HAGAI 2

Kasasidada u Wal᷊e ngu Mawu ko wuhu

1Su tanggali kaduampul᷊onsaue, wul᷊ang kapitunge su l᷊al᷊ung u taung e'e l᷊ai, Mawu nuhengetang l᷊ai bou mohong i Nabi Hagai. 2Mawu nundoi si Hagai pangul᷊i su Gubernur Zerubabel, Imam ko L᷊abo Yosua, l᷊au su manga ana u kawanua l᷊aingati i'i, 3#Ezr. 3:12“Apa pia su tal᷊oara i kumu ko mborong nakatinaung kirapa kasidadae Wal᷊e-Ku i'i ndahuwite? Orasi i'i kirapa kakakoae, tumuhu sipirang i kumu? Wal᷊ingewe tinga-tingari ta makal᷊uasi naung? 4Kateho, kumbahang masusa naung, ei i kumu kaul᷊ie! Pakatupasiko hal᷊i e'e, watu'u Ia sarung tatapi mutul᷊ung si kumu. 5#Sasu. 29:45-46 Su tempo ngu i kumu nusumuwang bou Mesir, Ia seng nudiandi sarung sintinia manirung si kumu. Dang orasi i'i l᷊ai Ia mborong manirung si kumu. Inau kumbahang i kumu maghagha.

6 # Ibr. 12:26 Ta mal᷊iwue l᷊ai Ia sarung munggio l᷊angi l᷊au dunia, l᷊ul᷊unge l᷊au l᷊auri. 7Kaul᷊i u bangsa sarung Daku ipughigho dang rarotong i sire sarung iwawa mai, hakiu Wal᷊e-Ku sarung mapene u kakakala i sire. 8Apang wul᷊aeng l᷊au sal᷊aka su dunia i'i e'e ko koa-Ku. 9Wal᷊e-Ku ko wuhu sarung lebe masidada bou ko horo, dang su si'i Ia sarung mangonggo u purarame l᷊au kakakala su bangsa-Ku.” Mawu Ko Makawasa seng nuhengetang.

Nabi Hagai nul᷊al᷊ahintau dingang u manga imam

10Su tanggali kaduampul᷊opae wul᷊ang kasionge su taung karuange pamarentahang i Ratu Darius, Mawu Ko Makawasa nuhengetang l᷊ai si Nabi Hagai. 11Hengetang-E, “Pundoko putusang u manga imam soali i'i: 12Andenge pia singkatau ko nangal᷊a daging simpoto bou korbang ko nisumbange su Mawu, bou e'e niwawae napul᷊e su l᷊ukuhi u jubange, dang bou e'e dingang u jubange e'e i sie nanuhung boroti arako masakang simbau, arako anggori, arako l᷊ana zaitung, arako manga kang apa, apa kaul᷊i u e'e sarung makoa ko susi l᷊ai?”

Su tempo ngi Hagai nakina e'e, manga imam nusumimbahi, “Ta.”

13 # Rek. 19:11-22 I Hagai sau nakina, “Boko pia taumata ko nal᷊amuhu ual᷊ing i sie nanuhung bangke, dang bou e'e i sie nanuhung simbau bou kang e'e, apa kang e'e makoa ko mal᷊amuhu l᷊ai?”

Manga imam nusumimbahi, “Ore, tantuwe!”

14Bou e'e i Hagai sau nangul᷊i, “Mawu nuhengetang himoneu atorang e'e mariadi l᷊ai su umati Israel su wanua i'i dang su kaul᷊i u apang ko ikarea i sire. Inau, apang ko nisumba ngi sire su mesba i'i ko mal᷊amuhu.”

Mawu nudiandi ngu al᷊amati-E

15 Mawu nuhengetang, “Kenang, putuhungko pakapia apang ko seng nariadi suhoro u silou i'i, suhoro u Wal᷊e-Ku i'i nikoa pakapia! Kirapa kakakoa i kumu tempo e'e? 16I kumu seng natamai nakawua ambung u gandung dang mangiral᷊ing sarung makarea duahasu su kilonge gandung, kateho nal᷊ahe kitang pia mahasu su kilonge. I kumu natamai guna ngu manaku mahasu su literi anggori bou bunsari u anggori, kateho kitang pia paupul᷊o su literi. 17Ia seng nupasongo ngu anging ko matiti l᷊au tahiti watu tadeau punggaghoro apang suke ngu anseri kumu, kateho i kumu mang mandi l᷊ai musul᷊e sarang koa-Ku. 18Su l᷊ou i'i, tanggali duampul᷊opa wul᷊ang kasionge, meseli Wal᷊e-Ku seng nasue koae! Putuhungko pakapia apa ko sarung mariadi manita orasi i'i. 19Manengwe takoae l᷊ai gandung ko nal᷊umbei, l᷊au kau anggori, kau ara, kau delima l᷊au kau zaitung tangkeng nuwua, kateho manita orasi i'i Ia sarung mangal᷊amati si kumu!”

Diandi ngu Mawu si Zerubabel

20Su l᷊ou e'e l᷊ai, e'e ko tanggali kaduampul᷊opae wul᷊ang kasionge, Mawu nangonggo u l᷊aingati karuange si Hagai, 21tadeau pakihabari si Gubernur Zerubabel. Hengetang u Mawu, “Ta mal᷊iwue l᷊ai l᷊angi l᷊au dunia sarung Daku ipakaghio, 22manga kararatuang Daku il᷊engge dang kawasa ngi sire Daku ipakaghaghoro. Manga kereta ngu parang dang sumasakenge sarung Daku kal᷊intuingang; kaul᷊i u kawal᷊o sarung mate dang sumasakenge sarung mupapate. 23Su l᷊ou e'e i kau Zerubabel, l᷊ang-Ku, sarung Daku ihengke tadeau pamarenta su areng-Ku. Ual᷊ing i kau ko seng Daku nipile.” Mawu Ko Makawasa seng nuhengetang.

Currently Selected:

HAGAI 2: PLT

Highlight

Compare

Copy