SASUWANG 40

Kema ngu Mawu nipararisi dang nitani guna ngu Mawu

1 Mawu nangul᷊i si Musa, 2“Pararisi ko Kema-Ku su tanggali kahimotongange wul᷊ang kahimotongange. 3Tahoko su l᷊al᷊ung u Kema e'e Wantal᷊i u Pudadiandi ko pia mapul᷊o parenta dang taingko heka tatakae su tingonge. 4Piloko meda dingang u sal᷊iumpuhi. Tahoko l᷊ai rihi ngu sol᷊o dang taingko sol᷊oe. 5Piloko mesba wul᷊aeng tampa panutungang u dupa su tingo ngu Wantal᷊i u Pudadiandi dang sangeko sasarae su tukari u Kema. 6Piloko mesba guna ngu korbang tongkateng su tingo ngu Kema. 7Piloko bak ake su tal᷊oara u Kema dang mesba e'e, bou e'e tahone ngu ake. 8Bou e'e taingko pampele su salasari Kema, dang sangeko sasarae su tukari u salasari.

9Bou e'e Kema dang kaul᷊i u sal᷊iumpuhi mambeng isumbangu si Sia dingang u l᷊al᷊eng kere'e tadeau kaul᷊ie nitani guna ngu Ia. 10Sumbako mesba dang kaul᷊i u sal᷊iumpuhi dingang u l᷊al᷊eng kere'e, tadeau kaul᷊ie nitani guna ngu Ia. 11Koako kere'e l᷊ai dingang bak u ake dang l᷊ampahie.

12Bou e'e, roiko i Harun dingang u manga anae pasongo su tukari u Kema dang pamursi watangenge. 13L᷊ohokeko pakeang u imam si Harun, dang wuhako l᷊ana si sie kere imam. 14Bou e'e roiko manga anae pakasandighi, dang l᷊ohokeko kameja si sire. 15Bou e'e wuhako i sire kere musul᷊ung i kau namuha l᷊ana si papa ngi sire, tadeau i sire l᷊ai botonge mutangkiang si Sia kere imam. Dingang u upacara mamuha l᷊ana e'e hintou ngi sire mukakal᷊intuhu muhinggo hal᷊i u imam.” 16I Musa nukoa kaul᷊ie musul᷊ung ko niparenta ngu Mawu. 17Kuteu su tanggali kahimotongange wul᷊ang kahimotongange su l᷊al᷊ung u taung karuange samuri ngu bangsa Israel nanintang u Mesir, Kema ngu Mawu e'e nitaing. 18I Musa namilo manga l᷊ampahie, nupararisi manga rihinge, nutaing manga kau wawal᷊andange dang nutaing manga papasie. 19Bou e'e niwilae atu u Kema dingang u tataka u bahageang l᷊ikuri su wawoe musul᷊ung niparenta ngu Mawu. 20Bou e'e watu darua e'e nipasue sarang l᷊al᷊ung Wantal᷊i u Pudadiandi. Bou e'e i Musa nutaing tataka u wantal᷊i e'e dang mupasu kau ghaghual᷊enge sarang l᷊al᷊ung u wukal᷊ae. 21Bou e'e i sie namilo wantal᷊i e'e su l᷊al᷊ung u Kema dang nanange heka tatakae su tingonge, kere ko niparenta ngu Mawu si sie.

22Tuhu e'e i Musa namilo meda su l᷊al᷊ung u Kema su simbuka ngu sawunahi simbuka ngu l᷊ikuru heka, 23Bou e'e su wawo u meda e'e nipiloe boroti l᷊ahaghesi, kere ko niparenta ngu Mawu si Musa. 24Rihi ngu sol᷊o nipiloe su l᷊al᷊ung u Kema, su simbuka ngu timuhi, tumatingo dingang u meda e'e, 25bou e'e manga sol᷊o e'e nirikoe su tingo ngu Mawu. 26Mesba wul᷊aeng nipiloe su l᷊al᷊ung u Kema, su tingo ngu heka, 27bou e'e nitutunge dupa mawungi kere ko niparenta ngu Mawu si Musa. 28I Musa nanange pampele ngu Kema, 29dang su tingo ngu tukari e'e nipiloe mesba guna ngu korbang ko tutungang. Su wawo u mesba e'e nisumbange korbang tutungang dang korbang l᷊ahaghesi. 30Bak sal᷊aka nipilo su tal᷊oara u Kema dang mesba, bou e'e nitahonang dingang u ake. 31I Musa, i Harun dang manga anae nanguhasi l᷊ima l᷊au u l᷊aeri sire su se'e, 32sintinia i sire sumu su l᷊al᷊ung u Kema ngu Mawu arako sumandighi mesba. 33I Musa nutaing u pampele nul᷊iku Kema l᷊au u mesba e'e, bou e'e nanange pampele tukari u salasari. Kuteu nasuete kaul᷊i u hal᷊i e'e.

Winawa namikung Kema ngu Mawu

(Rek. 9:15-23)

34 # 1Mar. 8:10-11; Yes. 6:4; Yeh. 43:4-5; Kl᷊h. 15:8 Bou e'e pia winawa nal᷊intu namikung Kema ngu Mawu dang Kema e'e napene u sinang u sasongo ngu Mawu. 35Ual᷊ingu e'e i Musa ta nakasu sarang l᷊al᷊ung u Kema e'e. 36Tahaghisa winawa e'e mawi bou Kema ngu Mawu, bangsa Israel munggoghahi pukakemang i sire tadeau mangal᷊ing sarang tampa ko wal᷊inge. 37Arawe kamangkeng winawa e'e ta maawi i sire ta muwua bou e'e. 38Su kanandu u bangsa Israel mangkate kal᷊al᷊enge. Mawu ene su Kema e'e kere winawa su tempo ngu l᷊ou dang kere putung su tempo ngu huwi.

Currently Selected:

SASUWANG 40: PLT

Highlight

Copy

Compare