ZAKHARIA 12
12
Yerusalem sarung ipakasal᷊amati
1Ko i'i tatanata ngu Mawu hal᷊i u Israel. Mawu ko namila kinoang, nundiadi dunia dang nangonggo u wiahi su taumata, nuhengetang, 2“Ia sarung mukoa Yerusalem kere wohosi ko pia tahoe anggori, manga wanua su l᷊ampunge sarung manginung e'e dang isemperi kere taumata ko bukang. Dang boko Yerusalem il᷊iwung, manga soa su wanua ngu Yehuda, ko mborong nal᷊umbei, sarung il᷊iwung l᷊ai. 3Kateho boko l᷊ou e'e seng nuruminta, Ia sarung mukoa Yerusalem kere watu ko mabuha; manga bangsa ko manal᷊uka muhengke watu e'e sarung masilaka. Kaul᷊i u bangsa su dunia sarung mutatamba tadeau mangalo Yerusalem. 4Su l᷊ou e'e kaul᷊i u kawal᷊o Daku ipakabingo dang manga sumasakenge Daku ipudong, taumata ngu Yehuda sarung Daku diagateng, arawe apang kawal᷊o ngu rokae Daku ipakawuta. 5Bou e'e manga walagheng u Yehuda sarung mangul᷊i su l᷊al᷊ung u naung, ‘Seng Mawu Ko Makawasa nangonggo katatoghasi su umati-E ko natana su Yerusalem.’
6Su l᷊ou e'e manga walagheng u Yehuda sarung Daku ikoa kere putung su l᷊al᷊ung u ambung u kau ngu putung arako obori ko kahenange su wa-wa u manga wukisi u gandung; i sire sarung mupakawinasa ngu manga bangsa su kaul᷊i u sindihange. Kateho taumata ngu Yerusalem sarung tatapi matana su soa dingang matatapi.
7Ia, Mawu sarung kahimotongange mangonggo u kal᷊auntung su sordado ngu Yehuda, tadeau l᷊aadati ko itarima u hintou ngi Daud l᷊au taumata ngu Yerusalem ta mangilebe bou l᷊aadati ko itarima u taumata ngu Yehuda ko wal᷊inge. 8Su l᷊ou e'e Ia sarung manirung taumata ngu Yerusalem; dang ko kal᷊omenge bou tal᷊oara i sire sarung makoa kere katatoghasi Daud. I sire sarung itata ngu hintou ngi Daud kere itata ngu malaikati-Ku, katewe kere Ia sisane manata. 9Su l᷊ou e'e Ia sarung mupakawinasa ngu apang bangsa ko manuka mangalo Yerusalem.
10 #
Yoh. 19:37; Kl᷊h. 1:7 #
Mat. 24:20; Kl᷊h. 1:7 Bou e'e hintou ngi Daud l᷊au taumata ngu Yerusalem sarung Daku onggol᷊ang naung ko mo mukumindaghi dang mo mukal᷊iomaneng. I sire sarung mutuhung si sie ko seng nitika i sire dang mukahuang kere taumata mukahuang u papate ngu ana mang simbau. I sire sarung mukahuang dingang susa, kere taumata ko nikailangeng u ana ko iyakang. 11Su l᷊ou e'e sarung pia kahuang ko hebati su Yerusalem, kere kahuang si Hadad-Rimon#12:11: Hadad-Rimon: Tikaku i'i areng i Dewa Baal, dewa manga sasuang su Kanaan l᷊au Siria. Boko manga sasuang nate su tempo ngu matinoung, manga dadalo ngu Baal nusipiri i Baal e'e ko seng nate dang i sire mul᷊ungkange. su Wal᷊ang u Megido. 12-14Bou e'e apang walagheng su wanua e'e sarung mukahuang simbau-simbau; walagheng hintou ngi Daud, walagheng hintou ngi Natan, walagheng hintou ngi Lewi, walagheng hintou ngi Simei, dang kaul᷊i u walagheng ko wal᷊inge. Apang walagheng sarung mukahuang simbau-simbau, dang manga taumata ko ese bou apang walagheng sarung mukahuang maghea bou manga kowawine.”
Currently Selected:
ZAKHARIA 12: PLT
Highlight
Share
Compare
Copy
Want to have your highlights saved across all your devices? Sign up or sign in
