KARARIADI 49
49
Didato ngi Yakub ko panginsuenge
1Bou e'e i Yakub nukui manga anae dang nangul᷊i, “Pukomol᷊iko su si'i, pakasandighi ia. Sarung daku ihabari si kumu apa ko sarung mariadi si kumu su l᷊ou samuri:
2Pukomol᷊iko, ei manga ana i Yakub,
raringihiko i Israel, i papa ngi kumu.
3I Ruben, anaku ko iyakang,
ko i kau kakakuatiku, wua ko kahorokange bou katatoghasiku.
I kau kasetarenge dang katoghasenge bou tal᷊oara u kaul᷊i u anaku.
4I kau maehong magholang kere ake,
hakiu wal᷊inge ko kahimotongange;
watu'u i kau seng natiki dingang u dokaku,
i kau seng nul᷊amuhu l᷊al᷊okang i papa ngu.
5I Simeon l᷊au i Lewi tamahuari;
aghiri sire ko pakakasi u kal᷊ahasa.
6Ia ta mutumuhu su l᷊al᷊ung u pughaghighili sire,
l᷊au su l᷊al᷊ung u komol᷊ang i sire.
Watu'u i sire mamate su l᷊al᷊ung u wawal᷊uang,
nupakal᷊ome ngu banteng guna ngu kasanangang.
7L᷊aane su wawal᷊uang i sire, ual᷊ingu katurue.
L᷊aane su padukul᷊i sire, ual᷊ingu tingkai i sire.
Ia sarung mupukal᷊iaesi i sire su kal᷊abo u Israel.
Ia sarung manawuhi si sire su tal᷊oara u kaul᷊i u bangsa.
8I Yehuda, i kau sarung manumbou pol᷊ohi rokau;
manga ana u singkatau ngu sarung mundalo si kau
dang musuba su tingo ngu.
9 #
Rek. 24:9; Kl᷊h. 5:5 I Yehuda musul᷊ung u singa ko makuda;
i sie mamate kinae, bou e'e musul᷊e sarang sal᷊ehie;
i sie mukal᷊umbinahi bou e'e mul᷊umal᷊oka,
dang takoae sarang manga singkatau ko wahani manal᷊uka si sie.
10I Yehuda sarung muhinggo tiking u kararatuang,
hintou nge sarung mamarenta sarang kal᷊iwuenge.
Manga bangsa sarung mumbawa balasteng,#49:10: manga bangsa … balasteng, pari e'e mangal᷊enge.
dang musuba dingangu musumulung su tingonge.
11Ana u keledainge niikie su kau,
kau anggori ko kapiange.
I sie mangunsa dingang u anggori,
anggori kere kal᷊ahamu u daha.
12Mahamu matange ual᷊ingu nanginung anggori,
mawira isie ual᷊ingu nanginung susu. #49:12: Mahamu … susu; arako matange lebe mahamu bou anggori; isie lebe mawira bou susu.
13I Zebulon sarung matana masandighi u sasi;
manga kapal᷊i sarung mamal᷊ango su apenge;
murating u Sidon pusarang u wilayange.
14I Isakhar e'e kere keledai ko matoghasi
ko kal᷊al᷊oka su tal᷊oara u putatahong u wawanenge.
15Nikawuae kirapa kapiange tampa e'e
dang kirapa kasidadae wanua e'e,
kuteu i sie nukumakurung sadia ipamasang wawaneng,
dang nisihasa puhal᷊i kere l᷊ang.
16I kau Dan, sarung mamonesi bangsa ngi kumu,
I kau makoa suku kere suku ko wal᷊inge su Israel.
17I kau musul᷊ung u katoang su wiwihi u l᷊al᷊eng,
katoang ko pia bisange su wiwihi u l᷊al᷊eng ko dio,
ko manodo pakeli kawal᷊o sarang mawahung sumasakenge.
18O Mawu, kasasal᷊amati ko ionggo u, ko e'e kahi daku ampal᷊eng.
