KARARIADI 38

I Yehuda l᷊au i Tamar

1Patehang su tempo e'e i Yehuda nanintang u manga ana u singkataunge dang natana singkahindo dingang i Hira, singkatau ko ese asal᷊ie bou soa ngu Adulam. 2Pai se'e i Yehuda nughawe dingang u singkatau ana mahua ngu Kanaan, ana i Sua, bou e'e i sire nukawing. 3Ana i sire rua kahimotongange ko ese nisigho ngi papange i Er. 4Ana karuange, l᷊ai ko ese, nisigho nge i Onan. 5Ana katilunge l᷊ai ko ese, dang nisighonge si Syela. Su tempo ngi Syela nipahinding i Yehuda ene su Kezib.

6I Yehuda nupukawing i Er, anae ko iyakang dingang i Tamar. 7Kakanoa i Er ko dal᷊ai kahingang, hakiu Mawu nuwawal᷊uang si sie dang namate si sie. 8Bou e'e i Yehuda nangul᷊i si Onan tuari ngi Er, “Tamaite i kau sarang wal᷊u ngu tuhangu, dang katikie dingange. Pungganapite hal᷊i u si sie, watu'u i kau tuari ngu kawinge; dingang kere'e tuhangu makarea hintou.” 9Kateho i Onan matitong himoneu ntihang manga anae ta sarung mariadi koae. Inau, sintinia i sie mutatamba dingang u wal᷊u ngu tuhange e'e. Niwalae maninge pasuwang su l᷊ikuri tadeau tuhange ta sarung makarea hintou. 10Kakanoae e'e nakapuwawal᷊uang Mawu, dang Mawu namate si sie l᷊ai. 11Bou e'e i Yehuda nangul᷊i si Tamar manuhange e'e, “Pusul᷊ete sarang wal᷊e ghaghurang u dang katanae su se'e kere singkatau ko wal᷊u sarang anaku i Syela mal᷊abo.” I sie nangul᷊i kere'e ual᷊ingu mataku kumbahang sarang i Syela sarung ipate ngu Mawu l᷊ai, kere i sire rua tuhange. Kuteu i Tamar napul᷊e sarang wal᷊e ngu ghaghurange.

12Pira ngkatempo bou e'e kawing i Yehuda napul᷊e asal᷊ie. Suapang nasue tempo ngu mul᷊al᷊utu, i Yehuda nuhawu si Hira, ghawe'e bou Adulam e'e, matamai sarang Timna, tampa u manga dombae ighunting rukue. 13I Tamar nakarea habari himoneu i Yehuda i emponge sarung sumongo sarang Timna guna ngu munggunting ruku u manga dombae. 14Kuteu i sie nangahusi dingang u l᷊aku u wal᷊unge dingang l᷊aku ko wal᷊inge. Pahesie nitakae dingang u tatimbukung, bou e'e i sie nukumangiang su tukari sasukang soa ngu Enaim, su l᷊al᷊eng makoa sarang Timna. I Tamar matitong kahingang himoneu i Syela ana i Yehuda ko kahembokange, seng ko l᷊abo, kateho i sie mborong tangkeng l᷊ai nipukawing dingang ana ko makuda e'e.

15Su tempo ngi Yehuda nakawua si Tamar, nitikae kowawine e'e singkatau kowawine ko dal᷊ai, ual᷊ingu pahesie matataka. 16Bou e'e i Yehuda nusumandighi si sie su wiwihi u l᷊al᷊eng e'e, dang nangul᷊i, “Pira ko ipundokang u?” I sie wugha himoneu kowawine e'e ko manuhange sisane.

I Tamar nusumimbahi, “Walate si Tuang.”

17I Yehuda sau nangul᷊i, “Ia sarung mangonggo simbau kambing paranggang si kau.”

I Tamar nusumimbahi, “Botonge, asal᷊i pia l᷊uange, sarang i Tuang mundoho ngu kambing e'e.”

18“Apa l᷊uange?” kakina i Yehuda.

Nisimbahi Tamar, “Onggote si sia capi i Tuang dingang u tal᷊inge dang l᷊ai tiking ko ene si Tuang e'e.” I Yehuda nangonggo manga barang e'e si sie, bou e'e i sire nutatamba, dang i Tamar nikadehokang. 19I Tamar napul᷊e sarang wal᷊enge dang namuka tatimbukung u pahesie, bou e'e nupake sau pakeang u wal᷊unge.

20Pira ngkatempo bou e'e i Yehuda nundoi i Hira, ghawe'e, guna ngu pangunturi kambing e'e dang pundo sau manga barang ko seng nionggoe kere l᷊uange, kateho i Hira ta nakahombang kowawine e'e. 21I Hira nukakina su manga taumata su Enaim, “su apa kowawine ko dal᷊ai ko narange kumangiang su wiwihi u l᷊al᷊eng i'i?”

“Mborong ta sarang paghisa pia kowawine ko dal᷊ai su si'i,” nisimbahi sire.

22Bou e'e i Hira nusul᷊e sarang koa i Yehuda dang nangul᷊i, “Ia ta nakarea kowawine e'e. Tuhu manga taumata pai se'e ta sarang paghisa pia kowawine ko dal᷊ai pai se'e.”

23I Yehuda nangul᷊i, “Walate manga barang e'e si sie, asal᷊i ta makamea si kite. Ia seng nutawakal᷊i guna ngu mamaehi si sie, kateho i kau ta nusombang i sie.”

24Patehang manga tilu wul᷊ang bou e'e i Yehuda nakarea habari himoneu i Tamar manuhange seng nukoa kakanoa kere singkatau kowawine ko dal᷊ai dang seng pia kal᷊uwaenge.

Bou e'e i Yehuda nuparenta, “Al᷊ae i sie dang tutungte sarang pakapate!”

25Tintal᷊a i Tamar kahiwawa sarang l᷊ikuri, i sie nundoho ngu tatanata si emponge, angkunge, “Ia natiang su ko ese ko pia manga barange i'i. Pakinako minsang i sai ko pia capi dingang u tal᷊inge l᷊au tiking i'i.”

26I Yehuda nakakil᷊al᷊a barang e'e dang nangul᷊i, “Ko wawine e'e ta nunsal᷊a. Ia ta nungganapi hal᷊iku si sie; tuhu hinonge ia mupukawing i sie dingang u anaku i Syela.” I Yehuda seng ta sau nutatamba dingang i Tamar.

27Suapang seng temponge i Tamar mahinding, nal᷊ahe i sie sarung mahinding ana hindua. 28Tintal᷊a i sie kapahindinge, singkatau bou ana hindua e'e nupasuwang u l᷊imange, bou e'e biang nuhinggo l᷊ima e'e dang niikie dingang u banang mahamu. Angkunge, “Ana i'i nipahinding horo.” 29Kateho ana e'e nuhiuri sau l᷊imange, dang ana ko simbau l᷊ai nipahinding horo. Bou e'e biang nangul᷊i, “Inau kere'e l᷊al᷊engu manihasa sumuwang!” Kuteu ana ko nipahinding horo e'e nisighonge i Peres.#38:29: Peres: Areng i'i su wahasa ngu Ibrani mangal᷊enge “manihasa sumuwang”. 30Bou e'e mbuhue nipahinding tuaringe ko l᷊imange pia banang ko mahamu. I sie nisigho si Zerah.

Currently Selected:

KARARIADI 38: PLT

Highlight

Compare

Copy