KARARIADI 50

1I Yusuf nurumuma u watangenge si papange apiru kasangie dang nangimbu pahesi papange. 2Bou e'e i Yusuf nuparenta su murarampa badang tau ko nate tadeau purampa badang i Yakub. 3Hal᷊i e'e mupake tempo paupul᷊o su l᷊ounge, e'e tempo ko seng biasa ipake u tau ko mundampa badang u tau ko nate. Tau Mesir nul᷊al᷊utu ngi Yakub pitumpul᷊o su l᷊ounge l᷊iwuenge.

4Suapang nasue tempo ngu mul᷊al᷊utu, i Yusuf nangul᷊i su manga pul᷊ahal᷊ie, “Habariko tatanataku i'i su ratu, 5#Kar. 47:29-31‘Su tempo ngi papaku seng masandighi temponge manintang u dunia, niroie ia pudiandi si sie, himoneu l᷊ang u sarung mul᷊uwing i sie su l᷊al᷊ung u kubul᷊i ko seng nisadiange su wanua ngu Kanaan. Watu'u e'e, pakawalako l᷊ang u matamai guna ngu mul᷊uwing i papa ngu l᷊angu. Bou e'e l᷊ang u sarung musul᷊e.’ ”

6Bou e'e ratu nangul᷊i, “Tamaite l᷊uwing i papa ngu kere ko seng nipudiandi ngu si sie.”

7I Yusuf natamai nul᷊uwing i papange. Kaul᷊i u mul᷊ahal᷊i ngu ratu, manga maghaghurang u istana, l᷊au kaul᷊i u manga mapapangkati su Mesir, natamai singkahindo dingang i Yusuf. 8Walaghenge, manga tamahuaringe, manga ana u simbaue ko wal᷊inge l᷊ai natamai. Kitang manga ana ko dadio l᷊au binatang papal᷊iharang i sire nitintang su Gosyen. 9Pasukang su kereta l᷊au su kawal᷊o nutumuhu l᷊ai, hakiu ghapang e'e nakoa ko manandu kahingang.

10Suapang i sire nurating tampa u taumata mamukul᷊i gandung su Goren-Haatad, su simbuka ngu raki Sal᷊uhi Yordan, i sire nukahuang dingang u kasasusa l᷊au tingihi mauha. I Yusuf nukoa tundu ngu komol᷊ang ko nikasusang, pitu l᷊ou l᷊iwuenge. 11Suapang kawanua ngu Kanaan nakawua kasasusa su Goren-Haatad, i sire nangul᷊i, “Wal᷊inge gampang kasusange tundu ngu komol᷊ang ko nikasusang tau Mesir e'e!” E'e sabapie tampa e'e nisigho Abel-Mizraim. #50:11: Abel-Mizraim: Areng i'i tingihie kere didato Ibrani ko mangal᷊enge “pul᷊al᷊uwing u tau Mesir”.

12Kere'e manga ana i Yakub nukoa apang ko nitanata ngi Yakub si sire. 13#Wuk. 7:16I sire numbawa pal᷊iae sarang Kanaan dang nil᷊uwing su l᷊al᷊ung u L᷊iang Makhpela, su simbuka ngu raki u Mamre, su anseri ko seng nil᷊uangeng i Abraham bo i Efron tau Het e'e, guna ngu ikoa pul᷊al᷊uwingang. 14Suapang i Yusuf mbuae nul᷊uwing si papange, i sie nusul᷊e sarang Mesir singkahindo dingang u manga ana u singkataunge l᷊au kaul᷊i u taumata ko nutumuhu si sie nul᷊uwing i papange e'e.

I Yusuf nupakal᷊oahi naung manga tuhange

15Suapang i papa ngi sire seng nanintang u dunia, manga tuhang i Yusuf nangul᷊i, “Kirapa boko i Yusuf mborong masaki naung dang mamal᷊isi kal᷊al᷊ai i kite horo?” 16Watu'u e'e i sire nundoho ngu tatanata i'i si Yusuf, “Su horo u i papa ngi kite nanintang u dunia, 17i sie nundoi si kami pangul᷊i si kau kiri'i, ‘ampungeko pusansal᷊a ko horo seng nikoa u manga tuhangu si kau.’ Inau, kere manga l᷊ang u Mawu Ruata ko nisumba ngi papa ngi kite, i kami mukahioro, ampungeko pusansal᷊a ko seng nikoa i kami.” I Yusuf numpal᷊ehe su tempo ngu nakaringihi tatanata e'e.

18Bou e'e manga tuhange e'e sisane nusumongo dang nusuba su tingonge dang nangul᷊i, “I kami i'i l᷊ang u.”

19Kateho i Yusuf nangul᷊i si sire, “Kumbahang mataku; watu'u ia ta makapukoa kere Mawu Ruata. 20I kumu seng nughaghighili mukoa kal᷊al᷊ai si sia, kateho Mawu Ruata namal᷊u kal᷊al᷊ai e'e nakoa kapapia, tadeau dingang ko nariadi horo e'e maul᷊i taumata ko muwiahi orasi i'i botonge ipakasal᷊amati. 21Kumbahang maghagha. Ia sarung mupakasuku puwawiahi i kumu l᷊au manga ana i kumu.” Kere'e i sie nupakal᷊oahi naung u manga tuhange dingang u manga didato ko mahimumu, hakiu natuno naung i sire.

I Yusuf napul᷊e asal᷊ie

22I Yusuf tatapi natana su Mesir dingang u manga ana u simbaue; i sie nuwiahi sarang mahasumapul᷊o su taunge umurie. 23I sie mborong nakawua ana pung i Efraim. I sie l᷊ai mborong nakaputal᷊ung manga ana i Makhir, e'e ko pung i Manasye, kere anae sisane. 24Angkunge su manga ana u singkataunge, “Tempoku seng masandighi, kateho Mawu Ruata nal᷊ahe sarung mamal᷊ihara si kumu dang mangaha si kumu sumuwang bou wanua i'i, sarang wanua ko seng nipudiandi-E dingang u tewa si Abraham, si Ishak l᷊au si Yakub.” 25Bou e'e i Yusuf nundoi kaul᷊i u ana u singkataunge putewa, angkunge, “Pudiandiko si sia, himoneu boko Mawu Ruata mangaha si kumu sarang wanua e'e, i kumu sarung l᷊ai mumbawa pal᷊iaku.” #Sas. 13:19; Yos. 24:32; Ibr. 11:22 26Bou e'e i Yusuf napul᷊e asal᷊ie su Mesir su umurie mahasumapul᷊o su taunge. I sire nundampa badange dang nutaho si sie su l᷊al᷊ung u pal᷊ia.

Currently Selected:

KARARIADI 50: PLT

Highlight

Copy

Compare