KARARIADI 39

I Yusuf l᷊au kawing i Potifar

1I Yusuf seng niwawa u manga tau Ismael e'e sarang Mesir, dang niwal᷊u si Potifar, singkatau parwira ngu ratu ko nakoa tumbonang u mundadiaga istana. 2#Wuk. 7:9 Mawu nutul᷊ung si Yusuf hakiu i sie sintinia nakakoa su l᷊al᷊ung u kaul᷊i u pul᷊ahal᷊ie. I sie natana su wal᷊e ngi Tuange, tau Mesir e'e. 3Tuange nakawua himoneu Mawu nutul᷊ung i Yusuf dang ual᷊ingu e'e i Yusuf nakakoa mapia su l᷊al᷊ung u patiku ko nihal᷊ikange. 4I Potifar mal᷊uasi naunge si Yusuf dang nuhengke si sie nakoa mutatangkiang watangenge; bou e'e nionggol᷊ang u hal᷊ie i Yusuf pangurusi ruma tanggae l᷊au patiku rarotonge. 5Nanita bou e'e, ual᷊ing i Yusuf, Mawu nangal᷊amati ruma tangga ngu tau Mesir e'e dang patiku apang ko nitaghuanenge, maneng su wal᷊e kere'e l᷊ai su anseri. 6Kaul᷊i u patiku ko nitaghuaneng i Potifar nisarakange si Yusuf. Dingang kere'e i Potifar seng wugha ngu urusang u wal᷊enge, su l᷊ikuru hal᷊i u ko kanengange.

I Yusuf ko masidada l᷊au ko pasung. 7Ta nal᷊iwue bou e'e, kawing i Potifar nanita pia naunge si Yusuf, bou e'e ana ko makuda e'e nihawukange matiki singkahindo. 8I Yusuf mandi dang nangul᷊i si sie, “Mundo ampung, Wawu Boki, i Tuang Potifar seng nanarakang kaul᷊i u koae si sia. I sie seng tahawal᷊uasi musipiri manga apa l᷊ai su wal᷊e i'i. 9Su si'i kawasaku seng musul᷊ung l᷊aboe dingang u kawasange. Takoae sarang simbau ko ta nisarakange si sia su l᷊ikuri Wawu Boki. Maniewe ia mukoa kakanoa ko dal᷊ai e'e dang mubardosa su Mawu Ruata?” 10Maneng kawing i Potifar l᷊ou-l᷊ou kapul᷊okenge si Yusuf, ana ko makuda e'e tawe mo matiki dingange.

11Pia su silou su tempo ngu i Yusuf musumu sarang l᷊al᷊ung u wal᷊e guna ngu mukoa hal᷊ie, takoae sarang singkatau su se'e. 12Kawing i Potifar namol᷊eng si Yusuf su jubange dang nangul᷊i, “Maite i karua matiki singkahindo.” I Yusuf nukal᷊umbinahi dang nakapilo, bou e'e nutumal᷊ang sarang l᷊ikuri, arawe jubange natintang su l᷊ima ngu kowawine e'e. 13Su tempo ngu kawing i Potifar nakawua himoneu i Yusuf seng nutumal᷊ang dang jubange natintang, 14i sie nukui manga l᷊ange dang nangul᷊i, “Kenang tuhunge! Tau Ibrani ko niwawa u kawingku sarang wal᷊e i'i, nuhinakang si kite. I sie nusumu su l᷊al᷊ung u kamariku dang mo mukoa ko l᷊amuhu si sia, kateho ia nukumiha mauha-uha. 15Su tempo ngu nakaringihi kihaku, i sie nutumal᷊ang sarang l᷊ikuri dang jubange natintang.”

16Bou e'e kawing i Potifar nundeso juba e'e sarang kawinge mapul᷊e. 17Suapang kawinge napul᷊e, i sie nuhabari wuke e'e su kawinge, angkunge, “Tau Ibrani ko niwawa u mai e'e, nusumu su l᷊al᷊ung u kamari guna ngu muhinakang si sia. 18Kateho suapang ia nukumiha, i sie nutumal᷊ang sarang l᷊ikuri dang jubange natintang.”

19I Potifar nuwawal᷊uang kahingang. 20Dang i sie nuparenta tadeau i Yusuf pakaehong pakisame dang pasu su l᷊al᷊ung u tutupang, tampa u manga tahanang u ratu makakuhung. 21#Wuk. 7:9Kateho Mawu nutul᷊ung si Yusuf dang turusi nukumindaghi si sie, hakiu tumbonang u tutupang mapia si sie. 22I sie nanarakang manga tahanang ko wal᷊inge si Yusuf, dang ko si Yusuf nipanarakaneng u hal᷊i u kaul᷊i u hal᷊i ko ikoa su l᷊al᷊ung u tutupang e'e. 23Tumbonang u tutupang e'e seng ta mutuhung apang ko seng nisarakange si Yusuf, Ual᷊ingu Mawu nutul᷊ung si Yusuf hakiu i sie nakakoa su l᷊al᷊ung u patiku hal᷊ie.

Currently Selected:

KARARIADI 39: PLT

Highlight

Copy

Compare