ROMA 13

Tanggongang su pamarenta

1Apang taumata mambeng tuhu su pamarenta, watu'u takoae pamarenta ko ta makarea kawasange bou Mawu Ruata. Dang pamarenta ko ene su orasi i'i, mupal᷊al᷊eng u kawasange watu'u parenta ngu Mawu Ruata. 2E'e sabapie taumata ko l᷊umawang pamarenta musul᷊ung l᷊umawang apa ko nitantu u Mawu Ruata. Dang taumata mukoa kere'e sarung manarima u hukumang. 3Watu'u taumata ko mukoa mapia ta wahal᷊uasi mataku u pamarenta. Kitang taumata ko mukoa ko dal᷊ai mambeng kataku. Boko i kumu mo tadeau i kumu ta mataku u pamarenta, i kumu mambeng pukoa ko mapia, kuteu i kumu sarung idalo. 4Watu'u pamarenta ko l᷊ang u Mawu Ruata ko muhal᷊i guna ngu kapapia ngi kumu. Arawe boko i kumu mukoa dal᷊ai, i kumu mang mambeng kataku si sie, watu'u wal᷊inge takoae mangal᷊enge i sie mukawasa muhukung u taumata. I Sie ko l᷊ang u Mawu Ruata, ko mupakanawo u hukumang u Mawu Ruata su apang taumata ko mukoa ko dal᷊ai. 5E'e sabapie i kumu mambeng tuhu su pamarenta – wal᷊inge kitang watu'u i kumu mandi ihukung, arawe l᷊ai watu'u titong u naungu.

6 # Mat. 22:21; Mrk. 12:17; Luk. 20:25 E'e l᷊ai punguange apa sabapie i kumu mamaehi balasteng, watu'u pamarenta ko mul᷊ahal᷊i u Mawu Ruata ko mupal᷊al᷊eng u hal᷊i ko seng nitilahi i'i. 7Inau waehi su pamarenta apa ko hino ngu waehang i kumu si sie. Pamaehi balasteng, boko i kumu mambeng pamaehi balasteng; dang pamaehi bea boko i kumu mambeng pamaehi bea. Puhariga ngi sire ko hino ngu harigang dang pangadati si sire ko hino ngu adateng.

Tanggongang su sinsul᷊ung

8Kumbahang mangutang manga apa si sai-sai, su l᷊ikuri mangutang u kakindaghi su simbau dingang su ko wal᷊inge. Watu'u taumata ko kumindaghi u sinsul᷊unge, seng nupakasuku kaul᷊i u atorang i Musa. 9#Sasu. 20:13-15, 17; Im. 19:18; Sau. 5:17-19, 21Watu'u atorang u agama ngu Yahudi, e'e ko kumbahang mawuang, kumbahang mamate, kumbahang manako, kumbahang mo managhuang apang ko koa u taumata ko wal᷊inge, kaul᷊i u e'e dingang u manga atorang ko wal᷊inge, seng nasahiangkung nakoa kitang atorang simbau, e'e ko, “Kindaghite sinsul᷊ungu kere i kau mukumindaghi watangengu sisane.” 10Taumata ko kumindaghi u taumata ko wal᷊inge, ta sarung mukoa ko dal᷊ai su taumata e'e. Inau taumata ko kumindaghi u sinsul᷊unge i sie taumata ko nakasuku hal᷊i u atorang u agama.

11Su l᷊ikuri e'e i kumu matitong himoneu orasi i'i ko tempo ngi kumu muwangung bou katatiki. Watu'u u tempo ngi kite i pakasal᷊amati orasi i'i seng lebe masandighi bou tempo ngi kite mbuhue manita mangimang. 12Huwi seng masandighi mapal᷊usi dang kate singkodo l᷊ai seng mal᷊ou. Inau mapiang i kite pangiro mukoa manga kakanoa marundung. I kite mambeng manadia watangeng i kite dingang mupake u pakakasi kasasua. 13I kite mambeng mukoa manga hal᷊i ko pangadateng kere narange koateng u taumata su tempo ngu l᷊ou, kumbahang musal᷊iwang mumbatu kao u naung, arako mutimbukang. Kumbahang mukoa l᷊amuhu, arako kakanoa ko takoae adati. Kumbahang mukakoka arako mananoi. 14Walate Mawu Yesus Kristus manantu u apang ko mambeng koateng i kumu. Dang kumbahang tumuhu tabieti taumata bardosa ko mumbatu u kao i sire.

Currently Selected:

ROMA 13: PLT

Highlight

Copy