ROMA 12

Muwiahi guna ngu Mawu Ruata

1Manga ana u simbau! Mawu Ruata kere'e kapiange si kite. E'e sabapie ia mundo singapang botonge tadeau i kumu manumba ngu watangengu kere simbau sasumba wiahi ko nitilahi su Mawu Ruata ko mupakasanang naung-E. Kakanoa u mutahamawu su Mawu Ruata hinonge kere. 2Kumbahang mutumuhu manga atorang u dunia i'i. Walate Mawu Ruata pukoa watangengu mariadi ko wuhu, tadeau i kumu muwal᷊u. Dingang kere'e i kumu matitong kao u Mawu Ruata – apa ko mapia dang ko makasanang naung-E dang ko masuku.

3Mawu Ruata seng munggile l᷊aonggo si sia. E'e sabapie ia munggile sasasa si kumu manga ana u simbau kaul᷊ie: Kumbahang mamundang watangeng napal᷊iu marange bou hinonge. Kenangko i kumu putuhung su watangeng i kumu dingang kasasana u naung; singkatau-singkatau putuhung watangenge tumuhu uha u badange ko seng nionggo u Mawu Ruata si sie watu'u mangimang si Yesus. 4#1Kor. 12:12Badang i kite napene u bahageange. Apang bahageang u badang nahia u hal᷊i u simbau-simbau. 5Kere l᷊ai dingang i kite maneng i kite maul᷊i, kateho i kite musul᷊ung u badang simbau, watu'u i kite nasimbau dingang I Kristus. Dang i kite singkatau-singkatau nakauhi simbau dingang ko wal᷊inge kere bahageang bou badang simbau. 6#1Kor. 12:4-11I kite kaul᷊ie nahia u l᷊aonggo mududal᷊ahaghi guna ngu pukoa hal᷊i u Mawu Ruata. L᷊aonggo e'e ninggile u Mawu Ruata si kite tumuhu kakindaghi-E. Watu'u e'e i kite mambeng mupake u apang l᷊aonggo e'e. Taumata ko pia l᷊aonggo guna ngu puhabari habari bou Mawu Ruata, mambeng puhabari habari bou Mawu Ruata e'e tumuhu toghasi ko ene si sie. 7Taumata ko pia l᷊aonggo guna ngu putul᷊ung taumata ko wal᷊inge mambeng putul᷊ung kahingang taumata ko wal᷊inge. Taumata ko pia l᷊aonggo guna ngu panintiro, mambeng tinga-tingari manintiro. 8Taumata ko pia l᷊aonggo guna ngu panoghasi taumata ko wal᷊inge, mambeng tinga-tingari manoghasi taumata ko wal᷊inge. Taumata ko pia l᷊aonggo pangonggo su taumata ko wal᷊inge, apang ko pia si sie, mambeng mukoa e'e dingang kasasana u naung matul᷊iri. Taumata ko pia l᷊aonggo guna ngu pangaha, mambeng tinga-tingari pangaha. Taumata ko pia l᷊aonggo guna ngu kumindaghi u taumata ko wal᷊inge, mambeng pukoa e'e dingang u kal᷊al᷊uasi naung.

9Pukakindaghite dingang u naung matulasi. Pubunsite ko dal᷊ai, l᷊au puhinggote su apang ko mapia. 10Manga ana u simbau pukakindaghie simbau dingang ko wal᷊inge dingang mahimumu kere manga taumata sintamahuaring su l᷊al᷊ung u wal᷊e simbau, dang pul᷊ahoro mangonggo adati. 11Puhal᷊i pakarading. Kumbahang malasi. Puhal᷊i guna ngu Mawu dingang u toghasi bou Roh u Mawu Ruata. 12Ana u simbau puharapi su Mawu dingang mal᷊uasi, pusabari su l᷊al᷊ung kasasusa, dang pakauha mukal᷊iomaneng. 13Putul᷊ungko mupakasuku u ko hino ngu ipuwiahi u taumata sahani ko wal᷊inge dang tarimae manga ana u simbau su pangangimang simbau ko ta nikatitonang i kumu, dingang u naung mal᷊uasi su l᷊al᷊ung u wal᷊e ngi kumu.

14 # Mat. 5:44; Luk. 6:28 Pundoko su Mawu Ruata tadeau i sie mangonggo al᷊amati su apang taumata mutingkai si kau. Ho, pundo su Mawu Ruata pangal᷊amati si sire, kumbahang mangane. 15Pural᷊uasi dingang u apang taumata ko kapural᷊uasi, l᷊au sangie dingang i sire ko kasangie. 16#Sas. 3:7Puwiahi pakal᷊ahimumu singkatau dingang ko wal᷊inge. Kumbahang mupakarange u naung, kateho koako watangengu musul᷊ung u taumata wiahi masana.#12:16: koako watangeng … wiahi masana: arako kumbahang manolaki manga hal᷊i ko masana. Kumbahang mupundang badang u napal᷊iu pande bou ko hinonge.

17Boko taumata mukoa ko dal᷊ai si kau, kumbahang mamal᷊isi e'e dingang ko dal᷊ai. Pukoako apang ko tuhungang kaul᷊i u taumata mapia. 18Bou e'e i kumu, putawakal᷊iko singapang botonge muwiahi su purarame dingang u apang taumata. 19#Sau. 32:35Manga ana u simbauku! Kumbahang-bahang mamal᷊isi saki u naung, walate hindo Mawu Ruata puhukung. Watu'u su l᷊al᷊ung u Buki Susi mawawohe, “Ko Ia mamal᷊isi. Ia sarung muhukung, angkung u Mawu.” 20#Sas. 25:21-22Su simbukange, boko roka u mahutung, onggol᷊eko i sie kang; dang boko i sie marou, onggol᷊ete i sie inung. Watu'u mukoa kere'e, i kumu mukoa si sie mamea. 21Kumbahang mamala ngu badang u pakiwata su ko dal᷊ai, kateho i kumu mambeng pamata u ko dal᷊ai dingang u hal᷊i ko mapia.

Currently Selected:

ROMA 12: PLT

Highlight

Copy