ZAKHARIA 10
10
Mawu nudiandi sarung manal᷊amati umati-E
1Boko tempo ngu muwura masongo, pundoe tahiti su Mawu. Kuteu Mawu sarung mangomol᷊i winawa maitung, dang muparasehi tahiti ko l᷊abo hakiu manga anseri makoa ko ijo dang matemang su kaul᷊i u taumata. 2#Mat. 9:36; Mrk. 6:34 Manga taumata mundo tatul᷊ara su manga barhala l᷊au su manga tahawawua, kateho manga sasimbahie ko nikarea i sire ko l᷊eo dang koa takoae mangal᷊enge. Pia ko nul᷊ahe u ipi, kateho ko nil᷊ahe i sire kitang mupakapal᷊iri kumu, dang l᷊ahibori ko nionggoe takoae mangal᷊enge. Watu'u e'e ana u kawanua nukaesi kere domba. I sire nawala ual᷊ing u takoae pangaha.
3 Mawu nuhengetang, “Ia nuwawal᷊uang kahingang su mangangawasa ko namarenta umati-Ku, dang i sire sarung Daku ihukung. Kateho taumata ngu Yehuda ko koa-Ku, dang Ia, Mawu Ko Makawasa sarung mamal᷊ihara si sire. I sire sarung Daku ikoa kawal᷊o ngu parang ko matoghasi guna ngu Ia. 4Bou tal᷊oara i sire sarung Daku ipile mangangawasa, pangaha, l᷊au panglima ko sarung mamarenta umati-Ku.”#10:4: Bou tal᷊oara … umati-Ku arako: Kaul᷊i u mananihasa, mangangawasa, pangaha, l᷊au panglima – sarung singkahindo manintang Yehuda. 5Taumata ngu Yehuda sarung makauntung kere manga ko wawahani ko nul᷊inda-l᷊inda roka kere l᷊ota su l᷊al᷊eng. I sire sarung mutawakal᷊i ual᷊ingu Ia, Mawu mutul᷊ung i sire, dang pasukang u roka ko nusumake kawal᷊o sarung kaul᷊ie ikawata i sire.
6“Taumata ngu Yehuda sarung Daku ipakatoghasi,
umati Israel sarung Daku ipakasal᷊amati.
Daku iwawa i sire pusul᷊e sarang wanuange
ual᷊ingu Ia mukumindaghi si sire.
Sarung Daku ikoa i sire
kere bangsa ko tangkeng Daku nipusunial᷊i.
Ko Ia Mawu Ruata ngi sire,
apang kakal᷊iomaneng i sire sarung sau Daku raringihang.
7Umati Israel sarung kere ko wawahani ko matoghasi,
kere taumata ko nanginung anggori, i sire sarung mal᷊uasi.
Hintou ngi sire bou tempo sarang tempo
sarung ta mal᷊iwuhi u kal᷊auntung ko Daku nionggo i'i.
I sire sarung l᷊umiaghi
ual᷊ingu kakanoa-Ku si sire.
8Umati-Ku sarung Daku kuiang dang Daku ikomol᷊i makoa simbau.
I sire Daku il᷊iwiri dang Daku koateng pakaul᷊i kere horo.
9Manengwe i sire Daku ipukaesi sarang tal᷊oara u manga bangsa,
i sire sarung tatapi mutinaung si Sia pai se'e.
I sire sarung masal᷊amati, kere'e l᷊ai manga anae
dang sarung mapul᷊e singkahindo sarang wanuange.
10Bou Mesir l᷊au Asyur, i sire sarung Daku ipakapul᷊e.
Su wanuange sisane i sire sarung Daku ipilo.
Daku iwawa i sire sarang Gilead l᷊au Libanon l᷊ai,
hakiu kaul᷊i u wanua napene i sire.
11Boko i sire mul᷊umiu l᷊auri u kasasusa,
Ia, Mawu sarung mamuwahi manga bularie;
kuteu wal᷊ang u Sal᷊uhi Nil makoa ko mal᷊isa mamara.
Bangsa Asyur ko maoboti sarung ipakasana,
dang Mesir ko matoghasi sarung ikailangeng u kawasa.
12Ia sarung mupakatoghasi umati-Ku,
i sire sarung matuhu dang mutahamawu si Sia.
Ia, Mawu, seng nuhengetang.”
Currently Selected:
ZAKHARIA 10: PLT
Highlight
Share
Compare
Copy
Want to have your highlights saved across all your devices? Sign up or sign in