19I Gad, i kau sarung ialong u mul᷊ahampasi,
kateho i kau sarung musul᷊e muhampasi si sire.
20I Asyer, kangu maul᷊i matatemang,
I kau sarung manadia kang u mararatu.
21I Naftali, musul᷊ung u rusa ko napilo,
masasidada manga anae.#49:21: Naftali, … manga anae; arako Naftali musul᷊ung kau matubung dingang u manga lelange ko tamata.
22I Yusuf musul᷊ung keledai makuda,
keledai maghila masandighi u simbul᷊u ake,
tutal᷊ang su l᷊engehi u wul᷊uri.#49:22: Yusuf … l᷊engehi u wul᷊uri, kere kau su simbul᷊u ake, kau ngu manga wua ko nawal᷊andang su meseli.
23Roka mangalo marasai,
mumbatu si sie dingang papiti.
24Kateho i Yusuf tatapi matoghasi takiahi,#49:24: Kateho … takiahi, arako papiti i sire nabare dang naghagholang, manga uha u takiahi nababusu.
papitie tatapi matitoghi,
ual᷊ingu kawasa ngu Mul᷊al᷊ukari Ko Tumaniu Matoghasi,
Mawu Ruata ngi Yakub, Mananirung Israel.
25Mawu Ruata ngi papa ngu mutul᷊ung si kau;
Ko Tumaniu Makawasa mangal᷊amati si kau
dingang u tahiti bou l᷊angi
l᷊au ake bou l᷊al᷊ung u tana.
Dingang u ana l᷊au sapi,
26gandung l᷊au bungang.#49:26: Pari ayeti i'i mangal᷊enge: Gandung l᷊au bungang; Ibrani i upungu lebe matoghasi bou.
Al᷊amati u Mawu Ruata ngi papa ngu
mamal᷊iu bou kakakala u manga wul᷊uri ko tumaniu mal᷊iwue.#49:26: Simbau salenang ko tuwei: manga wul᷊uri ko tumaniu mal᷊iwue; Ibrani i upungku sarang.
Mal᷊umbako l᷊umintu kaul᷊i u al᷊amati e'e sarang wawo u timbo i Yusuf, sarang wawo u ruhue.
Ko i sie kapiange su tal᷊oara u manga tamahuaringe.
27I Benyamin ko sarigala ko wahani.
Su mal᷊ukari i sie manumbou kinae.
Su huwi i sie mupapahia u e'e.”
28Ko e'e kapul᷊odua suku ngu Israel, dang manga didato ko nihabari papa ngi sire su tempo ngu nuhabari adati putatal᷊ei si sire singkatau-singkatau.
I Yakub napul᷊e asal᷊ie dang nil᷊uwing
29-30 #
Kar. 23:3-20
Bou e'e i Yakub nutumanata su manga anae, “Seng ta mal᷊iwue ia manintang u dunia kere manga i upungku. Hindo l᷊uwingko ia su sindihang i sire su l᷊al᷊ung u L᷊iang su Makhpela, simbuka ngu raki u Mamre su wanua ngu Kanaan. I Abraham seng nul᷊uang l᷊iang l᷊au anseri su sindihange bo i Efron tau Het tadeau ikoa pul᷊al᷊uwingang. 31#Kar. 25:9-10, 35:29Su se'e seng nil᷊uwing i Abraham, l᷊au i Sara, i Ishak l᷊au i Ribka; dang i Lea l᷊ai daku nil᷊uwing su se'e. 32Anseri l᷊au l᷊iang su se'e seng nil᷊uangeng bou tau Het. L᷊uwingte ia su se'e.” 33#Wuk. 7:15Suapang i Yakub nasue bou nutumanata su manga anae, i sie nul᷊umal᷊oka bou e'e namal᷊usi sinangonge.
Currently Selected:
KARARIADI 49: PLT
Highlight
Copy
Compare
Share
Want to have your highlights saved across all your devices? Sign up or sign in
