IMAMAT 13
13
Atorang hal᷊i u saki pisi ko makatataku
1 Mawu nangonggo si Musa l᷊au si Harun manga atorang i'i: 2Boko singkatau pia manga kal᷊ul᷊i, arako hene arako l᷊ol᷊o ko mawira su pisinge ko botonge makakoa saki pisi ko makatataku, i sie mambeng iwawa sarang koa u imam hintou ngi Harun. 3Imam mambeng mamariksa bahageang ko masaki bou pisi ngu tau e'e. Boko rukue ko ene su bahageang e'e makoa ko mawira, dang bahageang ko masaki tuhungang lebe mal᷊al᷊ung bou pisi su sindihange, tau e'e pia sakie pisi ko makatataku. Imam mambeng mul᷊ahe tau e'e ko mal᷊amuhu. 4Kateho boko bahageang ko masaki mawira dang ta nangilebe mal᷊al᷊ung bou pisi su sindihange, dang rukue su bahageang e'e l᷊ai ta nawira, tau e'e mambeng ipakaghea pitu l᷊ou l᷊iwuenge. 5Su l᷊ou kapitunge, imam mambeng sau mamariksa si sie. Dang boko tuhu titonge saki e'e mborong musul᷊ung kakakoae dang ta namesa, tau e'e mambeng ipakaghea sau pitu l᷊ou l᷊iwuenge. 6Su l᷊ou kapitunge imam mambeng sau mamariksa si sie, dang boko bahageang ko masaki seng kal᷊aul᷊enge dang ta namesa, imam mambeng mul᷊ahe tau e'e ko bursi. E'e saki pisi ko ta makatataku. Tau e'e mambeng mangunsa l᷊akue e'e dang i sie makoa ko bursi. 7Kateho boko suapang mbuae nilahe u imam ko bursi saki u tau e'e namesa, i sie mambeng musul᷊e sarang koa u imam. 8Imam mambeng sau mamariksa si sie, dang boko sakie mang seng namesa, tau e'e mambeng ilahe ko mal᷊amuhu; i sie pia sakie pisi ko makatataku.
9Singkatau ko pia sakie pisi ko makatataku mambeng iwawa sarang koa u imam. 10Boko tumuhu pamariksaang u imam pisi ngu tau e'e pia sahunu mawira ko nuhempang dang rukue su bahageang e'e nawira, 11tau e'e pia sakie pisi ko makatataku. Imam mambeng mul᷊ahe tau e'e ko mal᷊amuhu. I sie ta wahal᷊uasu ipakaghea, ual᷊ingu seng nal᷊ahe himoneu i sie ko mal᷊amuhu. 12Boko imam nakawua himoneu l᷊ol᷊o ko mawira e'e seng namesa bou timbo sarang l᷊aeri, 13dang tumuhu pamariksaange saki e'e seng namesa sarang kal᷊abo u badang dang kaul᷊i u pisinge seng nawira, tau e'e nil᷊ahe ko bursi. 14Kateho boko nul᷊umitou hene, imam mambeng sau mamariksa si sie. 15Boko e'e mang hene, tau e'e mambeng ilahe ko mal᷊amuhu, watu'u i sie ko pia sakie pisi ko makatataku. 16Kateho boko hene e'e seng naul᷊e dang sau nawira, tau e'e mambeng mutumatingo su imam 17guna ngu sau ipariksang. Boko hene e'e seng sau nawira, imam mambeng mul᷊ahe tau e'e seng ko bursi.
18Boko singkatau pia wisul᷊i ko seng naul᷊e, 19kateho su l᷊inae nul᷊umitou sahunu ko mawira arako manga l᷊ol᷊o ko mawira sal᷊a mahamu, tau e'e mambeng mutumatingo su imam 20guna ngu ipariksang. Boko manga l᷊ol᷊o e'e tuhungang lebe mal᷊al᷊ung bou pisi su sindihange dang rukue su bahageang e'e seng l᷊ai nawira, imam mambeng mul᷊ahe tau e'e ko mal᷊amuhu. Wisul᷊i e'e ko panitakeng u saki pisi ko makatataku. 21Kateho boko tumuhu pamariksaang u imam rukue su bahageang e'e ta nawira, dang bahageang e'e ta nangilebe mal᷊al᷊ung bou pisi ko su sindihange, kitang lebe makuda kulurie, tau e'e mambeng ipakaghea pitu l᷊ou l᷊iwuenge. 22Boko l᷊ol᷊o ko mawira e'e namesa, imam mambeng mul᷊ahe tau e'e ko mal᷊amuhu ual᷊ing i sie ko pia sakie pisi ko makatataku. 23Kateho boko l᷊ol᷊o ko mawira e'e ta muwal᷊u dang l᷊ai ta namesa, e'e kitang l᷊inau wisul᷊i, inau tau e'e ilahe ko bursi.
