ZAKHARIA 14

Yerusalem l᷊au manga bangsa

1L᷊ou pamamonesi u Mawu seng masandighi. Kuteu Yerusalem sarung ihampasi, dang sukenge sarung ipupapahia su tingo ngu mata ngu. 2Mawu sarung munggopol᷊i kaul᷊i u bangsa tadeau pangalo Yerusalem. Soa e'e sarung iaho, manga wal᷊enge ihampasi, dang manga kowawine il᷊amuhukang. Simbahageang darua bou taumatange sarung iwawa sarang pundandumekang, kateho l᷊umbeinge sarung matana su soa e'e. 3Bou e'e Mawu sarung mangansing dang muparang mundoka manga bangsa e'e, kere ko seng nikoa-E su tempo horo. 4Su l᷊ou e'e I Sie sarung murumarisi su Wukiri u Zaitung, su simbuka ngu raki u Yerusalem. Kuteu Wukiri u Zaitung sarung mawuka ual᷊ingu wal᷊ange ko mal᷊oahi, manita bou raki sarang wahe. Stenga bou bongkonge e'e sarung mukumanoa sarang sawunahi, dang stenga l᷊ai sarang timuhi. 5I kumu sarung mutumal᷊ang bou wal᷊ange ko namahia bongkonge e'e nakoa darua.#14:5 Botonge mariadi mangal᷊enge: I kemu sarung tumal᷊ang … darua. I kumu sarung mutumal᷊ang kere manga i upung i kumu su tempo ngu nariadi rinuhi su tempo ngu pamarentahang i Uzia, ratu ngu Yehuda. Bou e'e nasongote Mawu Ruataku, nitakirang u kaul᷊i u malaikati.

6Boko l᷊ou e'e ruminta, sarung takoae l᷊ai wal᷊umuhi ko mal᷊al᷊inding arako eisi.#14:6: Botonge mariadi mangal᷊enge: anging ko matinoung arako eisi. 7Su l᷊ou e'e takoae l᷊ai kararundung. L᷊ou sarung tatapi masua, l᷊ai su tempo ngu huwi. Kateho kitang Mawu ko matitong kangereng l᷊ou e'e ruminta.

8 # Yeh. 47:1; Yoh. 7:38; Kl᷊h. 22:1 Su l᷊ou e'e, ake ko matilang sarung maansehi bou Yerusalem; stenga bou ake e'e sarung maansehi sarang L᷊auri ko Nate dang stengange l᷊ai sarang L᷊auri su Tal᷊oarae. Ake e'e sarung maansehi su kanandu u taung, maneng su tempo ngu tahiti arako l᷊ai su tempo ngu titi. 9Kuteu Mawu sarung mamarenta kere ratu su kal᷊abo u dunia; apang taumata sarung manumba si Sie kere Mawu Ruata dang makakil᷊al᷊a si Sie dingang u areng ko musul᷊ung.

10Kaul᷊i u wanua bou Geba su sawunahi sarang Rimon su timuhi, sarung makoa tenenge. Arawe Yerusalem sarung mahengke marange, lebe marange bou tana su sindihange; soa e'e sarung mawunahi bou Tukari Soa ngu Benyamin murating sarang Tukari Soa ngu Wukunge, e'e ko tampa u tukari u soa Kahimotongange dang bou Manara Hananel murating sarang tampa u pamuhukang anggori koa u ratu. 11#Kl᷊h. 22:3Manga taumata sarung matana matatapi su soa e'e, takoae papataku u kawawinasa.

12 Mawu sarung mupasongo ngu sahinda ko makatataku su kaul᷊i u bangsa ko seng nuparang nundoka Yerusalem. Mata l᷊au lila ngi sire, sarang kal᷊abo u badang i sire sarung mabuhu tintal᷊a i sire mborong wiahi.

13Su l᷊ou e'e Mawu sarung mukoa manga bangsa e'e mubingo kahingang dang su katatakutang hakiu apang taumata sarung maname ringange ko ene su simbukange dang pahangenge. 14Manga taumata kol᷊aese su Yehuda sarung muparang manatawang Yerusalem. Kere barang ko ihampasi i sire sarung mangal᷊a kaul᷊i u rarotong u manga bangsa su sindihange kere wul᷊aeng, sal᷊aka l᷊au pakeang pia owol᷊i.

15Simbau sahinda ko l᷊abo l᷊ai sarung mahino su kawal᷊o, bagal, onta l᷊au keledai, dingang u kaul᷊i u binatang su pukakemang u roka.

16 # Im. 23:39-43 Bou e'e kaul᷊i u taumata ko mborong wiahi su tal᷊oara u manga bangsa ko nangalo Yerusalem sarung matamai sarang soa e'e guna ngu manumba Ratu, Mawu Ko Makawasa, dang guna ngu mamantughi Sal᷊iwang Raseng u Raung. 17Boko pia bangsa ko mandi matamai sarang Yerusalem guna ngu manumba Ratu, Mawu Ko Makawasa, kuteu su wanuange sarung ta mutahiti. 18Dang boko tau Mesir mandi mamantughi Sal᷊iwang Raseng u Raung, kuteu i sire l᷊ai sarung ikahino ngu sahinda ko ipasongo ngu Mawu su apang bangsa ko mandi matamai munggaweti. 19Ko e'e hukumang su Mesir dang su kaul᷊i u bangsa ko mandi mamantughi Sal᷊iwang Raseng u Raung.

20Su l᷊ou e'e manga lonceng su pakeang u kawal᷊o sarung iukiri dingang u manga didato “Nitani guna ngu Mawu.” Manga pantisi su Wal᷊e ngu Mawu sarung iharigang kere manga wohosi sasumba su saruang u mesba. 21Kaul᷊i u pantisi su Yerusalem l᷊au su kal᷊abo u Yehuda sarung itani mariadi koa u Mawu Ko Makawasa. Taumata ko sarung manumba ngu korbang sarung mupake u e'e guna ngu mutung daging sasumba. Boko tempo e'e ruminta, sarung takoae l᷊ai mudadagang su Wal᷊e ngu Mawu Ko Makawasa.

Currently Selected:

ZAKHARIA 14: PLT

Highlight

Compare

Copy