IMAMAT 14
14
Tundu ngu panganguhasi suapang naul᷊e bou saki pisi ko makatataku
1 Mawu nangonggo si Musa 2#Mat. 8:4; Mrk. 1:44; Luk. 5:14, 17:14manga atorang i'i hal᷊i u tundu ngu panganguhasi suapang naul᷊e bou saki pisi ko makatataku. Su l᷊ou tau e'e ilahe ko seng bursi, i sie mambeng iwawa sarang koa u imam, 3dang imam mumbawa si sie sarang l᷊ikuru pukakemang. Boko tuhu pamariksaange tau e'e seng naul᷊e, 4imam mundoi si sie pumbawa dua mbau burung ko wiahi ko tawe haram, dingang u simpoto kau cemara, tal᷊i mahamu simpoto l᷊au hisop simposo. 5Burung simbau mambeng ipoto su wawo u kuring tana ko pia tahoe ake ko bursi bou kal᷊ipupu u ake. 6Burung simbau l᷊ai dingang u kau cemara, tal᷊i ko mahamu l᷊au hisop simposo mambeng il᷊awu su l᷊al᷊ung u daha ngu burung ko seng mbuae nipoto. 7Imam mamusi u daha ngu burung e'e paka pitu su tau ko seng naul᷊e, dang mul᷊ahe i sie ko seng bursi. Bou e'e burung ko mborong wiahi mambeng ipilo su ngudae. 8Bou e'e tau e'e mambeng mangunsa pakeange, mangahuri kaul᷊i u utae, dang mundeno. Kuteu i sie seng ko bursi, dang botonge sumu sarang l᷊al᷊ung u pukakemang, kateho pitu l᷊ou l᷊ai i sie mborong ta botonge sumu sarang l᷊al᷊ung u kemae sisane.
9Su l᷊ou kapitunge i sie mambeng mangahuri kaul᷊i u utae, kumie l᷊ai, kingkondae dang kaul᷊i u ruku ko ene su badange. Bou e'e i sie mambeng mangunsa pakeange dang mundeno. Bou e'e i sie mbuhue ko bursi. 10Su l᷊ou kawal᷊unge tau e'e mambeng mumbawa dua mbau ana u domba ko ese l᷊au simbau ana u domba kowawine umurie sintaung, ko kaul᷊ie takoae kurange. Su l᷊ikuri e'e l᷊ai tilu ngkilo tapong ko seng nil᷊aukang u l᷊ana zaitung dang simbahageang tatilu ngu literi l᷊ana zaitung. 11Bou e'e imam mambeng mumbawa si sie dingang u sasumbange e'e sarang saruang u Kema ngu Mawu. 12Imam mambeng mangal᷊a ana u domba ko ese simbau dang simbahageang tatilu l᷊ana zaitung guna ngu korbang ghaghanti ngu karugiang, dang mangonggo e'e kere sasumba patode su Mawu 13Ana u domba e'e mambeng ihatange su tampa ko nitani guna ngu pamamotokang binatang guna ngu korbang pangangampung u dosa l᷊au korbang tongkateng. Domba e'e mambeng ihata su se'e ual᷊ingu korbang ghaghanti ngu karugiang l᷊au korbang pangangampung u dosa ko tumaniu susi dang makoa bageang u imam. 14Imam mambeng mangal᷊a singkodo daha ngu ana u domba bou e'e mamuha ngu e'e su tul᷊i kuaneng dang su ma u tal᷊imboro ngu l᷊ima kuaneng l᷊au su ma u tal᷊imboro l᷊aeri kuaneng taumata ko sarung ilahe ko bursi. 15Bou e'e imam mangal᷊a singkodo l᷊ana zaitung dang manuang su pal᷊eri u l᷊imae ko kuihi. 16Bou e'e i sie mul᷊awu ngu tal᷊imboronge ko kuaneng su l᷊al᷊ung u l᷊ana, dang mamusi u e'e pakapitu su l᷊al᷊ung u Kema ngu Mawu. 17Bou e'e l᷊ana singkodo ko ene su l᷊imange mambeng iwuhange su manga tampa ko seng mbuae niwuha ngu daha, e'e ko su tul᷊i kuaneng, su ma u tal᷊imboro ngu l᷊ima ko kuaneng, dang su ma u l᷊aeri ko kuaneng u tau ko sarung ilahe ko bursi. 18L᷊ebe ngu l᷊ana mambeng ituang su wawo u timbo u tau e'e. Dingang kere'e imam seng nukoa tundu ngu panganguhasi guna ngu tau e'e su saruang u Mawu.
