IMAMAT 8

I Musa nanabisi si Harun l᷊au manga anae

(Sasu. 29:1-37)

1 Mawu nuhengetang si Musa, 2“Kuieko i Harun l᷊au manga anae dang wawako pakeang u imam, l᷊ana guna ngu upacara, sapi ko ese makuda simbau guna ngu korbang pangangampung u dosa, domba ko ese darua dang simbaki boroti ko takoae kaboe. 3Bou e'e roiko kaul᷊i u umati Israel pukomol᷊i su saruang u tukari u Kema-Ku.”

4I Musa nukoa apang ko niparenta ngu Mawu. Suapang kaul᷊i u umati seng nakomol᷊i su tampa e'e, 5I Musa nangul᷊i si sire, “Ko daku nikoa su orasi i'i ko parenta ngu Mawu.”

6Bou e'e i sie nundoi si Harun l᷊au manga anae pararisi su saruang dang panguhasi watangeng i sire. 7Mbuhue i sie nul᷊oho pakeang u imam si Harun: kameja, l᷊aiki kal᷊uwaeng l᷊au juba. Efod #8:7: efod: Pakeang simpoto musul᷊ung l᷊aku rompi nikoa bou heka mul᷊ahaghi ghahie ko mal᷊ighari. Su l᷊aku i'i niikie papodi pia tahoe Urim l᷊au Tumim, barang darua ko nipake u imam guna ngu makatitong kao u Mawu Ruata. ko niikie l᷊ai su kal᷊uwaenge dingang l᷊aikie bou heka ko maal᷊usi. 8Bou e'e nipake'e tataka u roko si Harun, dang su tataka u roko e'e nitahonange Urim l᷊au Tumim. #8:8: Urim l᷊au Tumim: barang darua ko nipake u imam guna ngu makatitong kao u Mawu Ruata. Ta nikatitonang dingang mal᷊ahe kirapa kakakoae mupake u e'e. 9Bou e'e nipilonange paporong su timbo i Harun, dang su paporong nitaing l᷊al᷊ighahi wul᷊aeng, ko tatia himoneu i Harun seng nakoa koa u Mawu. Kaul᷊i u e'e nikoa i Musa sintuhu dingang u parenta ngu Mawu si sie.

10Bou e'e i Musa nangal᷊a l᷊ana guna ngu upacara dang namuha ngu e'e su Kema ngu Mawu dang kaul᷊i u sal᷊iumpuhi. Dingang kere'e kaul᷊ie nitanie guna ngu Mawu. 11Singkodo bou l᷊ana e'e nipusie paka pitu su wawo u mesba l᷊au kaul᷊i u tatahoe, dang l᷊ai su wawo u bak l᷊au dasarie. Dingang kere'e kaul᷊ie nihae guna ngu Mawu. 12Bou e'e i Musa nanabisi si Harun dingang nanuang l᷊ana guna ngu upacara singkodo su wawo u timboe. 13Bou e'e i sie nangoro manga ana i Harun pararisi su saruang. Nipake'e si sire kameja dingang u l᷊aiki kal᷊uwaeng. Bou e'e nipilonang u paporong su timbo i sire kere ko seng niparenta ngu Mawu si sie.

14Bou e'e i Musa nangal᷊a sapi ko ese makuda simbau guna ngu korbang pangangampung u dosa. I Harun l᷊au manga anae namilo l᷊ima ngi sire su wawo u timbo u binatang e'e. 15Bou e'e i Musa nuhata sapi e'e dang nangal᷊a simbahageang dahange. Daha e'e niwuhae dingang u tal᷊imboronge su manga sasunge su manga wuku ngu mesba, tadeau mesba e'e nitani guna ngu Mawu Ruata. L᷊ebe ngu daha e'e nisiwohie su dasari u mesba. Ko kere'e kakakoae mesba e'e nipakasusi dang nihae guna ngu Mawu. 16Bou sapi ko mbuhue nipoto e'e, i Musa nangal᷊a kaul᷊i u tawa ko namikung tataho u tiange, kamangange dingang u tawae dang bahageang ko kapiange bou atenge. Kaul᷊i u e'e nitongkae su wawo u mesba. 17Kateho ghisi ngu sapi e'e, pisinge, tataho u tiange, l᷊ebenge nasu su l᷊al᷊unge tinainge, inau kaul᷊i u sapi e'e su l᷊ikuri manga bahageang ko seng nihae nitongkae su l᷊ikuru pukakemang kere ko niparenta ngu Mawu.

