Popular Bible Verses from ROMA 12

Share

Kumbahang mutumuhu manga atorang u dunia i'i. Walate Mawu Ruata pukoa watangengu mariadi ko wuhu, tadeau i kumu muwal᷊u. Dingang kere'e i kumu matitong kao u Mawu Ruata – apa ko mapia dang ko makasanang naung-E dang ko masuku.

Manga ana u simbau! Mawu Ruata kere'e kapiange si kite. E'e sabapie ia mundo singapang botonge tadeau i kumu manumba ngu watangengu kere simbau sasumba wiahi ko nitilahi su Mawu Ruata ko mupakasanang naung-E. Kakanoa u mutahamawu su Mawu Ruata hinonge kere.

Ana u simbau puharapi su Mawu dingang mal᷊uasi, pusabari su l᷊al᷊ung kasasusa, dang pakauha mukal᷊iomaneng.

Kumbahang mamala ngu badang u pakiwata su ko dal᷊ai, kateho i kumu mambeng pamata u ko dal᷊ai dingang u hal᷊i ko mapia.

Manga ana u simbau pukakindaghie simbau dingang ko wal᷊inge dingang mahimumu kere manga taumata sintamahuaring su l᷊al᷊ung u wal᷊e simbau, dang pul᷊ahoro mangonggo adati.

Pukakindaghite dingang u naung matulasi. Pubunsite ko dal᷊ai, l᷊au puhinggote su apang ko mapia.

Bou e'e i kumu, putawakal᷊iko singapang botonge muwiahi su purarame dingang u apang taumata.

Manga ana u simbauku! Kumbahang-bahang mamal᷊isi saki u naung, walate hindo Mawu Ruata puhukung. Watu'u su l᷊al᷊ung u Buki Susi mawawohe, “Ko Ia mamal᷊isi. Ia sarung muhukung, angkung u Mawu.”

Puhal᷊i pakarading. Kumbahang malasi. Puhal᷊i guna ngu Mawu dingang u toghasi bou Roh u Mawu Ruata.

Mawu Ruata seng munggile l᷊aonggo si sia. E'e sabapie ia munggile sasasa si kumu manga ana u simbau kaul᷊ie: Kumbahang mamundang watangeng napal᷊iu marange bou hinonge. Kenangko i kumu putuhung su watangeng i kumu dingang kasasana u naung; singkatau-singkatau putuhung watangenge tumuhu uha u badange ko seng nionggo u Mawu Ruata si sie watu'u mangimang si Yesus.

Boko taumata mukoa ko dal᷊ai si kau, kumbahang mamal᷊isi e'e dingang ko dal᷊ai. Pukoako apang ko tuhungang kaul᷊i u taumata mapia.

Puwiahi pakal᷊ahimumu singkatau dingang ko wal᷊inge. Kumbahang mupakarange u naung, kateho koako watangengu musul᷊ung u taumata wiahi masana. Kumbahang mupundang badang u napal᷊iu pande bou ko hinonge.

Su simbukange, boko roka u mahutung, onggol᷊eko i sie kang; dang boko i sie marou, onggol᷊ete i sie inung. Watu'u mukoa kere'e, i kumu mukoa si sie mamea.

Pundoko su Mawu Ruata tadeau i sie mangonggo al᷊amati su apang taumata mutingkai si kau. Ho, pundo su Mawu Ruata pangal᷊amati si sire, kumbahang mangane. Pural᷊uasi dingang u apang taumata ko kapural᷊uasi, l᷊au sangie dingang i sire ko kasangie.

Putul᷊ungko mupakasuku u ko hino ngu ipuwiahi u taumata sahani ko wal᷊inge dang tarimae manga ana u simbau su pangangimang simbau ko ta nikatitonang i kumu, dingang u naung mal᷊uasi su l᷊al᷊ung u wal᷊e ngi kumu.

Badang i kite napene u bahageange. Apang bahageang u badang nahia u hal᷊i u simbau-simbau. Kere l᷊ai dingang i kite maneng i kite maul᷊i, kateho i kite musul᷊ung u badang simbau, watu'u i kite nasimbau dingang I Kristus. Dang i kite singkatau-singkatau nakauhi simbau dingang ko wal᷊inge kere bahageang bou badang simbau.