ZAKHARIA 1
1
Mawu nukui umati-E pusul᷊e sarang koa-E
1 #
Ezr. 4:24–5:1, 6:14 Su wul᷊ang kawal᷊unge su taung karuange pamarentahang i Ratu Darius su Persia, Mawu nuhabari l᷊aingati i'i si sia, Nabi Zakharia ana i Berekhya dang pung i Ido. 2Mawu namarenta si sia tadeau pangul᷊i kiri'i su umati-E, “Su tempo horo Ia, Mawu Ko Makawasa, nuwawal᷊uang kahingang su manga i upung i kumu. 3Kateho orasi i'i Ia muhengetang si kumu: Pusul᷊ete sarang koa-Ku, kuteu Ia l᷊ai sarung musul᷊e sarang koa i kumu. 4Kumbahang kere manga i upung i kumu. Ndahuwite manga nabi nuhabari l᷊aingati-Ku si sire tadeau i sire kumbahang sau mukoa ko dal᷊ai l᷊au mukoa dosa. Kateho i sire ta nupandung dang mandi mutumuhu si Sia. 5Ko su apa manga i upung i kumu l᷊au manga nabi e'e orasi i'i? I sire seng tarie'e. 6Bou manga nabi manga l᷊ang-Ku e'e, Daku nipuhengetang manga parenta l᷊au manga l᷊aingati-Ku su manga i upung i kumu. Kateho i sire ta nupandung hakiu i sire mambeng mananggong suenge. Bou e'e i sire nusisili dang nangaku himoneu Ia, Mawu Ko Makawasa, seng nuhukung si sire sintuhu dingang u pusansal᷊a i sire, dang sintuhu dingang ko seng Daku nitantu.”
Kawawua su nabi hal᷊i u pira mbau kawal᷊o
7Su tanggali duampul᷊opa wul᷊ang Syebat, e'e ko wul᷊ang kapul᷊onsaue, su taung karuange pamarentahang u Ratu Darius, Mawu nuhabari l᷊aingati-E si sia. Su simbau kawawua su tempo ngu huwi, 8#Kl᷊h. 6:2, 4ia nakawua malaikati u Mawu kasakenge kawal᷊o mahamu. I sie nangiro su wal᷊ange simbau su tal᷊oara u manga kau murad. Su l᷊ikuri kararisi pira mbau kawal᷊o ko wal᷊inge, pia ko mahamu, ko mahamu maghurang dang ko mawira. 9Ia nakina si sie, “Tuang, apa mangal᷊eng u kaul᷊i u kawal᷊o e'e?”
I sie nusumimbahi, “Sarung daku iul᷊i mangal᷊enge si kau. 10I sire niroi u Mawu tadeau pamariksa dunia.”
11Kaul᷊i u kawal᷊o e'e nulapori su malaikati, “I kami seng nul᷊iku kaul᷊i u dunia, nal᷊ahe dunia i'i mal᷊enehi l᷊au matatapi.”
12Bou e'e malaikati e'e nangul᷊i, “Mawu Ko Makawasa, pitumpul᷊o su taunge l᷊iwuenge I Kau nuwawal᷊uang su Yerusalem l᷊au manga soa su Yehuda. Sarang kangereng I Kau tatapi muwawal᷊uang dang ta mangonggo u ampunge si sire?”
13 Mawu nusumimbahi su malaikati e'e dingang u manga didato ko mangonggo u l᷊ahibori, 14dang malaikati e'e nangoro si sia puhabari apang ko nipuhengetang u Mawu Ko Makawasa, “Ia mukumindaghi kahingang dang nasusa ngu soa ngu Yerusalem, soa-Ku ko susi. 15Kateho Ia nuwawal᷊uang kahingang su manga bangsa ko nakapundang mal᷊enehi l᷊au matatapi. Ual᷊ingu su tempo ngu Ia kaputatahang u wawal᷊uang-Ku su umati-Ku, manga bangsa e'e nanamba ngu singsara su umati-Ku. 16Orasi i'i Ia musul᷊e sarang Yerusalem guna ngu mangonggo u pangangampung su soa e'e. Wal᷊e-Ku sarung sau iwangung dang soa ngu Yerusalem sau isul᷊e pakapia.”
17Malaikati e'e nangoro si sia puhabari tatanata i'i l᷊ai, “Mawu Ko Makawasa nudiandi himoneu manga soa-E sarung sau makoa ko mapia puwawiahie dang himoneu paghisa l᷊ai I Sie sarung mutul᷊ung u Yerusalem dang mangaku ngu soa e'e kere koa-E sisane.”
Kawawua hal᷊i u manga sasunge
18Su kawawua ko wal᷊inge, ia nakawua pa sasunge ngu sapi. 19Ia nakina su malaikati ko seng nudidato si sia, “Ko apa mangal᷊enge manga sasunge e'e?”
I sie nusumimbahi, “Manga sasunge e'e ko tatia ngu manga kararatuang ko matoghasi ko nupukaesi taumata ngu Yehuda, Israel l᷊au Yerusalem.”
20Bou e'e Mawu nangandaghi si sia pa u katau kipung ko numbawa rarupa. 21Ia nakina, “Ko apa pandung u sasongo ngi sire?”
I Sie nusumimbahi, “Guna ngu pamataku dang pul᷊engge manga bangsa ko seng nunggaghoro Yehuda l᷊au nupukaesi taumatange.”
Currently Selected:
ZAKHARIA 1: PLT
Highlight
Share
Compare
Copy
Want to have your highlights saved across all your devices? Sign up or sign in