24Boko singkatau pia l᷊esi natutung, bou e'e pisi su l᷊esi e'e nawira arako mawira sal᷊a mahamu, 25imam mambeng mamariksa si sie. Boko rukue su bahageang e'e nawira dang l᷊esie lebe mal᷊al᷊ung bou pisi ko su sindihange, kuteu saki pisi ko makatataku seng narike su l᷊esi ko natutung e'e, dang imam mambeng mul᷊ahe tau e'e ko mal᷊amuhu. 26Arawe boko rukue su tampa e'e ta nawira dang bahageang e'e ta nangilembo mal᷊al᷊ung bou pisi ko su sindihange, kitang lebe makuda kulurie, kuteu tau e'e mambeng ipakaghea pitu l᷊ou l᷊iwuenge. 27Su l᷊ou kapitunge imam mambeng sau mamariksa si sie. Boko l᷊ol᷊o ko mawira e'e namesa, kuteu tau e'e pia sakie pisi ko makatataku dang mambeng ilahe ko mal᷊amuhu. 28Kateho boko l᷊ol᷊o ko mawira e'e ta nuwal᷊u, dang seng ta namesa, kitang dio nawira kulurie, e'e wal᷊inge saki pisi ko makatataku. Imam mambeng mul᷊ahe tau e'e ko mabursi, watu'u kuluri ko mawira e'e kitang l᷊inau l᷊esi ko natutung.
29Boko singkatau ko ese arako kowawine pia saki pisi su timboe arako su arenge, 30i sie mambeng ipariksa ngu imam. Boko bahageang ko masaki e'e lebe mal᷊al᷊ung dingang u pisi ko su sindihange, dang uta arako kumie su bahageang e'e nakoa ko maeha bou e'e marondosi, kuteu tau e'e pia sakie pisi ko makatataku dang mambeng ilahe ko mal᷊amuhu. 31Boko tumuhu pamariksaang u imam bahageang ko masaki e'e tuhungang ta lebe mal᷊al᷊ung bou pisi ko su sindihange, kateho ta nikarea uta arako kumie ko sehati su bahageang e'e, tau e'e mambeng ipakaghea pitu l᷊ou l᷊iwuenge. 32Su l᷊ou kapitunge, imam mambeng sau mamariksa bahageang ko masaki dang boko saki e'e ta namesa dang ta nikarea uta arako kumie ko maeha su bahageang e'e, dang l᷊ai tuhungang ta lebe mal᷊al᷊ung bou pisi ko su sindihange, 33tau e'e mambeng mangahuri uta arako kumie su sindihang u tampa ko masaki. Bou e'e i sie mambeng ipakaghea pitu l᷊ou l᷊iwuenge. 34Su l᷊ou kapitunge, imam mambeng sau mamariksa si sie. Boko sakie ta namesa, dang bahageang e'e tuhungang ta lebe mal᷊al᷊ung bou pisi su sindihange, tau e'e ilahe ko bursi dang mambeng mangunsa l᷊akue. 35Kateho boko suapang nil᷊ahe ko bursi sakie namesa, 36imam mambeng sau mamariksa si sie. Boko sakie e'e mang namesa, imam tawahal᷊uasi l᷊ai mamariksa apa uta arako kumi u tau e'e naeha, watu'u seng nal᷊ahe tau e'e ko mal᷊amuhu. 37Kateho boko tumuhu u titong imam sakie e'e ta namesa, dang nutumuwo uta arako kumie ko sehati su tampa e'e, kuteu saki e'e seng naul᷊e, dang imam mambeng mul᷊ahe tau e'e seng ko bursi.