19Bou e'e imam mambeng mangonggo korbang pangangampung u dosa tadeau tau ko mal᷊amuhu e'e makoa ko bursi. Masue bou e'e i sie mambeng muhata binatang guna ngu korbang tongkateng 20dang mangonggo e'e singkahindo dingang u korbang l᷊ahaghesi su wawo u mesba. Dingang kere'e imam seng nukoa tundu ngu panganguhasi guna ngu tau e'e, dang i sie nakoa ko bursi.
21Boko tau e'e ko susa dang ta makatanggong, kuteu guna ngu korbang ghaghanti ngu karugiang i sie botonge kitang mumbawa ana u domba ko ese guna ngu sasumba patode su Mawu. Su l᷊ikuru e'e singkilo tapong ko seng nil᷊aukang u l᷊ana zaitung guna ngu korbang l᷊ahaghesi, l᷊au simbahageang tatilu literi l᷊ana zaitung. 22I sie l᷊ai mambeng mumbawa burung paluma ko makuda darua arako tarkuku ko makuda: simbau guna ngu korbang pangangampung u dosa dang simbau l᷊ai guna ngu korbang tongkateng. 23Kaul᷊i u sasumba e'e mambeng iwawae sarang koa u imam su saruang u Kema ngu Mawu su l᷊ou kawal᷊unge bou tundu ngu panganguhasi watangenge. 24Imam mangal᷊a ana u domba l᷊au l᷊ana zaitung e'e dang mangonggo e'e kere sasumba patode su Mawu, dang e'e guna ngu bageang u imam. 25Bou e'e imam mambeng muhata domba e'e dang mamuha dahange singkodo su tul᷊i kuaneng, su ma u tal᷊imboro ngu l᷊ima ko kuaneng l᷊au su ma u tal᷊imboro ngu l᷊aeri ko kuaneng u tau ko sarung ilahe seng ko bursi. 26Imam mambeng manatu ngu l᷊ana singkodo su pal᷊eri u l᷊imae ko kuihi 27dang dingang u tal᷊imboro ngu l᷊imange ko kuaneng mamusi u l᷊ana e'e pakapitu su l᷊al᷊ung u Kema ngu Mawu. 28Bou e'e l᷊ana singkodo ko ene su l᷊imange mambeng iwuhange su manga tampa ko seng mbuae niwuha ngu daha, e'e ko su tul᷊i kuaneng, ma u tal᷊imboro ngu l᷊imange ko kuaneng l᷊au su ma u tal᷊imboro ngu l᷊aeri ko kuaneng u tau ko sarung ilahe ko bursi. 29L᷊ebe ngu l᷊ana mambeng itatu su wawo u timbo u tau e'e guna ngu tundu ngu panganguhasi watangenge su saruang u Mawu.
30Bou e'e imam mambeng mangonggo burung paluma ko makuda simbau arako tarkuku ko makuda 31guna ngu korbang pangangampung u dosa, dang simbau ko wal᷊inge l᷊ai guna ngu korbang tutungang singkahindo dingang u korbang l᷊ahaghesi. Dingang kere'e imam seng nukoa tundu ngu panganguhasi tau e'e su saruang u Mawu.
32Ko e'e atorang hal᷊i u tundu ngu panganguhasi masue bou saki pisi ko makatataku guna ngu taumata ko ta makaupili.
