IMAMAT 12

Tundu ngu pananusi kowawine bou nahinding

1 Mawu nangonggo si Musa manga atorang i'i 2guna ngu bangsa Israel. Boko singkatau ana kowawine mahinding u ana ko ese, kuteu pitu l᷊ou l᷊iwuenge kowawine e'e ko mal᷊amuhu, musul᷊ung kere i sie kahil᷊al᷊engang u kotori. 3#Kar. 17:11-12; Luk. 2:21 Su l᷊ou ko kawal᷊unge anae mambeng isunati. 4Bou e'e mborong tilumpul᷊otilu su l᷊ounge kowawine e'e mborong ko mal᷊amuhu ual᷊ingu kahil᷊al᷊engang u daha. I sie ta botonge manuhung manga barang ko ipake guna ngu punggaweting dang ta botonge musumu su l᷊al᷊ung u Kema ngu Mawu sarang tempo ngu pananusi si sie masue.

5Boko singkatau kowawine mahinding ana kowawine, kuteu mapul᷊opa su l᷊ou nge l᷊iwuenge kowawine e'e mal᷊amuhu, musul᷊ung kere i sie ko kahil᷊al᷊engang u kotori. Bou e'e mborong nungupul᷊onung su l᷊ounge kowawine e'e mborong ko mal᷊amuhu ual᷊ingu kahil᷊al᷊engang u kotori. 6Mal᷊iu bou tempo ngu pananusi si sie masue, maneng ual᷊ingu seng nahinding ana ko ese arako ana kowawine, kowawine e'e mambeng mumbawa sasumba su imam su saruang u tukari u Kema ngu Mawu. Sasumba e'e ko simbau ana u domba umurie sintaung guna ngu korbang tongkateng, l᷊au simbau burung tarkuku ko makuda arako tarkuku ko makuda guna ngu korbang pangangampung u dosa. 7Imam mambeng manarakang sasumbange su Mawu dang mukoa upacara guna ngu mangumu l᷊amuhu u kowawine e'e, hakiu i sie makoa ko bursi. Inau ko e'e mambeng ikoa u singkatau kowawine suapang i sie mbuae nahinding.

8 # Luk. 2:24 Boko kowawine e'e ta makatanggong manadia simbau ana u domba, i sie mambeng mumbawa dua mbau burung tarkuku ko makuda arako tarkuku ko makuda: simbau guna ngu korbang tongkateng, dang simbau l᷊ai guna ngu korbang pangangampung u dosa. Imam mambeng mukoa upacara guna ngu mangumu l᷊amuhu u kowawine e'e, kuteu i sie makoa ko bursi.

Currently Selected:

IMAMAT 12: PLT

Highlight

Copy

Compare