IMAMAT 7
7
Korbang ghaghanti ngu karugiang
1Ko i'i manga atorang hal᷊i u korbang ghaghanti ngu karugiang. Korbang e'e ko tumaniu susi. 2Binatang guna ngu korbang mambeng ihata su tampa pamotokang binatang guna ngu korbang tongkateng, bou e'e dahange isiwohi su sindihange pa su mesba. 3-4Imam mambeng manumba su wawo u mesba kaul᷊i u tawa u binatang e'e, e'e ko: Tol᷊e'e ko pia tawae, tawa ko namikung tataho u tiange, kamangange dingang u tawae, dang bahageang ko kapiange bou atenge. 5Kaul᷊i u e'e mambeng itongka su wawo u mesba kere korbang kang su Mawu. Korbang e'e ko guna ngu korbang ghaghanti ngu karugiang. 6Apang taumata kol᷊aese su l᷊al᷊ung u walagheng u manga imam botonge kumang ghisi ngu korbang e'e, kateho i sire mambeng kumang su tampa ko seng nitani, ual᷊ingu korbang e'e ko tumaniu susi.
7Guna ngu korbang pangangampung u dosa l᷊au korbang ghaghanti ngu karugiang mupake atorang ko musul᷊ung, e'e ko: Ghisi ngu binatang ko isumba ko bageang u imam ko nanumba e'e. 8Pisi ngu binatang e'e l᷊ai guna ngu imam. 9Apang korbang l᷊ahaghesi ko itongka su l᷊al᷊ung u putatongkateng arako itung su l᷊al᷊ung u kawali arako ko ipanggang, makoa bageang u imam ko nanumba e'e. 10Arawe korbang l᷊ahaghesi ko ta nisasa, mbaeng ko nil᷊aukang u l᷊ana arako mamara, kaul᷊i u e'e guna ngu manga imam hintou ngi Harun, dang mambeng ipahia pusul᷊ung su tal᷊oara i sire.
Korbang purarame
11Ko i'i manga atorang hal᷊i u korbang purarame ko isumba su Mawu. 12Boko korbang e'e isumba guna ngu muputarimakase, kuteu dingang u binatang mambeng isumba l᷊ai boroti ko takoae kaboe. Boroti e'e botonge ko masubenehi bou tapong nil᷊aukang dingang u l᷊ana zaitung, botonge l᷊ai boroti mamara ko manipi ko niwuha ngu l᷊ana, arako kukisi tapong ko nikoa dingang u l᷊ana zaitung. 13Su l᷊ikuru e'e mambeng isumba l᷊ai boroti ko nikoa pia kaboe. 14Bou apang haghi ngu boroti simbahageang mambeng isumba su Mawu, dang e'e bageang u imam ko nangal᷊a daha ngu binatang e'e dang naniwohi u e'e su mesba guna ngu korbang purarame. 15Ghisinge mambeng kinaseng su l᷊ou binatang e'e nisumba, sarang singkodo ta botonge pia ko itintang sarang dol᷊ou mal᷊ukari.
16Boko singkatau mumbawa korbang purarame guna ngu mungganapi diandinge, arako guna ngu korbang ual᷊ingu naung l᷊abo, tawahal᷊uasi kinaseng kaul᷊ie su silou e'e l᷊ai. L᷊ebenge botonge kinaseng ndai mal᷊ou. 17Boko su l᷊ou katilunge mborong pia l᷊umbeinge, ghisi e'e mambeng itutung pakasue. 18Kateho boko su l᷊ou katilunge ghisi e'e mang kinaseng, kuteu korbang e'e sarung ta itarima dang ta mumbawa al᷊amati su tau e'e, katewe makakoa ko haram. Tau ko mukumang munsal᷊a dang mambeng mananggong sukenge.
19Ghisi ko nikahinomang u barang ko mal᷊amuhu mambeng itutung pakasue dang ta botonge kinaseng.
Ghisi ngu korbang purarame kitang botonge kinaseng u taumata ko ta mal᷊amuhu. 20Boko taumata mukumang ghisi e'e su tempo ngu i sie ko mal᷊amuhu, i sie seng ta irekeng tataho u umati Mawu. 21Boko singkatau kumina ghisi ngu korbang e'e suapang i sie mbuae nanuhung barang ko mal᷊amuhu, mbaeng asal᷊ie bou taumata arako l᷊ai bou binatang, i sie l᷊ai ta irekeng tataho u umati Mawu.
22 Mawu nangonggo si Musa manga atorang i'i 23guna ngu bangsa Israel. Tawa u sapi, domba arako kambing ta botonge kinaseng. 24Tawa u binatang ko seng nate sisanenge arako ual᷊ingu nitumbou ngu binatang ko wawahani, ta botonge kinaseng kateho botonge ipake guna ngu kao ko wal᷊inge. 25Taumata ko kumina tawa u binatang ko botonge isumba guna ngu korbang kang su Mawu Ruata, seng ta irekeng tataho u umati Mawu. 26#Kar. 9:4; Im. 17:10-14, 19:26; Sau. 12:16,23, 15:23 Tau Israel, maneng su apa i sie natana, tawe wotonge manginung daha ngu burung arako daha ngu binatang ko wal᷊inge. 27I sai ko l᷊umawang atorang e'e seng ta irekeng tataho u umati Mawu.
28 Mawu nangonggo si Musa manga atorang i'i 29guna ngu bangsa Israel. I sai-sai ko mumbawa korbang purarame, mambeng muhae simbahageang guna ngu sasumba ko nihae guna ngu Mawu. 30I sie sisane mambeng mumbawa korbang kang e'e. Tawa l᷊au roko ngu binatang e'e mambeng isumba kere sasumba ko nitode su Mawu. 31Imam mambeng manongka tawa u binatang e'e su wawo u mesba, arawe roko nge ko bageang u manga imam. 32Pange ko kuaneng mambeng ionggo kere l᷊aonggo ko nihae 33su manga imam ko nanumba ngu daha l᷊au tawa u korbang purarame e'e. 34Rokonge l᷊au pange ko kuaneng ko l᷊aonggo ko nihae ko nial᷊a u Mawu bou sasumba ko nitode u bangsa Israel dang nionggo su manga imam. Ko e'e l᷊aonggo u bangsa Israel su manga imam sarang kal᷊iwuenge. 35Bou kang ko nisumba su Mawu, bahageang e'e ko nionggoe si Harun l᷊au manga anae su l᷊ou i sire nitabisi nakoa imam. 36Su l᷊ou e'e Mawu namarenta bangsa Israel tadeau bou sasumba ngi sire, bahageang e'e guna ngu manga imam. Atorang i'i mambeng pakituhuke su bangsa Israel sarang kal᷊iwuenge.
37Ko kere'e manga atorang hal᷊i u korbang tutungang, korbang l᷊ahaghesi, korbang pangangampung u dosa, korbang ghaghanti ngu karugiang, korbang putatabisi l᷊au korbang purarame. 38Mawu nangonggo manga parenta e'e si Musa su Wul᷊uri u Sinai su tempo ngi Sie nundoi su bangsa Israel panumba ngu korbang su tana l᷊inggi Sinai.
Currently Selected:
IMAMAT 7: PLT
Highlight
Copy
Compare
Share
Want to have your highlights saved across all your devices? Sign up or sign in
