kere suwu-suwu, Ia seng nanokol᷊i si sire hakiu i sire nasihasa natana su manga wanua ngu tau raghi. Tana ko matawa i'i seng nakoa ko marumasi takoae taunge dang nal᷊inggi.”
Currently Selected:
ZAKHARIA 7: PLT
Highlight
Share
Compare
Copy
Want to have your highlights saved across all your devices? Sign up or sign in