38Boko singkatau ko ese arako kowawine pia l᷊ol᷊o ko mawira su pisinge, 39imam mambeng mamariksa tau e'e. Boko l᷊ol᷊o e'e tuhungang mawira sal᷊a wol᷊a, i sie kitang nikariketang u wumbuang, dang nil᷊ahe ko bursi.
40-41Boko singkatau ko ese nal᷊inggi su bahageang l᷊ikuri arako su bahageang su saruang u timboe, l᷊inggi e'e ta makapukoa si sie ko mal᷊amuhu. 42Kateho boko l᷊umitou sahunu ko mawira sal᷊a mahamu su timbo ko l᷊inggi, i sie pia sakie pisi ko makatataku. 43Imam mambeng mamariksa tau e'e, dang boko mang pia sahunue ko mawira sal᷊a mahamu, 44imam mambeng mul᷊ahe i sie ko mal᷊amuhu ual᷊ingu pia sakie pisi ko makatataku su timboe.
45Singkatau ko pia sakie pisi ko makatataku, mambeng pupake u l᷊aku ko ghaghehe dang mupakawala utae nasasunu. I sie mambeng manaka bahageang ko wawa bou pahesie dang mukumiha, “Mal᷊amuhu! Mal᷊amuhu!” 46Su kanandu u pia sakie e'e i sie mal᷊amuhu dang mambeng katana su l᷊ikuru pukakemang, marau bou manga taumata ko wal᷊inge.
Atorang hal᷊i u kal᷊ahene
47Boko pia kal᷊ahene #13:47: kal᷊ahene: Su l᷊al᷊ung u wahasa ngu Ibrani ipake didato ko musul᷊ung guna ngu “saki pisi ko makaghagha” dang “kal᷊ahene”. su pakeang arako su heka bou wol arako leneng, 48arako su pisi arako su manga apa ko nikoa bou pisi, 49dang kuluri u ko kal᷊ahene e'e mangal᷊a ijonge, arako mangal᷊a hamue, kuteu kal᷊ahene e'e haghi ngu ko mamesa dang mambeng ipakiwawua su imam. 50Imam mambeng mamariksa barang e'e, bou e'e mupakahae ngu barang e'e pitu l᷊ou l᷊iwuenge. 51Su l᷊ou kapitunge i sie mambeng sau mamariksa barang e'e, dang boko kal᷊ahene e'e mang seng namesa, barang e'e ko mal᷊amuhu. 52Imam mambeng manutung barang e'e, ual᷊ingu kal᷊ahene e'e haghi ngu ko murarike, inau mambeng ipakahupusi dingang u putung.
53Kateho boko tumuhu pamariksaang u imam kal᷊ahene e'e ta namesa su barang e'e, 54i sie mangoro tadeau barang e'e pakiuhasi dang sau ipakaghea pitu l᷊ou l᷊iwuenge. 55Bou e'e imam mambeng sau mamariksa barang e'e. Boko kal᷊ahene e'e seng ta namesa kateho kulurie tatapi musul᷊ung, barang e'e mborong ko mal᷊amuhu dang mambeng itutung, maneng kal᷊ahene e'e kitang pia su bahageang saruang, arako su bahageang l᷊ikuri. 56Kateho boko tumuhu pamariksaang u imam kal᷊ahene e'e seng kal᷊ailange, bahageang ko pia kal᷊ahene'e bou heka arako pisi e'e mambeng ghehe. 57Boko samuringe sau nutumimbul᷊i, kuteu kal᷊ahene e'e namesa, dang tataghuange mambeng manutung barang e'e. 58Boko suapang mbuae niuhasi kuluri u kal᷊ahene su barang e'e nailang, kuteu barang e'e mambeng iuhasi sau, mbuhue isigho ko bursi.
59Ko kere'e manga atorang hal᷊i u kal᷊ahene ko ene su pakeang arako su heka bou leneng arako wol arako su manga apa ko nikoa bou pisi.
Currently Selected:
IMAMAT 13: PLT
Highlight
Copy
Compare
Share
Want to have your highlights saved across all your devices? Sign up or sign in