Kal᷊ahene su wal᷊e
33 Mawu nangonggo si Musa l᷊au si Harun 34manga atorang hal᷊i u wal᷊e ko nikariketang u kal᷊ahene ko mamesa. Manga atorang i'i nipake suapang bangsa Israel nusumu su Kanaan, wanua ko ninggile u Mawu si sire. 35I sai-sai ko makarea kal᷊ahene su wal᷊enge, mambeng mangul᷊i hal᷊i e'e su imam. 36Su horo u imam sumongo mamariksa kal᷊ahene e'e, i sie mambeng muparenta tadeau kaul᷊i u sal᷊iumpuhi mambeng pakipasuwang bou wal᷊e e'e. Boko ta, kaul᷊i u patiku su l᷊al᷊ung u wal᷊e e'e makoa ko mal᷊amuhu. Bou e'e imam mambeng sumongo 37guna ngu mamariksa kal᷊ahene e'e. Boko pia manga l᷊ol᷊o ko mangal᷊a ijonge arako mangal᷊a hamue ko tuhungang kere ko sumu sarang l᷊al᷊ung u meseli, 38imam mambeng manintang u wal᷊e e'e dang mupakawala ngu wal᷊e e'e makakunsi pitu l᷊ou l᷊iwuenge. 39Su l᷊ou kapitunge i sie mambeng sumongo dang sau mamariksa kal᷊ahene e'e. Boko kal᷊ahene e'e namesa, 40-41i sie mambeng mamarenta tadeau manga watu ngu meseli ko nikahino ngu kal᷊ahene e'e mambeng pakibongkari dang kaul᷊i u meseli bahageang l᷊al᷊unge pakikikisi. Plesteri ko nikikisi l᷊au manga watu e'e mambeng irume sarang tampa simbau ko mal᷊amuhu su l᷊ikuru soa. 42Bou e'e manga watu ko nipasuwang e'e mambeng ighanti dingang u manga watu ko wuhu. Kaul᷊i u meseli wal᷊e e'e mambeng lapisang dingang u plesteri ko wuhu.
43Boko kal᷊ahene e'e sau l᷊umitou, sumbal᷊i manga watu ngu wal᷊e seng nighanti dang manga meseli seng nikikisi dang sau niplesteri, 44kuteu imam mambeng sumongo dang sau mamariksa wal᷊e e'e. Boko kal᷊ahene e'e mang namesa kuteu wal᷊e e'e ko mal᷊amuhu 45dang mambeng ibongkari. Manga watu, manga kau, dang kaul᷊i u plesteri mambeng iwawa sarang tampa ko mal᷊amuhu su l᷊ikuru soa. 46Su horo u e'e i sai-sai ko musumu su l᷊al᷊ung u wal᷊e e'e makoa ko mal᷊amuhu sarang matangutiti sumira. 47I sai-sai ko matiki arako kumang su wal᷊e e'e mambeng pangunsa l᷊akue.
48Kateho boko imam sumongo dang tuhu pamariksaange seng ta sau nul᷊umitou kal᷊ahene suapang wal᷊e e'e sau niplesterang, i sie mambeng mul᷊ahe wal᷊e e'e ko bursi, watu'u kal᷊ahene seng nailang kaul᷊ie. 49Guna ngu mupakasusi ngu wal᷊e, imam mambeng mangal᷊a burung darua, kau cemara, tal᷊i ko mahamu dang hisop simposo. 50Burung simbau mambeng ipoto su wawo u kuring ko pia tahoe ake ko bursi bou kal᷊ipupu u ake. 51Bou e'e kau cemara, tal᷊i mahamu, hisop l᷊au burung ko mborong wiahi mambeng il᷊awu su l᷊al᷊ung u daha ngu burung ko seng nipoto dang su l᷊al᷊ung u ake ko bursi. Bou e'e wal᷊e e'e mambeng ipusikang u e'e paka pitu. 52-53Burung ko mborong wiahi mambeng ipilo su ngudae su l᷊ikuru soa. Ko kere'e tundu ngu pananusi ngu wal᷊e, dang wal᷊e e'e nakoa ko bursi.
54Ko e'e manga atorang hal᷊i u saki pisi ko makatataku, 55-56hal᷊i u kal᷊ul᷊i, hene arako manga l᷊ol᷊o ko mawira arako sahunu su badang, dang hal᷊i u kal᷊ahene su pakeang arako su wal᷊e. 57Manga atorang e'e gunange tadeau makapanantu manga apa e'e ko bursi arako mal᷊amuhu.
Currently Selected:
IMAMAT 14: PLT
Highlight
Copy
Compare
Share
Want to have your highlights saved across all your devices? Sign up or sign in