18Bou e'e i Musa nangal᷊a domba ko ese guna ngu korbang tutungang, bou e'e i Harun l᷊au manga anae namilo l᷊ima ngi sire su wawo u timbo u binatang e'e. 19I Musa nuhata domba e'e dang dahange nisiwohie su pa u sindihang u mesba e'e. 20-21Bou e'e binatang e'e nipapotoe dang tataho u tiange l᷊au l᷊aeri niuhasie dingang ake. Timboe, tawae dang l᷊ebenge bou ghisi ngu domba ko ese e'e nitongkae guna ngu korbang tongkateng su wawo u mesba kere ko niparenta ngu Mawu si sie. Raruru ngu korbang kang e'e makal᷊uasi naung u Mawu.

22Bou e'e i Musa nangal᷊a sau simbau domba ko ese guna ngu korbang putatabisi imam. I Harun l᷊au manga anae nanimbo l᷊ima ngi sire su wawo u timbo u domba e'e. 23Bou e'e i Musa nuhata domba e'e. Mbuhue nial᷊ae singkodo daha ngu binatang e'e, dang niwuhae su tul᷊i kuaneng i Harun, su ma u tal᷊imboro ngu l᷊ima kuaneng, l᷊au su ma u tal᷊imboro ngu l᷊aeri kuaneng. 24Bou e'e i sie nangoro manga ana i Harun pasandighi, mbuhue niwuhae daha singkodo su tul᷊i ngi sire, su ma u tal᷊imboro ngu l᷊ima kuaneng, l᷊au su ma u tal᷊imboro ngu l᷊aeri kuaneng i sire. L᷊ebe ngu daha e'e nisiwohie su pa u sindihang u mesba. 25I Musa nangal᷊a tawa u domba e'e, tol᷊e'e ko pia tawae, kaul᷊i u tawa ko namikung tataho u tiange, bahageang ko kapiange bou atenge, kamangange dingang u tawae l᷊au l᷊aeri ko kuaneng. 26Bou baki ko pia tahoe boroti ko takoae kaboe ko seng nisumba su Mawu, i Musa nangal᷊a boroti simbau ko masubenehi ko nikoa dingang u l᷊ana l᷊au boroti ko manipi simbau. Boroti e'e nipiloe su wawo u tawa dang su pang kuaneng u domba. 27Kaul᷊ie nipiloe su l᷊ima ngi Harun dang manga anae, bou e'e i sire nanumba ngu e'e kere sasumba patode su Mawu. 28Mbuhue i Musa nangal᷊a kang e'e bo i sire dang nanongka e'e su wawo u mesba, singkahindo dingang u korbang tutungang guna ngu korbang putatabisi. Raruru ngu korbang kang e'e makal᷊uasi naung u Mawu. 29Bou e'e i Musa nangal᷊a roko ngu domba e'e dang nanumba ngu e'e kere sasumba patode su Mawu. Ko e'e bageang i Musa bou domba ko ese ko seng nisumba guna ngu upacara putatabisi imam. Kaul᷊ie nikoa i Musa kere ko seng niparenta ngu Mawu si sie.

30Nasue bou e'e i Musa nangal᷊a simbahageang bou l᷊ana guna ngu upacara dang simbahageang bou daha ko ene su wawo u mesba, bou e'e nimusie si Harun dang manga anae l᷊au su pakeang i sire. Dingang l᷊al᷊eng e'e i Musa nupuhae ngi sire l᷊au pakeang i sire su Mawu.

31Bou e'e i Musa nangul᷊i si Harun l᷊au manga anae, “Sasae ghisi ngu korbang e'e su saruang u tukari u Kema ngu Mawu. Tumuhu parenta ngu Mawu, i kumu mambeng kang e'e su se'e dingang u boroti korbang putatabisi ko ene su l᷊al᷊ung u baki. 32Ghisi dingang u boroti l᷊ebenge mambeng itutung i kumu pakasue. 33Pitu l᷊ou l᷊iwuenge i kumu ta botonge manintang u Kema ngu Mawu sarang upacara putatabisi kumu masue. 34Mawu nuparenta tadeau apang ko nikoa i kite su silou i'i pakikoa l᷊ai turusi. Dingang u upacara e'e manga dosa ngi kumu niampungang. 35Pitu l᷊ou l᷊iwuenge, l᷊ou huwi, i kumu mambeng katana su saruang u tukari u Kema guna ngu mukoa apang ko iparenta ngu Mawu. Boko i kumu ta mukoa e'e, i kumu sarung mate. Ko e'e niparenta ngu Mawu si sia.” 36Bou e'e i Harun l᷊au manga anae nukoa apang ko niparenta ngu Mawu bo i Musa.

Currently Selected:

IMAMAT 8: PLT

Highlight

Copy

Compare