IMAMAT 15
15
Kal᷊al᷊amuhu su taumata
1 Mawu nangonggo si Musa l᷊au si Harun manga atorang i'i 2guna ngu bangsa Israel. Boko singkatau ko ese nil᷊al᷊engang u nana ual᷊ingu saki su barang ko ese, nana e'e ko mal᷊amuhu 3maneng ko nasuwang maneng l᷊ai ko natahang. 4Tampa ko nikangianeng arako nikatikilang u tau e'e nakoa ko mal᷊amuhu. 5-8I sai-sai ko makasuhung taumata ko nil᷊al᷊engang u nana e'e arako l᷊al᷊okange, arako nukumangiang su l᷊inau nikangianenge arako niru ngu tau e'e, mambeng mangunsa pakeange dang mundeno, dang i sie mal᷊amuhu sarang matangutiti sumira. 9Kakangianeng arako manga apa ko nikangianeng u tau ko nil᷊al᷊engang u nana makoa ko mal᷊amuhu. 10I sai-sai ko nakasuhung manga apa ko nikangianeng u tau e'e, makoa ko mal᷊amuhu sarang matangutiti sumira. I sai-sai ko muhengke barang e'e mambeng mangunsa pakeange dang mundeno, dang i sie ko mal᷊amuhu sarang matangutiti sumira. 11Boko tau ko nil᷊al᷊engang u nana ta nanguhasi l᷊imange horo nakasuhung taumata ko wal᷊inge, kuteu taumata ko nikasuhunge e'e mambeng mangunsa pakeange dang mundeno, dang i sie mal᷊amuhu sarang matangutiti sumira. 12Kuring tana ko nikasuhung u tau e'e mambeng ihose dang sal᷊iumpuhi ko nihinggonange mambeng iuhasi.
13Boko tau e'e naul᷊e, i sie mambeng mangampal᷊i pitu l᷊ou l᷊ai. Bou e'e i sie mambeng mangunsa pakeange dang mundeno su kal᷊ipupu u ake, kuteu i sie seng naburesi. 14Su l᷊ou kawal᷊unge i sie mambeng mumbawa dua mbau burung paluma ko makuda arako burung tarkuku ko makuda sarang saruang u tukari u Kema ngu Mawu bou e'e manarakang e'e su imam. 15Imam mambeng mangonggo burung simbau guna ngu korbang pangangampung u dosa, dang simbau l᷊ai guna ngu korbang tutungang. Dingang kere'e imam seng nukoa tundu ngu pananusi su tau e'e su saruang u Mawu.
16Boko singkatau ko ese mupasuwang u mani, i sie mambeng mundeno kateho tatapi ko mal᷊amuhu sarang matangutiti sumira. 17Manga barang apa ko bou heka arako pisi ko nikahino ngu mani e'e mambeng iuhasi; barang e'e ko mal᷊amuhu sarang matangutiti sumira. 18Suapang bou nutatamba, mbaeng ko ese arako l᷊ai kowawine mambeng mundeno, kateho i sire tatapi mal᷊amuhu sarang matangutiti sumira.
19Singkatau kowawine ko pia kotori, mal᷊amuhu pitu l᷊ou l᷊iwuenge. I sai-sai ko nakasuhung si sie makoa ko mal᷊amuhu sarang matangutiti sumira. 20Manga apa ko nikangianeng arako nikatikilang u kowawine ko pia kotori makoa ko mal᷊amuhu. 21-23I sai-sai ko nakasuhung tampa ko l᷊inau nikatikilang arako nikangianeng u kowawine ko pia kotori, mambeng mangunsa pakeange dang mundeno, dang i sie mal᷊amuhu sarang matangutiti sumira. 24Boko singkatau ko ese nutatamba dingang kowawine ko pia kotori, ko ese e'e l᷊ai makoa ko mal᷊amuhu pitu l᷊ou l᷊iwuenge dang apang l᷊al᷊okang ko nikatikilange l᷊ai makoa ko mal᷊amuhu.
25Boko singkatau kowawine l᷊al᷊engang u daha manga pira l᷊ou l᷊iwuenge su l᷊ikuru tempo ngu pia kotori, arako l᷊al᷊engang u dahange ta nangiro bou tempo ngu kotori, i sie mal᷊amuhu l᷊iwue ngu l᷊al᷊engang daha e'e kere su tempo ngu pia kotori. 26Tampa ko nil᷊al᷊okange arako nikangianenge su kanandu u tempo e'e makoa ko mal᷊amuhu. 27I sai-sai ko makasuhung tampa e'e makoa ko mal᷊amuhu l᷊ai. I sie mambeng mangunsa pakeange dang mundeno, dang i sie ko mal᷊amuhu sarang matangutiti sumira. 28Suapang daha e'e mangiro l᷊umal᷊eng, kowawine e'e mambeng mangampal᷊i pitu l᷊ou l᷊iwuenge. Mbuhue bou e'e i sie seng ko bursi. 29Su l᷊ou kawal᷊unge i sie mambeng mumbawa burung paluma ko makuda arako burung tarkuku ko makuda darua su imam su saruang u Kema ngu Mawu. 30Burung simbau mambeng isumbange guna ngu korbang pangangampung u dosa, dang simbau l᷊ai guna ngu korbang tongkateng. Dingang l᷊al᷊eng e'e imam nukoa tundu ngu pananusi su kowawine e'e su saruang u Mawu.
31 Mawu nangoro si Musa pangonggo ingati su bangsa Israel tadeau muparhatikang kangereng i sire ko mal᷊amuhu dang kangereng ta, tadeau i sire ta mupakal᷊amuhu Kema ngu Mawu ko ene su tal᷊oara u pukakemang i sire. Boko i sire mupakal᷊amuhu Kema e'e, i sire sarung mate.
32Ko kere'e manga atorang hal᷊i u taumata ko ese ko mupasuwang u nana ual᷊ingu saki u ko ese arako mupasuwang mani, 33hal᷊i u kowawine ko pia kotori, dang hal᷊i u ko ese ko nutatamba dingang kowawine ko pia kotori.
Currently Selected:
IMAMAT 15: PLT
Highlight
Copy
Compare
Share
Want to have your highlights saved across all your devices? Sign up or sign in
